A ummi cazin ah kal

A ummi cazin ah kal

Upatnak he chawnhbiaknak cu chungkhar a fehtermi masala bantuk a si

 NUVA CAAH

3: Upatnak

3: Upatnak

A SULLAM

Upat a thiammi innchunghawi hna cu an lung aa khah lo caan hmanhah pakhat le pakhat an i zohkhenh. “Cu bantuk nuva hna nih lungkhong ngaiin, an ruahnak ṭhumh duh loin an um lo. An lung aa khah lonak kha an i ruahceihṭi. Pakhat le pakhat an ruahnak kha upatnak he an i ngaihpiak i an i cohlanpiak” tiah cauk (Ten Lessons to Transform Your Marriage) pakhat nih a ti.

BAIBAL PHUNGLAM: “Dawtnak cu . . . amah zawn lawng aa ruat lo.”​—1 Korin 13:​4, 5.

“Ka nupi ka upatmi cu ka sunsak caah a si. Ka nupi le kan chungkhar a hnorsuang hngami zeithil hmanh tuah ka duh lo.”​—Micah.

ZEICAH A BIAPIT

Chungkhar ah upatnak a um lo ahcun pakhat le pakhat sual i phawtnak, i serhleihnak le zei rel lonak hna a hung um kho. Mah nih i ṭhennak a chuahter khawh tiah hlathlaitu pawl nih an ti.

“Na nupi kha na tihram, na serhleih i capo saihnak ah na hman ahcun mahle mah zumhnak le na cungah zumhnak a ngeihmi a tlau kho. Mah nih nan chungkhar a rawhter khawh.”​—Brian.

TUAH KHAWHMI

HITIN I HAL

Zarhkhat chung na biachim le na tuahsernak kha zoh law hitin i hal:

  • ‘Ka innchunghawi kha voi zeizat dah ka mawhchiat i voi zeizat dah ka thangṭhat?’

  • ‘Ka innchunghawi ka upat kha zei ti lam hna in dah ka langhter?’

NA INNCHUNGHAWI HE I RUAH U

  • Zei bantuk tuahsernak le bia nih dah upat ka si tiah a ka ruahter?

  • Zei bantuk tuahsernak le bia nih dah upat ka si lo tiah a ka ruahter?

RUAHNAK CHEUHNAK

  • Upatnak hmuh na duhnak thil sining pathum kha ṭial. Na innchunghawi zong ṭialter ve. Mah hnuah nan catlap kha i thleng u law nan ṭialmi thil sining hna ah langhter i zuam u.

  • Na innchunghawi na upatnak a ruang hna kha ṭial. Mah sining hna zeitluk in dah na sunsak ti kha chim.

“Ka vapa ka upatmi cu ka sunsak caah le lawmhter ka duh caah ka tuahsernak in ka langhtermi a si. Upatnak kha thil nganpipi in langhter zungzal a hau lo, thil hmetete tuahnak thawng zongin langhter khawh a si.”​—Megan.

Upat ka si, si lo timi cu a biapimi a si lo. Na innchunghawi nih upat ka si timi ruahnak a ngei maw timi tu kha a biapimi a si.

BAIBAL PHUNGLAM: “Mi zawnruahnak, zaangfahnak, toidornak, nemnak le lungsaunak kha nan i aih awk a si.”​—Kolose 3:​12.