A ummi cazin ah kal

A ummi cazin ah kal

 Ṭhen 14

Zeicah Pathian Nih Bu A Ngeih?

Zeicah Pathian Nih Bu A Ngeih?

1. Zeicah Pathian nih hlanlio Israel mi hna kha a miphun in a dirh hna?

Pathian nih Abraham tefa hna kha miphun pakhat in a dirh hna i nawlbia a pek hna. Annih cu “Israel” miphun tiah a auh hna i a hmaanmi biaknak le a bia zohkhenhtu ah a ser hna. (Salm 147:19, 20) Cucaah miphun vialte cu Israel miphun thawng in ṭhatnak an hmu kho.​—Lamkaltu 3:25 rel.

Pathian nih Israel miphun kha a tehte si awkah a thim hna. Mi nih Pathian nawlbia an zulh tikah ṭhatnak an hmu ti kha Israel miphun tuanbia nih a langhter. (Deuteronomi 4:6) Cucaah Israel mi hna thawng in midang nih a hmaanmi Pathian kong kha an hngalh khawh.​—Isaiah 43:10, 12 rel.

2. A hmaanmi Khrihfabu cu zeicah dirh a si?

A hnuah, Israel miphun cu Pathian mithmai ṭha an hmu ti lo, cucaah Pathian nih anmah canah Khrihfabu kha a dirh. (Matthai 21:43; 23:37, 38) Hlanlio ah Jehovah a tehte cu Israel miphun an rak si nain atu ahcun a hmaanmi Khrihfa pawl hi an si cang.​—Lamkaltu 15:14, 17 rel.

Miphun vialte sin phungchim awk le zultu siter awkah Jesuh nih a zultu kha a dirh hna. (Matthai 10:​7, 11; 24:14; 28:19, 20) Hi chan ṭhalo donghnak caan a simi, atu ah mah rian cu a dih deng cang. Jehovah nih a hmaanmi biaknak ah miphun vialte chung in mi a nuai in a pumhmi hna hi minung tuanbia ah a hmasa bik a si. (Biathlam 7:​9, 10) A hmaanmi Khrihfa hna cu pakhat le pakhat tha i pek awk le i bawmh awkah dirh an si. Vawlei pumpi ah an tuahmi pumhnak i an theihmi Baibal cawnpiaknak cu aa khat dih.​—Hebru 10:24, 25 rel.

 3. Chanthar Jehovah Tehte bu cu zeitindah aa thawk?

1870 hnuah Baibal siangngakchia phu hmete nih saupi a rak i thupmi Baibal biatak kha an hmuh ṭhan. Jesuh nih Khrihfabu kha phungchimnak rian ṭuan awkah a rak dirhmi a si ti kha an hngalh, cucaah vawlei pumpi ah Pennak kong thawngṭha kha an chim. 1931 ah Jehovah Tehte Hna timi min kha an i lak.​—Lamkaltu 1:8; 2:​1, 4; 5:​42 rel.

4. Jehovah Tehte Hna cu zeitindah dirh an si?

Kumzabu pakhatnak ah hmun tampi ah a ummi Khrihfabu hna cu uktu bu thawng in ṭhatnak an hmu. Uktu bu ah aa telmi hna nih Jesuh kha Khrihfabu Lu in an cohlan. (Lamkaltu 16:​4, 5) Tuchan zongah hmuhtonnak a ngeimi Khrihfa upa hna in dirhmi, Uktu Bu thawng in vawlei pumpi i a ummi Jehovah Tehte hna cu ṭhatnak an hmu ve. Annih nih Jehovah Tehte hna zung ṭengnge kha an tlangtlak. Mah zung hna nih Baibal hrambunhmi cauk kha holh phun 600 leng in an leh i an chuah. Cuticun Uktu Bu nih vawleicung pumpi i Khrihfabu 100,000 leng kha Baibal in tha an pek hna i lam an hruai hna. Khrihfabu kip ah sining a tlinhmi pa pawl cu Khrihfa upa asiloah zohkhenhtu rian an ṭuan. Annih nih Pathian tuurun kha dawtnak in an zohkhenh hna.​—1 Piter 5:​2, 3 rel.

Jehovah Tehte hna cu thawngṭha chim awk le zultu siternak rian ṭuan awkah dirh an si. Lamkaltu hna bantukin innkhat hnu innkhat ah phung an chim. (Lamkaltu 20:20) Mah lengah biatak a duh taktakmi hna kha Baibal an cawnpiak hna. Asinain Jehovah Tehte hna cu bu pakhat men an si lo. Dawtnak a ngeimi Pathian chungkhar an si. Annih cu pakhat le pakhat an zawn aa ruatmi unau an si. (2 Thesalon 1:3) Jehovah Tehte Hna cu Pathian lawmhter awk le midang bawmh awkah dirhmi an si caah, vawleicung ah aa nuam bikmi chungkhar an si.​—Salm 33:12; Lamkaltu 20:35 rel.