A ummi cazin ah kal

A ummi cazin ah kal

 Ṭhen 3

Thawngṭha Cu Pathian Sinin A Rami A Si Maw?

Thawngṭha Cu Pathian Sinin A Rami A Si Maw?

1. Baibal cu aho bia dah a si?

Baibal ah mi cu vawleicung ah zungzal in an nung lai timi thawngṭha aa ṭial. (Salm 37:29) Baibal cu cauk hmemi uk 66 in komhmi a si. Mah kha ṭial awkah Pathian nih zumhfekmi pa 40 hrawng kha a rak hman hna. A hmasa bik uk nga kha a luancia kum 3,500 hrawng ah Moses nih a rak ṭial. A donghnak cauk kha a luancia kum 1,900 leng ah lamkaltu Johan nih a rak ṭial. Baibal ṭialtu pawl nih aho ruahnak dah an ṭial? Pathian nih a thiang thlarau hmang in Baibal ṭialtu pawl he pehtlaihnak a tuah. (2 Samuel 23:2) Annih nih anmah ruahnak si loin Pathian ruahnak kha an ṭial. Cucaah Baibal cu Pathian bia a si.​—2 Timote 3:​16; 2 Piter 1:​20, 21 rel.

Baibal Ṭialtu Taktak cu Ahodah a Si? timi Vidio kha zoh

2. Baibal cu Pathian sinin a rami a si tiah zeicah kan ti khawh?

Baibal nih hmailei kong kha a dikthliar in hmaan tein a chimchung khawh caah Pathian sinin a rami a si tiah kan ti khawh. Minung nih cun cutin an chimchung kho lo. (Joshua 23:14) Lianngan bik Pathian lawng nih hmailei kong kha ṭha tein a hngalh khawh.​—Isaiah 42:​9; 46:10 rel.

Pathian sinin a rami cauk cu aa thleidang tuk lai tiah kan zumh bantukin a si taktak. Baibal hi uk tling in holh phun 450 leng in nuai thong hnih leng chuah a si cang. Baibal cu hlanliopi ah an rak ṭialmi a si nain science fimnak he aa tlak. Cun minung 40 nih an ṭialmi a si nain a konglam cu aa ralkah lo. * Mah lengah Baibal ah kan hmuhmi Pathian dawtnak nih minung nunning kha a thlen khawh. Mah vialte ruangah mi nuai tampi nih Baibal cu Pathian Bia a si tiah an zumh.​—1 Thesalon 2:⁠13 rel.

Baibal Cu A Hmaanmi A Si Kha Zeitindah Kan Zumh Khawh? timi video kha zoh

 3. Baibal ah zei kong dah aa ṭial?

Baibal ah aa ṭialmi a biapi bikmi a kong pakhat cu Pathian nih minung caah a ṭha tukmi tinhmi a ngei timi thawngṭha kha a si. Vawleicung paradis nunnak kha minung tuanbia hramthawk ah mi nih zeitindah an rak sungh ti le vawlei hi zeitindah paradis ah a can ṭhan lai timi kong kha Baibal nih a fianter.​—Biathlam 21:​4, 5 rel.

Baibal ah nawlbia, phunglam le ruahnak cheuhnak zong a um. Pathian nih minung kha zeitindah a pehtlaih hna timi kong zong a um, mah nih Pathian cu zei bantuk Pathian dah a si ti kha a langhter. Cucaah Baibal nih Pathian kong hngalh awk aan bawmh khawh. Cun Pathian hawi zeitindah si khawh a si ti zong a fianter.​—Salm 19:​7, 11; Jeim 2:​23; 4:8 rel.

4. Baibal kong hngalhthiam awkah zeinihdah aan bawmh lai?

Mah brochure nih Baibal kong hngalhthiam awkah aan bawmh lai. Jesuh nih Baibal caang cangkhat a chim fate “Cathiang sullam” kha a fianter. Mah brochure zong nih Jesuh bantukin a fianter ve.​—Luka 24:27, 45 rel.

Pathian sinin a rami thawngṭha cu thawngpang dang nakin mi lung a la deuh. Asinain mah thawngṭha kha mi cheukhat nih ngaih an duh lo i cheukhat cu an thin hmanh a hung. Mah hna ruangah na lungdong hlah. Zeicahtiah zungzal nunnak ruahchannak cu Pathian na hngalhnak cungah aa hngatmi a si.​—Johan 17:3 rel.

 

^ cat. 3 Baibal Cawnpiakmi Taktak Cu Zeidah A Si? timi cauk cahmai 20 zoh.