A ummi cazin ah kal

A ummi cazin ah kal

 CAWN AWK CAPAR 29

“Va Kal U Law . .  Ka Zultu Ah Va Ser Hna U”

“Va Kal U Law . .  Ka Zultu Ah Va Ser Hna U”

“Cucaah khuazakip ah va kal u law miphun vialte kha ka zultu ah va ser hna u.”—MATT. 28:19.

HLA 60 Nunnak Caah A Si

LANGHTERNAK *

1-2. (a) Matthai 28:18-20 ah langhtermi Jesuh nawlpekmi ningin Khrihfa hna i a biapi bikmi an rian cu zeidah a si? (b) Hi capar ah zei kong dah kan i ruah hna lai?

LAMKALTU hna nih tlangcung ah Jesuh he i ton lai kha an i ngaih tuk. Jesuh nih a thawh ṭhan hnuah a zultu pawl kha cuka hmun ah rak ka tong u tiah a ti hna. (Matt. 28:16) Mah cu ‘a zultu za nga ring lo sinah voi khatte ah a langh’ lioah a si men lai. (1 Kor. 15:6) Jesuh nih a zultu pawl kha i ton awkah zeicah a auh hna? Lungthawh awk ngai a simi mah rian hi a pek hna: “Khuazakip ah va kal u law miphun vialte kha ka zultu ah va ser hna u.”—Matthai 28:18-20 rel.

2 Jesuh bia a theimi zultu hna cu kumzabu pakhatnak i Khrihfa an hung si. Mah Khrihfa hna i a biapi bikmi an rian cu Khrih zultu siter kha a si. * Tuchan ah vawleicung pumpi ah Khrihfa unau thong tampi an um i mah Khrihfa hna nih a biapi tukmi le aa khatmi rian an ngei. Hi capar ah mah biahalnak pali hi kan i ruah hna lai: Zultu siternak rian cu zeicah a biapit tuk? Mah ah zeidah aa tel? Zultu siternak rian ah Khrihfa dihlak kan i tel kho maw? Mah rian ah zeicah kan lung a sau a herh?

Zultu Siternak Rian cu Zeicah a Biapi Tuk?

3. Johan 14:6 le 17:3 ningin zultu siternak rian cu zeicah a biapit tuk?

3 Zultu siternak rian cu zeicah a biapit tuk? Khrih zultu si  lawngah Pathian hawi si khawh a si caah a si. Mah lengah Khrih hnu a zulmi hna cu atu ah an nunning a nuam i hmailei ah zungzal nunnak ruahchannak an ngei. (Johan 14:6; 17:3 rel.) Jesuh nih a biapi tukmi rian a kan pek, asinain mah rian kha kanmah lawngin kan ṭuan lo. Lamkaltu Paul nih amah le a dang Khrihfa hna kong he aa tlaiin hitin a ti: “Kannih cu Pathian rian ṭuanṭi hawi kan si.” (1 Kor. 3:9, NW) Jehovah le Jesuh nih mitlinglo a simi minung an pekmi hna rian cu zeitluk tinvo sung dah a si.

4. Ivan le Matilde hmuhtonnak in zeidah kan cawn khawh?

4 Zultu siternak rian nih lawmhnak tampi a kan pek khawh. Colombia ah a ummi Ivan le a nupi, Matilde kong hi ruathmanh. Davier timi minopa pakhat kha thawngṭha an chimh. Mah tikah hitin a ti hna: “Ka nunnak hi thlen ka duh, asinain kaa thleng kho lo.” Davier cu Boxing aa thongmi, ritnak sii a hmangmi le zu a ding tukmi a si i a nungak, Erika he innkhat ah an umṭi. Ivan nih hitin a ti: “Davier he Baibal cawnnak kan hun thawk. A umnak khua cu aa hlat tuk i suimilam tampi chung nawncek lakah sehbing kan i cit. Davier a tuahsernak le a lungput hna aa thlenmi a hmuh hnuah Erika zong Baibal a hung cawng ve.” Davier cu ritnak sii a hmang ti lo, zu a ding ti lo i boxing zong aa thong ti lo. Cun Erika zong kha a ṭhit. Matilde nih hitin a ti: “2016 ah Davier le Erika tipil an in tikah Davier nih ‘thlen ka duh, asinain kaa thleng kho lo’ tiah a timi bia kha kan lung ah a hung chuak. Kan i nuamh tuk caah kan ṭap.” Mi pawl kha Khrih hnu zultu si awkah kan bawmh hna tikah lawmhnak nganpi kan hmu ti cu a fiang ko.

Zultu Siternak Rian ah Zeidah aa Tel?

