A ummi cazin ah kal

A ummi cazin ah kal

Chawnhbiaknak cu nan fale he pehtlaih khawhnak hlei a si

 NULEPA CAAH

5: Chawnhbiaknak

5: Chawnhbiaknak

A SULLAM

Chawnhbiaknak taktak timi cu nulepa le fale karah ruahnak le intuarnak hna i chimh kha a si.

ZEICAH A BIAPIT

Kumhra fai a simi fale he chawnbiaknak cu a hleiin zuamcawhnak a hung si men lai. An ngakchiat lio ahcun zei paoh an in chimh ko lai. Asinain kumhra fai an hung si tikah cun tlawmpal lawng an in chimh cang caah an ruahnak le an intuarnak hna kha na hngal ti lo. Mah cu tiva ral ah a dirmi bantuk na si. A tak ti ahcun mah caan cu chawnhbiaknak an herh tuk lio caan a si.

TUAH KHAWHMI

Fale nih bia ruah duh tik paohah timhcia tein um. Zan tlaipi hnuah biaruah an in duh hmanhah ngaihpiak hna.

“Hitin na ruah khawh men: ‘Atu ah ma biaruah na ka duh? Chun nitlak kan umṭi komi!’ Asinain kan fale nih an lung ummi bia chimh an kan duh tikah phunzai awk a si lo. Mah cu nulepa nih kan i ruahchanmi a si ko lo maw?”​—Lisa.

“Tuan tein ih ka duh ko nain kumhra fai ka fale he zan tlai hnuah bia ṭha tein kan i ruah khawh deuh.”​—Herbert.

BAIBAL PHUNGLAM: “Ahohmanh nih kanmah ca ṭha ding lawng kha kan zoh awk a si lo, midang ca ṭha ding tu kha kan zoh awk deuh a si.”​—1 Korin 10:24.

Na lung vaivuanhter hlah. Fa a ngeimi pa pakhat nih hitin a ti: “Ka fale he bia kan i ruah lioah khua dang ka ruah caan hna a um. Mah kha hlen khawh an si lo, an hngalh ko!”

TV le phone ti bantuk electronic thil hna ruangah na lung a vaivuanh nakhnga lo mah kha phit law chia. Na fa chimmi cu na caah a biapi tuk lomi a lawh hmanhah ṭha tein ngaihpiak.

“Fale an intuarnak cu kan caah a biapi tukmi a si ti kha hngalhter an hau. Cutin a si lo ahcun an intuarnak kha an kan chim duh lai lo asiloah midang sinah bawmhnak an hal hna lai.”​—Maranda.

“Na fa a ruahnak cu a hmaan lo tukmi a si hmanhah a hleihluat tuk in lehrulh hlah.”​—Anthony.

BAIBAL PHUNGLAM: “Nan ngaih ning kha i ralring u.”​—Luka 8:​18.

Caanṭha na hmuhmi kha hmang. A caan ah fale nih nulepa he hmaitonh in an ṭhut lo caan ah an lung ummi bia kha an chim tawn.

“Mawṭaw kan i cit tikah bia kan i ruah tawn. Hmaitonh in kan ummi nakin a sir in kan um tikah bia ṭha deuh in kan i ruah khawh.”​—Nicole.

Rawl ei caan zongah bia ṭha tein kan i ruah khawh.

“Zanriah ei caan ah nikhat chung i kan tonmi a chia bikmi le a ṭha bikmi kong hna kha kan i ruah. Mah nih kan lung a rualter i kanmah lawng buaibainak a tongmi kan si lo ti kha a kan hngalhter.”​—Robin.

BAIBAL PHUNGLAM: “Bia theih duhnak lei ah cun a khul a rangmi si u law biachimnak lei . . . ah cun a khul a nuarmi si u.”​—Jeim 1:​19.