A ummi cazin ah kal

A ummi cazin ah kal

 Ṭhen 2

Pathian Cu Ahodah A Si?

Pathian Cu Ahodah A Si?

1. Zeicah Pathian kan biak awk a si?

A hmaanmi Pathian cu zeizong vialte Sertu a si. Hramthawknak a ngei lo i donghnak zong a ngei lo. (Salm 90:2) Baibal ah aa ṭialmi thawngṭha cu amah sinin a rami a si. (1 Timote 1:​11) Pathian cu nunnak a kan petu a si caah amah lawng kan biak awk a si.​—Biathlam 4:11 rel.

2. Pathian cu zei bantuk Pathian dah a si?

Pathian cu hmuh khawh a si lo, zeicahtiah taksa pum a ngeimi minung nakin a sang deuhmi thlarau pum a ngeih caah a si. (Johan 1:​18; 4:​24) Asinain a sining le a ruahnak kha a sermi thil in hngalh khawh a si. Tahchunhnak ah, thingthei le pangpar a phunphun a ummi nih dawtnak le fimnak a ngeih kha a langhter. Van le vawlei a hmetngan nih a ṭhawnnak a langhter.​—Rom 1:20 rel.

Baibal relnak in Pathian i a sining le a ruahnak kha tam deuh in hngalh khawh a si. Tahchunhnak ah, Pathian nih zeidah a duh i zeidah a huat, minung kha zeitindah a pehtlaih hna ti le thil sining zoh in zeitindah a lehrulh hna ti kha Baibal nih a kan chimh.​—Salm 103:7-10 rel.

3. Pathian cu min a ngei maw?

Jesuh nih “vancung khua i a um kan Pa, Na min thiang cu upat si ko seh” tiah a rak ti. (Matthai 6:9) Pathian cu upatnak min tampi a ngei nain min cu pakhat lawng a ngei. Pathian min a awchuah cu holh phun khat le phun khat ah aa lo lo. Hakha holh in “Jehovah” tiah aw kan chuah nain mi cheukhat nih cun “Yahweh” tiah aw an chuah.​—Jeremiah 33:2, Judson, rel.

Baibal tampi ah Pathian min kha an hloh i Bawipa asiloah Pathian timi upatnak min tu in an thlen. Asinain Baibal an rak ṭial lioah cun Pathian min kha voi 7,000 hrawng an rak telh.  Jesuh nih mi kha Pathian kong a cawnpiak hna tikah Pathian min zong a chimh hna.​—Johan 17:6 rel.

Pathian Cu Min A Ngei Maw? timi video kha zoh

4. Jehovah nih a kan zohkhenh maw?

Dawtnak a ngeimi mah pa bantukin Pathian nih kan ca ṭhatnak caah a tuah

Harnak tampi a ummi nih Pathian nih a kan zohkhenh lo ti a langhter maw? Mi cheukhat nih Pathian nih hneksak a kan duh caah harnak a kan tonter tiah an ti, asinain mah cu a hmaan lo.​—Jeim 1:13 rel.

Pathian nih zalong tein thimnak nawl a kan peknak thawng in a kan upat. Biaknak kha zalong tein thimnak nawl a kan pek caah kan i lawm. (Joshua 24:15) Asinain mi tampi nih ṭhatlonak tuah kha an i thim caah mi cu harnak tampi an tong. Cu bantuk dinlonak a hmuh tikah Pathian cu a ngaih a chia.​—Genesis 6:5, 6 rel.

Jehovah cu a kan zohkhenhtu Pathian a si. Nuam tein khuasa hna seh ti a kan duh. Cucaah a rauhhlan ah harnak le harnak a chuahtertu kha a hrawh dih cang hna lai. Cutin a tuah hlan ah, harnak umnak nawl a awnhmi hi a ruang ṭha a um. Mah a ruang kha Ṭhen 8 ah kan hmuhte lai.​—2 Piter 2:9; 3:​7, 13 rel.

5. Zeitindah Pathian naih khawh a si?

Jehovah nih thlacamnak in amah naih awkah a kan sawm. Pathian nih pakhat cio i kan kong kha hngalh a duh. (Salm 65:1, 2; 145:18) Anih cu ngaihthiam awkah timhcia in a um. A lung ton awk kan i zuam nain a caan ah kan tuah kho lo, asinain kan i zuamnak kha a kan hngalhpiak. Cucaah mitling lo kan si nain amah he pehtlaihnak ṭha kan ngei kho.​—Salm 103:12-​14; Jeim 4:⁠8 rel.

Jehovah cu nunnak a kan petu a si caah aho nakhmanh in kan dawt deuh awk a si. (Marka 12:30) Pathian kong tam deuh in na hlathlainak in le aan halmi na tuahnak thawng in na dawt kha na langhter ahcun nan i naih chin lai.​—1 Timote 2:4; 1 Johan 5:3 rel.