5. Zultu siter awkah a hmasa bik kehlan cu zeidah a si?

5 Zultu siter awkah a hmasa bik kehlan cu lungthin ṭha a ngeimi hna “kawl” kha a si. (Matt. 10:11, NW) Kan tonmi hna kip sinah thawngṭha kan chimnak thawngin Jehovah Tehte kan si kha kan langhter. Cun thawngṭha chim u timi Khrih nawlpekmi kan zulhnak thawngin Khrihfa taktak kan si kha kan langhter.

6. Phungchimnak ah hlawhtlinnak hmuh awkah zeinihdah a kan bawmh khawh?

6 Cheukhat cu lungtho tein Baibal biatak kha cawn an duh, asinain kan tonmi hna tam deuh cu a hmasa ahcun biatak kha zei ah a rel lomi an lo men lai. Cawn duhnak tam deuh an ngeih nakhnga tha kan pek hna a hau men lai. Phungchimnak ah hlawhtlinnak kan hmuh nakhnga ṭha tein kan i timhtuah a hau. Na tonmi hna nih hngalh an duh hngami kong kha i thim. Cun a kong pakhat cio hngalhter ning kha i timtuah.

7. Mi pakhat he zeitindah biaruahnak na thawk khawh, an bia ngaihpiak le upatnak langhter cu a biapi tiah zeicah na ruah?

7 Tahchunhnak ah, inn-ngeitu kha hitin na hal khawh: “Zaangfahnak in na ruahnak na ka chim kho lai maw? Tuchan ah kan tonmi buaibainak tampi nih vawleicung pumpi ah a ummi mi pawl kha a hnorsuan hna. Vawleicung i buaibainak hna a kan thawngthampiak khomi cozah pakhat kan herh tiah na ruat maw?” Mah hnuah Daniel 2:44 kha i ruahṭi u. Asiloah mi pakhat kha hitin na hal khawh: “Fale kha a ṭhami ziaza he ṭhanter awkah a ṭha bikmi cawnpiaknak cu zeidah a si lai tiah dah na ruah? Zaangfahnak in na ruahnak hngalh ka duh.” Cun Deuteronomi 6:6, 7 kha ruahṭi u. I ruahṭi awkah zeibantuk  kong naa thim hmanhah na chimh hna hngami mi kong kha ruat. Baibal cawnpiakmi taktak an cawn tikah mah in zeitindah ṭhatnak an hmuh lai ti kha na mithlam ah cuanter. Anmah he bia nan i ruah tikah an bia ṭha tein ngaihpiak le an hmuhning upat cu a biapi tukmi a si. Cuticun an sining na hngalhthiam deuh lai i anmah zong nih na chimmi kha ngaih an duh deuh lai.

8. Zeicah lennolh tuah kha kan i zuam a herh?

8 Mi pakhat nih Baibal cawn dingin bia a khiah hlanah lennolh ṭhan awkah a caan le thazaang tampi na pek a hau men lai. Zeicah? Zeicahtiah kan len ṭhan hna lioah mi pawl cu inn ah an um men lai lo. Cun inn-ngeitu nih lungtho tein Baibal cawnpiaknak a cohlan hlanah atu le atu na len a hau men lai. Thingkung cu ti hmaan tein toihpiak tikah a ṭhang deuh ti kha i cinken. Cu bantukin hngalh duhnak a ngeimi he hmaan tein Pathian Bia kan i ruahṭi tikah Jehovah le Khrih an dawtnak kha a karh chin ve.

Zultu Siternak Rian ah Khrihfa dihlak Kan i Tel kho Maw?

Vawleicung pumpi ah a ummi Jehovah Tehte Hna cu aa tlakmi hna kawlnak ah an i tel (Catlangbu 9-10 zoh) *

9-10. Thawngṭha a chimmi paoh cu lungthin ṭha a ngeimi hna kawlnak ah kan i tel tiah zeicah kan chim khawh?

9 Thawngṭha a chimmi poah cu lungthin ṭha a ngeimi hna kawlnak ah aa telmi kan si. Mah rian cu a tlaumi ngakchia pakhat kawlnak he kan tahchunh khawh. Zeiti lam in dah? A tlaumi kumthum ngakchiapa kong hi ruathmanh. Minung 500 hrawng cu ngakchiapa kawlnak ah an i tel. Ngakchiapa a tlau hnu suimilam 20 hrawngah mi pakhat nih ngakchiapa cu fangvoi lo ah a hmuh. Asinain ngakchiapa a hmuh caah mi nih an thangṭhatmi kha a duh lo. Hitin a ti: “Mi tampi he ngakchiapa kha kan kawlṭimi a si.”

