A ummi cazin ah kal

A ummi cazin ah kal

Hmuitinh cu inn pungsan suaimi he aa lo; i zuam ahcun a si kho ko

 MINO CAAH

12 Hmuitinh

12 Hmuitinh

A SULLAM

Hmuitinh timi cu saduh thah sawhsawh men lawng a si lo. Hmuitinh taktak ah timhtuahnak, a tlarimi sinak le a fawimi lam zulh loin rian i zuamnak hna aa tel.

Zarh tlawmpal a raumi hmuitinh a um, thla tlawmpal a raumi hmuitinh a um i a kum in a raumi hmuitinh zong a um. Hmuitinh tete kha na tlinh khawh hna ahcun caan saupi a raumi hmuitinh zong na tlinh khawh lai.

ZEICAH A BIAPIT

Hmuitinh pawl tlinhnak nih zumhnak a ngeihter khawh, hawikomhnak a fehter khawh i nuamhnak a karhter khawh.

Mahle mah zumhnak: Hmuitinh hmetete na chiah i na tlinh tikah a ngan deuhmi hmuitinh chiah awkah zumhnak aan ngeihter. Nifate na tonmi ṭhirual hneknak hna tei khawh awk zongah zumhnak aan ngeihter chin.

Hawikomhnak: Hmuitinh aa chiahmi le tuah an duhmi a tuah khomi hna he i hawikomh kha mi nih an duh. Mah lengah i hawikomhnak fehter awkah a ṭha bikmi lam pakhat cu hmuitinh pakhat kha phanh dingin hawile he i zuamṭi kha a si.

Nuamhnak: Hmuitinh na chiah i na phanh tikah hlawhtlinnak ka hmu timi ruahnak na ngei lai.

“Hmuitinh ngeih kha ka duh. Mah nih hmuitinh ah lungthin pek ding le phanh khawh i zuam dingin a ka forh. Hmuitinh pakhat na chiah i na tlinh tikah ‘Wow, ka tuah khawh! Kaa tinhmi ningin ka tlinh khawh’ tiah naa lawm tuk ko lai.”​—Christopher.

BAIBAL PHUNGLAM: “Thlitu le nikhua an ṭhat tiang na ngan peng ko ahcun, thlaici zeihmanh na tuh bal lai lo i zeihmanh na zun bal pek fawn lai lo.”​—Phungchimtu 11:4.

TUAH KHAWHMI

Hmuitinh chiah awk le phanh awkah a tanglei ningin tuah.

Ṭha tein thleidang. Hmuitinh hna kha cazin tuah law pakhatnak, pahnihnak, pathumnak ti bantukin a biapi deuhmi kha thleidang.

Timhtuahnak ngei. Hmuitinh pakhat cio he aa tlaiin a tanglei ningin tuah:

  • Zeitik ah tlinh ding timi nithla chia.

  • Zeidah tuah ding timi timhtuahnak ngei.

  • Dawnkhantu thil hna le tei khawh ning hna kha ruat.

Tuah colh. Thawk khawh awkah a neknok tiang a tlin lai kha hngak hlah. ‘Ka hmuitinh phanh khawh awkah a hmasa bik ah zeidah ka tuah khawh?’ tiah i hal. Cun tuah colh. Kehlan pakhat na phanh tik paohah chingchiahnak tuah.

BAIBAL PHUNGLAM: “Teimaknak le a hlankan in ṭha tein thil rak ruahchungnak nih duhdimnak kha a chuahter.”​—Phungthlukbia 21:5.