A ummi cazin ah kal

A ummi cazin ah kal

 ṬHEN 8

Phungchimnak ah Hmanmi Hriamnam​​—⁠Vawleicung pumpi Phungchimnak caah Cauk Chuahnak

Phungchimnak ah Hmanmi Hriamnam​​—⁠Vawleicung pumpi Phungchimnak caah Cauk Chuahnak

HI ṬHEN AA TINHMI

Phun kip, ram kip le holh kip chung i mi pakhat cio kha cawnpiak awkah a herhmi hriamnam kha Jehovah nih a kan timhpiak zungzal

1, 2. (a) Kumzabu pakhatnak ah Rom Empire chungah zeitindah thawngṭha a karh? (b) Tuchan ah Jehovah nih a kan bawmh ti kha zeinihdah a langhter? (“ Holh Phun 670 Lengin Thawngṭha Karhternak” timi rinli kulh zoh.)

AD 33, Pentekos ni ah Jerusalem ah a rami khual hna cu an khuaruah a har tuk. Zeicah? Galili mi hna nih ram dang holh hna kha nal tein an chim khawh caah a si i an chimmi bia nih a ngaimi hna kha an lung a suk tuk hna. Mah zultu hna cu khuaruahhar lam in holh a phunphun chim khawhnak laksawng an hmu, mah nih Pathian nih a bawmh hna ti kha a langhter. (Lamkaltu 2:1-8, 12, 15-17 rel.) Mah ni ah an chimmi thawngṭha cu miphun kip sinah a phan i a hnuah Rom Empire chungah a karh.—Kol. 1:23.

2 Tuchan Pathian salle cu khuaruahhar lam in holh a phunphun an chim kho lo. Asinain kumzabu pakhatnak lio i an hmanmi holh phun nakin a tam deuhmi, holh phun 670 lengin Pennak kong thawngṭha kha an leh. (Lam. 2:9-11) Pathian miphun nih holh phun tampi in cauk tampi an chuah caah Pennak kong thawngṭha cu vawleicung a kikam tiang a phan cang. * Mah nih phungchim rian hruai awkah Jehovah nih Siangpahrang Jesuh Khrih a hman ti kha fiang tein a langhter. (Matt. 28:19, 20) A luancia kum 100 leng chungah mah rian ṭuan khawh awkah kan rak hmanmi hriamnam cheukhat kong kha atu kan i ruah lai. Kan i ruah lioah Siangpahrang nih mi pakhat cio cung siaherhnak ngeih awk a kan cawnpiakning le Pathian Bia a cawnpiaktu si awkah a kan forhning kha hngalh i zuam.—2 Tim. 2:2.

Siangpahrang nih a Salle kha Biatak Thlaici Tuh awkah a Timhtuah hna

3. Phungchimnak ah zeicah hriamnam a phunphun kan hman?

3 Jesuh nih “Pennak kong” kha thlaici he a tahchunh i minung lungthin kha vawlei he a tahchunh. (Matt. 13:18, 19) Dum ngeitu nih vawlei a nem i thlaici tuh khawh a si nakhnga timhtuah awkah hriamnam a phunphun a hman, cu bantukin Jehovah miphun nih mi tampi kha Pennak kong an cohlan khawh nakhnga an lungthin timhtuah awkah hriamnam a phunphun an hman ve. Hriamnam cheukhat cu caan  caankhat chung lawng hman khawh a rak si. Asinain cauk le mekazin ti bantuk tu cu hman khawh a si zungzal. A hmasa ṭhen ah kan i ruahmi mi tampi sin phanh khawh awkah hmanmi thil hna he i lo loin hi ṭhen ah kan i ruah laimi hriamnam vialte nih Pennak thawngthanhtu hna kha mi he hmaitonh in biaruah awkah a bawmh hna.—Lam. 5:42; 17:2, 3.

Canada, Toronto ah awkhumhmi kuang le aw chuahnak thilri pawl an ser lio

4, 5. Awkhumhmi kuang cu zeitindah hman a si, asinain mah nih zeidah a tlam a tlinter khawh lo?

4 Awkhumhmi Phungchimnak. 1930 hnu le 1940 hnuah thawngthanhtu hna nih kut in put khawhmi kuang kha an hman i mi kha Baibal phungchimmi awkhumhmi an rak awnpiak hna. Mah awkhumhmi hna cu minit panga hmanh a sau lo. Awkhumhmi cheukhat kha “Thumkomh pathian,” “Hell hmete” le “Pennak” ti bantuk min tawi tete an pek hna. Mah awkhumhmi hna kha zeitindah an rak hman? 1930 ah United States ah tipil a ingmi unaupa Clayton Woodworth Junior nih hitin a chim: “Suitcase he aa lomi kuang hmete, spring le sawhnak ṭhim kha kaa put i awkhumhmi awn khawh awkah mah ṭhim kha kuang i a kite ah sawh a hau. Mi innka hram ka phanh in kuang kha ka awn, ṭhim kha amahle hmun ah ka sawh i innka ka kingh. Inn-ngeitu nih innka a awn tikah ‘A biapimi a kong pakhat kaa put i ngaihter kaan duh’ tiah ka ti.” Zeitindah an lehrulh? Unaupa Woodworth nih hitin a chim: “Inn-ngeitu tam deuh nih cun ṭha tein an ngaih. Asinain a caan ah innka an ka khar kanh. Awkhumhmi kuang a zuarmi ah an ka ruah caan zong a um.”