10 Mi tampi cu a tlaumi ngakchiapa bantuk an si. Ruahchannak an ngei lo, asinain bawmh an  duh. (Efe. 2:12) Aa tlakmi hna kawlnak ah nuai riat leng kan i tel. Baibal cawn a duhmi pakhat kha nangmah theng nih na hmu men lai lo. Asinain nangmah he sangkhat ah thawngṭha a chimmi thawngthanhtu dang nih Baibal in hmuhmi, biatak cawn a duhmi pakhat kha an hmuh men lai. Unaupa asiloah unaunu pakhat nih Khrih zultu si a duhmi pakhat a hmuh tikah kawlnak rian ah aa telmi vialte cu an i lawm.

11. Baibal cawnpiaknak na tuah lo hmanhah zultu siternak rian kha zei bantuk a dang lam in dah na bawmh khawh?

11 Atu ah Baibal cawnpiaknak na tuah lo hmanhah a dang lam in zultu siternak rian kha na bawmh khawh. Tahchunhnak ah, mithar pawl Biakinn ah an i pumh tikah na conglawmh khawh hna i anmah he naa kom kho. Cu bantuk lam in dawtnak na langhter ahcun a hmaanmi Khrihfa kan si ti kha hngalh awkah na bawmh khawh hna lai. (Johan 13:34, 35) A tawite a si hmanhah pumhnak i a phi na peknak thawngin mi thar pawl kha lungthin tak tein le upatnak he an zumhnak langhter khawhning kha na cawnpiak khawh hna. Thawngthanhtu thar he phungchim nan kalṭi kho i mi a cawnpiak hna tikah Baibal hman ding zongin na bawmh khawh. Cutin na tuahnak thawngin Khrih i zohchunh dingin na cawnpiakmi khawh lai.—Luka 10:25-28.

12. Zultu siter awkah aa thleidangmi fimnak kan ngeih a hau maw? Fianter.

12 Jesuh zultu si dingin midang cawnpiaknak ah aa thleidangmi fimnak kan ngeih a hau tiah kan ruah awk a si lo. Zeicah? Bolivia ah a ummi Faustina kong hi ruathmanh. Jehovah Tehte Hna he an i ton hmasa bik lioah ca a rel kho lo. Mah caan thawkin ca rel kha a cawng. Atu ahcun tipil a ing cang i midang cawnpiak kha a duh. Zarh fatin mi panga kha Baibal a cawnpiak hna. Faustina le a cawnpiakmi hna tam deuh cu ca an rel kho lo nain mi paruk kha tipil in ding tiangin a bawmh khawh hna.—Luka 10:21.

13. Kan i manh lo tuk hmanhah zultu siternak rian in kan hmuhmi thluachuah cheukhat cu zeidah a si?

13 Khrihfa tampi cu a biapimi thil tuah awk tampi an ngeih caah an i manh lo tuk. Asinain Baibal cawnpiaknak ah a caan an pek i mah in lawmhnak an hmu. Melanie kong hi ruathmanh. Kumriat a si cangmi a fanu, Alaska kha amah lawngin a zohkhenh. Pawcawmnak caah caantling in rian a ṭuan i cancer in a zawmi a pa zong kha a zohkhenh. Melanie cu an khua ah amah lawng Jehovah Tehte a si. Baibal cawn a duhmi pakhat kha hmuh a duh tuk caah a kih hmanhah phungchim kal khawh dingin thazaang ngeih awkah thla a cam lengmang. A donghnak ah Pathian pumpak min hngalh a duh tukmi Sara he an i tong. Caan tlawmpal hnuah Sara  nih Baibal cawnnak kha a cohlan. Melanie nih hitin a ti: “Ninga ni zanlei ahcun ka ba tuk, asinain ka fanu he Baibal cawnpiaknak ah kan kal tikah kan pahnih in ṭhatnak kan hmu. Sara nih a kan halmi biahalnak a phi kan kawl tik le Jehovah hawikom a hung simi kan hmuh tikah kan nuam tuk.” Sara nih a tonmi ralchanhnak kha ralṭha tein a inkhawh, cun church in a chuak i tipil a ing.

Zultu Siternak Rian ah Lungsaunak Ngeih a Herhnak a Ruang

14. (a) Zultu siternak rian cu ngatlaihnak rian he zeitindah aa lawh? (b) 2 Timote 4:1, 2 ah langhtermi Paul bia ningin zei tuah awk rian dah na ngeih?

