A ummi cazin ah kal

A ummi cazin ah kal

 KHRIHFA NUNNING IN NUNNAK

Baibal Nih Zeidah A Kan Cawnpiak?​—⁠Hman Khawhning

Baibal Nih Zeidah A Kan Cawnpiak?​—⁠Hman Khawhning

A Kan Cawnpiak timi cauk le Baibal Cawnpiakmi timi cauk cu aa lo ko. A pahnih ningin cawnpiaknak hriamnam an si caah aa lomi biatak le aa lomi a konglam hna aa tel. Asinain A Kan Cawnpiak timi cauk ah hngalh a fawimi biafang hna le ruah dingmi a kong hna aa tel. A Kan Cawnpiak timi cauk cu Baibal cawnpiakmi cauk hngalhthiam aa harhmi hna caah chuahmi a si. Mah cauk ah thlaihhlei canah a donghnak i fianternak timi ṭhen in thlen a si. A donghnak i fianternak timi ṭhen ah catlangbu ah aa telmi biafang cheukhat le ruahnak cheukhat kha fiang tein a langhter. Ṭhen hna ah a hramthawk biahalnak le Baibal Cawnpiakmi rinli kulh a um ti lo. Mah canah Baibal biatak a tawinak in a donghter. Mah ah cauk i a biapimi a kong hna kha a fianter. Baibal Cawnpiakmi cauk bantukin A Kan Cawnpiak timi cauk kha pekṭhenh thla a si lo hmanhah, zeitik caan paoh ah kan pekṭhenh khawh hna. A ṭha tukmi A Kan Cawnpiak timi cauk kha Baibal cawnpiaknak tuah tikah zeitindah kan hman khawh?

A TAWINAK: Mi tam deuh nih Baibal cawnpiaknak kan tuah tikah catlangbu rel in biahalnak kan tuah hna. Asinain Baibal a cawngmi nih ca ṭha tein a rel thiam lo ah tah zeitin? Cu bantuk thil sining ah Baibal a cawngmi nih a hrampi a kong a hngalhthiam nakhnga a tawinak timi ṭhen kha hmangin na cawnpiak khawh. Baibal biatak a kong pakhat kha minit 15 hrawng a caan pe in nan i ruahṭi khawh. A tawinak ṭhen ah catlangbu bantukin a konglam hna cu a dikthliar in aa tel lo caah Baibal na cawnpiakmi nih a hngalhthiam nakhnga ṭha tein naa timhtuah chung awk a si. Catlangbu ningin nan i ruah ahcun i ruahṭi ṭhan awkah biatak timi ṭhen kha na hman khawh.

A DONGHNAK I FIANTERNAK: A donghnak i fianternak ṭhen ah catlangbu ah aa telmi biafang le ruahnak hna cungah i hngat in aa changchang in a fianter. Baibal Cawnpiakmi cauk i thlaihhlei bantukin a donghnak i fianternak ṭhen kha Baibal cawnpiaknak tuah lioah kan i ruahṭi lai maw, ruahṭi lai lo ti kha mah tein biakhiahnak tuah khawh a si.