A ummi cazin ah kal

A ummi cazin ah kal

 CAWN AWK CAPAR 7

Kan Pa Jehovah Kha Kan Dawt Tuk

Kan Pa Jehovah Kha Kan Dawt Tuk

“Kannih nih Pathian kan dawt cu Pathian nih a kan dawt hmasa caah a si.”—1 JOHAN 4:19.

HLA 3 Kan Thazaang, Ruahchannak, Zumhnak

LANGHTERNAK *

1-2. Jehovah nih a chungkhar ah kan i tel khawh nakhnga zeicah a timhtuah, zeitindah a timhtuah?

JEHOVAH nih amah a biami chungkhar ah i tel dingin a kan sawm. Mah cu a ṭha tukmi sawmnak a si. Mah chungkhar ah aa telmi hna cu Pathian sinah aa pumpe cangmi le a Fapa tlanhnak man a zummi an si. Kannih cu aa nuammi chungkhar kan si. Atu ah sullam a ngeimi nunnak kan ngei i vancung asiloah vawleicung Paradis ah zungzal nunnak hmuh awkah ruahchannak zong kan ngei.

2 A kan dawt tuk caah Jehovah nih a chungkhar ah kan i tel khawh nakhnga a timhtuah. Asinain cutin tuah awkah Jehovah nih mahca ṭhatnak nganpi kha a hlawt a hau. (Johan 3:16) Kannih cu “a man in cawkmi” kan si. (1 Kor. 6:20) Tlanhnak man thawngin Jehovah nih amah he a ṭhami pehtlaihnak kan ngeih khawh nakhnga a kan bawmh. Van le vawlei ah Lianngan Bik a simi kha kan Pa in auh khawhnak tinvo sung kan hmu. Cun a hmasa capar ah kan i ruah cang bantukin Jehovah cu a ṭha bikmi Pa a si.

3. Zei biahalnak dah kan i hal khawh men? (“ Jehovah nih Ṭha tein a Ka Hngal Maw?” timi rinli kulh ah zoh.)

3 Baibal ṭialtu pakhat bantukin hitin kan i hal men lai: “BAWIPA cu ka cung i a ṭhatnak vialte ruangah hin zeidah ka pek khawh lai?” (Salm 116:12) Vancung kan Pa kha zeihmanh kan pe kho lo. Asinain a dawtnak nih amah kha dawt ve awkah a kan forh. Lamkaltu Johan nih hitin a ti: “Kannih nih Pathian kan dawt cu Pathian nih a kan dawt hmasa caah a si.” (1 Johan 4:19) Vancung kan Pa kan dawt kha zeiti lam in dah kan langhter khawh?

 Jehovah he Naih tein Um

Thla kan camnak thawngin, a nawl kan ngaihnak thawngin le amah dawt awkah midang kan bawmh hnanak thawngin vancung kan Pa, Jehovah kan dawt kha kan langhter (Catlangbu 4-14 zoh)

4. Jeim 4:8 ningin Jehovah he naih tein um awkah zeicah fakpi in kan i zuam awk a si?

4 Jehovah nih amah he naih tein um hna sehlaw rak ka pehtlai hna seh ti a kan duh. (Jeim 4:8 rel.) “Thla cam zungzal u” tiah a kan forh i kan bia zong a kan ngaihpiak zungzal. (Rom 12:12) Kan bia ngaih awkah timhcia a si zungzal i a bat zong a ba bal lo. Cun a Bia, Baibal kan relnak thawngin le Baibal hngalhthiam deuh awkah a kan bawm khomi cauk pawl kan relnak thawngin a bia kha kan ngaih. Khrihfabu pumhnak hna ah ṭha tein lungthin kan peknak thawng zongin a bia kha kan ngaih. Hmaan tein bia i ruahnak nih fale kha nulepa he a naihter deuh hna bantukin Jehovah he hmaan tein bia i ruahnak nih amah he naih tein um awkah a kan bawmh.

Catlangbu 5 zoh

5. Kan thacamnak kha zeitindah kan ṭhanchoter khawh?

5 Jehovah sin na thlacamnak cu zei he dah aa lawh ti kha ruat. Jehovah nih thlacamnak in kan lungthin chungah a ummi vialte kha phuang dih hna seh ti a duh. (Salm 62:8) Kanmah le kanmah hitin kan i hal awk a si: ‘Ka thlacamnak cu a phungmen in a si maw? Ka chimcia kha ka chim ṭhan lengmang maw? Lungtak tein ka cam maw? Asiloah caṭialmi i zohchom in tah ka cam maw?’ Jehovah kha na dawt tuk caah amah he nan i pehthlaihnak kha fehter zungzal na duh ti cu a fiang ko. Cutin tuah khawh awkah Pathian he hmaan tein bia nan i ruah peng a hau. Na intuarnak vialte kha chim. Naa lawmhnak le na ngaihchiatnak kong zong kha chim. Jehovah sinah bawmhnak zong na hal khawh.