14 Zultu si a duhmi kha na hmuh hna lo hmanhah aa tlakmi kha lungdong loin kawl peng hna. Jesuh nih zultu siternak rian kha ngatlaihnak rian he a tahchunh ti kha philh hlah. Ngatlaitu hna nih nga an tlaih hlanah suimilam tampi chung caan an hman. Zan tlaipi tiang asiloah zingka tein rian an ṭuan i a caan ah lam hlapi tiang an kal. (Luka 5:5) Cu bantukin phungchimtu cheukhat cu lungsau tein “nga tlaih” awkah aa khat lomi caan le hmun ah suimilam tampi an caan an hman. Zeicah? Mi tampi an hmuh khawh hna nakhnga caah a si. Cu bantuk lam in fakpi in aa zuammi hna nih lungthawhnak a ngeimi hna an hmuh hnanak thawngin thluachuah an hmu. Mi tam deuh na ton khawh hnanak caan asiloah na hmuh khawh hnanak hmun ah phung na chim kho lai maw?—2 Timote 4:1, 2 rel.

Na cawnpiakmi kha thlaraulei ṭhancho awkah lungsau tein bawm (Catlangbu 15-16 zoh) *

15. Baibal cawnpiaknak tuah tikah zeicah lungsaunak a herh?

15 Baibal cawnpiaknak ah zeicah lungsau a  herh? A ruang pakhat cu Baibal a cawngmi kha Baibal cawnpiaknak hngalh awk le duh awkah bawmh lawng si loin tam deuh kan tuah a hau. Baibal Ṭialtu Jehovah hngalh awk le dawt awk zongah kan bawmh a hau. Jesuh nih a zultu pawl kha zeidah a hal hna ti cawnpiak lawng si loin a hmaanmi Khrihfa hna nih zeitindah nun ding a si ti zong hngalh awkah kan bawmh a hau. Baibal phunglam zulh dingin aa zuam lioah lungsau tein kan bawmh a hau. Cheukhat cu an ruahnak le an tuahsernak kha thla tlawmpal chungah an i thleng kho. Asinain cheukhat tu cu caan sau deuh an herh.

16. Raul kong in zeidah naa cawn khawh?

16 Peru i missionary a ṭuanmi pakhat cu a lung a sau caah ṭhatnak a hmu. Hitin a ti: “Raul he Baibal cawnpiaknak cauk pahnih kan cawng dih cang. Asinain zuamcawhnak a tong peng rih. An chungkhar ah buaibainak a um zungzal, holh ṭhalo a hmang i a ṭhalomi a tuahsernak ruangah a fale nih an upat lo. Asinain hmaan tein a rak i pum, cucaah amah le a chungkhar bawmh awkah ka leng peng. Kumthum leng a rauh hnu i kan i ton tik ahcun tipil in dingin sining a rak tlinh cang.”

17. A hnu capar ah zei kong dah kan i ruah hna lai?

17 Jesuh nih “khuazakip ah va kal u law miphun vialte kha ka zultu ah va ser hna u” tiah a kan ti. Cucaah a kan fialmi rian liim awkah biaknak a ngei lomi asiloah Pathian a um lo tiah a zummi hna i telin kan zumhnak aa khat lomi hna sinah phung kan chim. A hnu capar ah hnulei sining aa dangmi hna sinah zeitindah thawngṭha kan chim khawh timi kong kan i ruah hna lai.

HLA 68 Pennak Thlaici Vorhnak

^ cat. 5 Khrihfa hna i a biapi bikmi an rian cu mi pawl Khrih zultu si awkah bawmh kha a si. Hi capar ah kan rian hlawhtling tein kan ṭuan khawh nakhnga a kan bawmmi, hman awk a tlakmi ruahnak cheuhnak hna kha a langhter lai.

^ cat. 2 BIAFANG FIANTERNAK: Khrih zultu hna nih Jesuh cawnpiakmi nakin tam deuh an ṭuan. Annih nih an cawnmi kha an zulh. Jesuh keneh kha a si khawh chungin naih tein zulh awkah an i zuam.—1 Pet. 2:21.

^ cat. 52 HMANTHLAK FIANTERNAK: Vanlawng dinhnak i Jehovah Tehte hna sinah cauk aa lakmi, khual a tlawngmi pa pakhat. A hnuah a va tlawnnak khua ah a dang Jehovah Tehte Hna nih zapi lak phungchimnak a tuahmi a hmuh. A tlun hnuah thawngthanhtu hna nih a inn ah an leng.

^ cat. 54 HMANTHLAK FIANTERNAK: Mah pa nih Baibal cawnnak kha a cohlan. A hnuah tipil in ding tiangin sining a hun tlinh.