A ummi cazin ah kal

A ummi cazin ah kal

Ṭuanṭinak timi cu vanlawng mawngtu le a bawmtu hmunkhat ah khual an tlawnṭi bantuk a si

 NUVA CAAH

2: Ṭuanṭinak

2: Ṭuanṭinak

A SULLAM

Nuva hna nih innchungkhar ah an ṭuanṭi tikah vanlawng mawngtu le a bawmtu hmunkhat ah khual an tlawnṭi bantuk a si. Harnak an ton tik hmanhah “keimah” timi ruahnak ngei loin “kanmah” timi ruahnak an ngei.

BAIBAL PHUNGLAM: “Pahnih an si ti lo i pakhat an si cang.”​—Matthai 19:6.

“Innchungkhar timi cu pakhat tuahnak lawngin a si kho lo. Hlawhtlinnak hmuh awkah nuva ningin ṭuanṭi a hau.”​—Christopher.

ZEICAH A BIAPIT

Hmunkhat ah a ṭuanṭi lomi nuva hna cu buaibainak a chuah tikah mah kha tawnghtham loin pakhat le pakhat tu sual an i phaw. Mah tikah buaibainak hmete cu a nganpi ah aa thleng tawn.

“Innchungkhar ah hmunkhat ah ṭuanṭinak cu a biapi tukmi a si. Ṭuanṭinak a um lo ahcun innchunghawi si loin a khaanhawi lawng nan si lai. Hmunkhat ahcun nan umṭi ko nain a biapimi biakhiahnak hna tuah awkah nan i harh lai.”​—Alexandra.

TUAH KHAWHMI

HITIN I HAL

  • Ka lahkhah kha “keimah tangka” lawngin ka hmu maw?

  • Ka innchunghawi he kan umṭi lo caan ah kaa nuam deuh maw?

  • Ka innchunghawi cu rualchan pawl he naihniam tein a um ko nain kei cu kaa hlat maw?

NA INNCHUNGHAWI HE I RUAH U

  • Zei bantuk thil sining(hna) ah dah kan ṭuanṭi?

  • Zei bantuk thil sining(hna) ah dah ṭhancho kan herh?

  • Ṭuanṭi duhnak lungput ngeih chin awkah zeidah kan tuah khawh?

RUAHNAK CHEUHNAK

  • Tennis tuk aa zuammi, mi pahnih bantuk si loin hmunkhat ah a ṭangṭimi si awkah na innchunghawi he nan tuah khawhmi kha ruat u.

  • ‘Zeitindah ka tei khawh lai?’ ti si loin ‘Kan pahnih in zeitindah kan tei khawh lai?’ tiah ruat u.

“Ahodah a hmaan, ahodah a palh tiah ruat hlah u. Mah cu chungkhar lungrualnak caah a biapimi a si lo.”​—Ethan.

BAIBAL PHUNGLAM: “Midang duhning kha hmuh thiam i zuam u law nanmah duhnak lawng kha ruat hlah u.”​—Filipi 2:​3, 4.