6. Vancung kan Pa he naih tein um awkah zeidah kan tuah awk a si?

6 Vancung kan Pa he naih tein um khawh awkah lawmh a hngalmi kan si zungzal a hau. Salm caṭialtupa nih a chimmi hi kan hna a tla ve ko lai: “Maw BAWIPA ka Pathian, nangmah nih kan caah thil tampi na tuah; nangmah bantuk ahohmanh an um lo. Nangmah nih lam ṭhaṭha tampi khua na kan khanpiak. An dihlak in chim i tiim ning law a chim hmanh ka chim cawk hna hnga lo.” (Salm 40:5) I lawmh lawng si loin kan biachim le kan tuahsernak in Jehovah cungah kan i lawmhnak kha kan langhter. Mah nih tuchan i mi tampi he a kan thleidanter. Kannih cu Pathian cungah lawmh a hngal lomi hna lakah kan nung. Mi pawl lawmh an hngalh lomi nih “ni hmanung bik” ah kan nung ti kha a langhter. (2 Tim. 3:1, 2) Mah lungput kha zeitikhmanh ah ngeih kan duh lai lo.

7. Jehovah nih zeidah tuahter a kan duh, zeicah?

7 Nulepa nih an fale he bia i al lengmang kha an duh lo, asinain anmah he hawikom si an duh. Cu bantukin Jehovah zong nih amah a biami hna kha pakhat le pakhat hawikom ṭha si hna seh ti a duh. Pakhat le pakhat kan i dawtmi nih a hmaanmi Khrihfa kan si ti kha a langhter. (Johan 13:35) Salm caṭialtu nih a ṭialmi hi kan cohlan ve ko lai: “Unau rual i rem tein khuasakṭi hi zeitluk in dah a ṭhat i a nuamh.” (Salm 133:1) Unau pawl kan dawt hna tikah Jehovah kan dawt kan langhtermi a si. (1 Johan 4:20) “Pakhat le pakhat cungah zaangfahnak lungthin le nemnak lungthin” a ngeimi chungkhar ah kan i tel khawhmi cu zeitluk in dah a ṭhat.—Efe. 4:32.

Nawlngaihnak in Na Dawtnak kha Langhter

Catlangbu 8 zoh

8. Jehovah nawl kan ngaih awk a sinak a ruang cu 1 Johan 5:3 ningin zeidah a si?

8 Fale nih nulepa nawl ngai hna seh ti a duh bantukin Jehovah nih kanmah zong a nawl ngai hna seh ti a kan duh. (Efe. 6:1) A kan Sertu, nunnak a kan Petu le nulepa vialte nakin a fim deuhmi a si caah kan sinin nawlngaihnak kha hmuh awkah aa tlak. Asinain Jehovah nawl kan ngaihnak a ruang cu kan dawt caah a  si. (1 Johan 5:3 rel.) A nawl kan ngaih awk a sinak a ruang tampi a um ko nain cutin tuah awkah Jehovah nih a kan hnek lo. Jehovah nih zalong tein thimnak nawl a kan pek, cucaah amah kan dawt caah a nawl ngaih dingin kan i thim tikah Jehovah cu aa lawm.

9-10. Pathian phunglam hngalh le zulh cu zeicah a biapit?

9 Nulepa nih an fale kha him hna seh ti an duh. Cucaah an fale ṭhatnak caah ziazalei he aa tlaiin phunglam an serpiak hna. Fale nih mah phunglam an zulh tikah an nu le an pa an zumh hna le an upat hna kha an langhtermi a si. Cucaah vancung kan Pa phunglam hngalh le zulh cu a biapi tukmi a si. Cutin kan tuah tikah Jehovah kan dawt le kan upat kan langhtermi a si i kanmah theng zong ṭhatnak kan hmu. (Isa. 48:17, 18) Asinain Jehovah le a phunglam zei ah a rel lomi hna cu harnak an tong.—Gal. 6:7, 8.

10 Jehovah lung a lawmhtermi lam in kan nun tikah pumsalei, lungthinlei le thlaraulei ah ṭih a nungmi thil in huhphenh kan si. Jehovah nih kan caah a ṭha bikmi kha a hngalh. United States ah a ummi Aurora nih “Jehovah nawlngaihnak nih a ṭha bikmi nunnak a ka ngeihter ti kha ka hngalh” tiah a ti. Mah cu kan dihlak ca zongah a hmaanmi a si. Dawtnak aa telmi Jehovah lamhruainak zulhnak in ṭhatnak zeitindah na hmuh?

11. Thlacamnak nih zeitindah a kan bawmh?

11 A har tik caan hmanhah thlacamnak nih nawl a ngaimi si awkah a kan bawmh. A caan ah, misual kan si caah Jehovah nawl ngaih  awkah kan i harh ko lai, asinain a nawl ngaih awkah fakpi in kan i zuam zungzal a hau. Salm caṭialtupa nih Pathian kha “ka lungthin cu nangmah nawl zulh duhmi ah ser ko” tiah a nawl. (Salm 51:12) Hmaanhmaan hmaikal a ṭuanmi Denise nih hitin a ti: “Jehovah nawlpekmi pakhatkhat kha zulh awkah kaa harh ahcun a hmaanmi thil ka tuah khawh nakhnga thazaang ka pe tiah thla ka cam.” Jehovah nih cubantuk thlacamnak cu a leh hrimhrim lai ti kha kan zumh khawh.—Luka 11:9-13.

