A ummi cazin ah kal

A ummi cazin ah kal

 Ṭhen 15

Zeicah Baibal Na Cawn Zungzal Awk A Si?

Zeicah Baibal Na Cawn Zungzal Awk A Si?

1. Baibal na cawn zungzalmi in zei ṭhatnak dah na hmuh lai?

Hi cauk i aa ṭialmi a hrampi Baibal cawnpiaknak kong na ruahnak nih Jehovah na dawtnak a fehter lai ti cu a fiang ko. Mah dawtnak fehter awkah i zuam zungzal a hau. (1 Piter 2:2) Zungzal nunnak ruahchannak cu Baibal na hlathlai zungzalnak thawng in Pathian na naih maw, naih lo timi cungah aa hngat.​—Johan 17:3; Judas 21 rel.

Pathian kong na hun hngalh deuh tikah na zumhnak a ṭhawng deuh ve lai. Zumhnak nih Pathian lungton awkah aan bawmh lai. (Hebru 11:​1, 6) Mah nih sualnak i ngaihchih awk le na nunning thlen awk aan forh lai.​—Lamkaltu 3:19 rel.

2. Pathian kong na hngalhmi nih midang kha zeitindah a ṭhathnemh hna lai?

Jehovah he pehtlaihnak ṭha na ngei kho

Mikip nih thawngpang ṭha kha chim kan duh, cucaah Pathian kong na hngalhmi kha midang sinah chim na duh ko lai. Baibal kha na hlathlai zungzal ahcun Jehovah le thawngṭha na zumhnak kong fianter awkah zeitindah Baibal hman ding a si ti kha na hngalh lai.​—Rom 10:13-​15 rel.

Mi tampi nih thawngṭha chim kha an hawile le an rualchan sinah an thawk. Cutin chim tikah fim a hau. Nan biaknak a palh tiah ti loin Pathian nih a kan kamhmi kong tu chim awk a si. Kan chimmi nakin zaangfahnak kan langhtermi nih mi lung a suk deuh tawn ti kha philh lo awk a si.​—2 Timote 2:​24, 25 rel.

3. Pathian he zei bantuk pehtlaihnak dah ngeih khawh a si?

Baibal hlathlainak nih thlaraulei ṭhancho awk aan bawmh lai. A donghnak ah, Jehovah he pehtlaihnak ṭha nan ngei lai i Jehovah chungkhar ah naa tel kho lai.​—2 Korin 6:​18 rel.

 4. Zeitindah na ṭhancho khawh chin lai?

Baibal na hlathlai zungzal ahcun thlaraulei ah na ṭhangcho lai. (Hebru 5:​13, 14) Baibal Cawnpiakmi Taktak Cu Zeidah A Si? timi cauk in Baibal cawn na duh kha Jehovah Tehte pakhatkhat kha chim hna. Baibal kong na hngalh deuhdeuh ah na nunnak ah khua awng na tong deuhdeuh ve lai.​—Salm 1:​1-3; 73:27, 28 rel.

Thawngṭha cu aa nuammi Pathian, Jehovah sinin a rami a si. Jehovah a biami hna he nan i komh ahcun Jehovah he nan i naih lai. (Hebru 10:24, 25) Jehovah lung ton awkah naa zuam zungzal ahcun nunnak taktak a simi zungzal nunnak kha na hmuh lai. Pathian naih cu na tuah khawhmi thil lakah a ṭha bikmi a si.​—Titas 1:1-4 rel.