Kan Pa Dawt awkah Midang kha Bawm Hna

12. Efesa 5:1 ningin zeidah kan tuah awk a si?

12 Efesa 5:1 rel. Jehovah “dawtmi fa” kan si caah kan si khawh chungin amah kha kan i zohchunh. Midang he kan i pehtlaih tikah dawtnak, zaangfahnak le ngaihthiamnak lungput kan langhternak thawngin Pathian sining kha kan i zohchunh. Cucaah Pathian a hngal lomi hna nih kan langhtermi ziaza ṭha an hmuh tikah mah nih Jehovah kong tam deuh in cawn awkah a forh hna. (1 Pet. 2:12) Jehovah nih a kan pehtlaih ningin an fale kha pehtlaih awkah Khrihfa nulepa hna nih an i zuam awk a si. Nulepa nih Jehovah an i zohchunh tikah an fale zong nih Jehovah hawi si an duh ve.

Catlangbu 13 zoh

13. Zei kong ah dah lungthin kan pek awk a si?

13 Ngakchia pawl cu an pale cungah an i uangthlar i an pale kong chim kha an duh. Cu bantukin vancung kan Pa cungah kan i uangthlar i amah kong kha midang sinah chim kan duh ve.  Siangpahrang David bantukin hitin kan ruah ve men lai: “A tuahmi thil ruangah khan ka thangṭhat lai.” (Salm 34:2) Asinain a ningzah a pangmi kan si ah tah zeitin? Zeitindah a ral a ṭhami kan si khawh? A kong kan chim tikah Jehovah zeitluk in dah aa lawmh ti le a kong cawnnak in midang nih zeitluk in dah ṭhatnak an hmuh ti kha lungthin kan pek ahcun ralṭhatnak kan hun ngei lai. Jehovah nih kan herhmi ralṭhatnak a kan pek lai. Pathian nih kumzabu pakhatnak i unau pawl kha ralṭhatnak ngeih dingin a bawmh hna bantukin kannih zong a kan bawmh ve lai.—1 Thes. 2:2.

14. Zultu siternak rian a biapitnak a ruang cheukhat cu zeidah an si?

14 Jehovah cu thleidannak a ngei lo, cucaah zeibantuk hnulei sining a ngeimi an si hmanhah an cungah dawtnak kan langhtermi a hmuh tikah aa lawm. (Lam. 10:34, 35) Midang cungah dawtnak langhter khawhnak a ṭha bikmi lam pakhat cu thawngṭha kan chimh hnanak thawngin a si. (Matt. 28:19, 20) Mah rian nih zeidah a tuah khawh? Kan bia a ngaimi hna kha atu ah an nunnak a ṭhanchoter khawh i hmailei ah zungzal nunnak ruahchanhnak zong a ngeihter khawh hna.—1 Tim. 4:16.

Kan Pa kha Daw law I Lawm

15-16. I lawmh awkah zei a ruang ṭha dah kan ngeih?

15 Jehovah cu dawtnak a ngeimi Pa a si caah a chungkhar kha lawmhter a duh hna. (Isa. 65:14) Harnak tampi kan ton hmanhah atu ah kan i lawmh khawhnak a ruang tampi a um. Tahchunhnak ah, vancung kan Pa nih a kan dawt tuk ti kha kan hngalh. Pathian Bia, Baibal kong he aa tlaiin a hmaanmi hngalhnak kan ngei. (Jer. 15:16) Cun kannih cu Jehovah a dawmi, Jehovah i a sangmi a phunglam a sunsakmi le pakhat le pakhat aa dawmi hna in dirhmi chungkhar ah kan i tel.—Salm 106:4, 5.

16 Hmailei ah a ṭha deuhmi nunnak hmuh dingin ruahchannak kan ngeih ca zongah kan i nuam kho peng. A rauh hlanah Jehovah nih ṭhatlonak vialte a hrawh dih lai i a Pennak hmangin vawlei kha Paradis ah a canter ṭhan lai ti kha kan hngalh. Mithi cu an thoṭhan lai i an dawtmi hna he an i tong ṭhan lai timi a ṭha tukmi ruahchannak zong kan ngei. (Johan 5:28, 29) Mah cu zeitluk in dah a nuamh lai. Cun a biapi bikmi cu a rauhhlan ah van le vawlei ah a ummi paoh nih dawtnak a ngeimi kan Pa nih a hmuh awk a simi sunparnak, thangṭhatnak le biaknak kha an pek cang lai.

HLA 12 Lianngan Pathian, Jehovah

^ cat. 5 Kan Pa Jehovah nih a kan dawt tuk i amah a biami a chungkhar a kan siter ti kha kan hngalh. Cucaah amah kha kan dawt ve. A kan zohkhenhtu kan Pa kan dawt kha zeitindah kan langhter khawh? Hi capar ah kan tuah khawhmi thil cheukhat kong kan i ruah hna lai.