1940 a phanh tikah awkhumhmi phungchimnak 90 leng le a dang awkhumhmi nuai khat leng a um cang

5 1940 a phanh tikah awkhumhmi phungchimnak 90 leng le a dang awkhumhmi nuai khat leng a um cang. Mah lio caan ah Britain ah hmaikal a ṭuan i a hnuah Uktu Bu chungtel  a hung simi John E. Barr nih hitin a chim: “1936 in 1945 chungah awkhumhmi kuang cu ka hawi a si zungzal. Mah lioah awkhumhmi kuang a um lo ahcun ka um thiam lo. Mi innka ah Unaupa Rutherford aw ka theihmi nih thazaang a ka pek tuk i ka pawngah a um taktakmi bantukin ka ruah. Asinain awkhumhmi kuang nih phungchimnak rian ah aa tel vemi, mi lungthin chung lut lakin cawnpiak ding timi kha tlam a tlinter kho lo.”

6, 7. (a) Tehte khaannak card hman a ṭhatnak le ri a ngeihnak cu zeidah an si? (b) Jehovah nih zeiti lam in dah ‘kan kaa ah a bia a chiah’?

6 Tehte khaannak card. 1933 thawkin thawngthanhtu hna cu innkhat hnu innkhat phungchimnak ah tehte khaannak card hman awkah forh an si. Mah card cu report peknak ah kan hmanmi catlap tia hrawng a si. Mah ah Baibal kong tawite le inn-ngeitu nih a hmuh khawhmi Baibal hrambunhmi cauk cazin aa ṭial. Thawngthanhtu nih mah card kha inn-ngeitu an pek hna i an relter hna. A hnuah Puerto Rico le Argentina ah missionary a ṭuanmi unaunu Lilian Kammerud nih “tehte khaannak card hman cu ka duh tuk” tiah a ti. Zeicah? Hitin a chim: “Kan dihlak in ṭha tein phungchim kan thiam lo. Asinain mah card nih mi chawnhbiakning thiam awkah a ka bawmh.”

Tehte khaannak card (Italy holh)

7 1918 ah tipil a ingmi Unaupa David Rush nih hitin a chim: “Ṭha tein phung a chim khomi hi tlawmte lawng an si caah tehte khaannak card cu unau pawl caah bawmtu taktak a si.” Asinain mah hriamnam cu ri a ngei. Unaupa Rush nih hitin a chim: “A caan ah mi nih holh a thiam lomi ah an kan ruah. A ngaingai ti ahcun holh a thiam lomi bantuk kan si taktak. Asinain Jehovah nih a rianṭuantu in mipi sin phungchim awkah a kan timhtuahmi a si. Mah hnu tlawmpal ah mi inn ah Baibal hman awk a kan cawnpiaknak thawngin kan kaa ah a bia a chiah. 1943 ah thawkmi Phungchim Ning Cawnnak in cutin a kan cawnpiak.”—Jeremiah 1:6-9 rel.

8. Zeitindah Khrih cawnpiaknak kha na cohlan khawh?

8 Cauk. 1914 thawkin Jehovah miphun nih Baibal kong a fiantermi cauk phun 100 leng an chuah. Cauk cheukhat cu hmualngei tein phungchim khawh awkah thawngthanhtu pawl cawnpiaknak caah chuahmi a si. Thawngthanhtu a sinak kum 70 hrawng a si cangmi Denmark i unaunu Anna Larsen nih hitin a chim: “Phungchim Ning Cawnnak le mah cawnnak ah hmanmi cauk pawl in hmualngei tein phung a chim khomi thawngthanhtu si awkah Jehovah nih a kan bawmh. Mah cauk hna lakah a pakhatnak cu 1945 ah chuahmi Pennak Thawngthanhtu hna caah Theocratic Bawmtu timi a si kha kaa cinken rih. Mah hnu, 1946 ah “Thilṭha Phun Zakip Tuah Khawh Awkah Thilthuam” timi kha an chuah. Atu ah 2001 ah chuahmi Theocratic Rianṭuannak Sianginn Cawnnak In Ṭhathnemnak Hmu timi cauk kan ngei.” Phungchim Ning Cawnnak le mah ah hmanmi cauk hna cu phungchim rian ṭuan khawh awkah Jehovah nih a kan bawmhnak a biapimi lam an si. (2 Kor. 3:5, 6) Phungchim Ning Cawnnak ah na min na pe cang maw? Zarh fatin pumhnak ah Rianṭuannak Sianginn cauk kha i put in tinṭan tlaitu nih mah cauk a cherhchan tikah na zoh ve maw? Cutin na tuah ahcun phungchim thiam deuh awkah Khrih cawnpiaknak na cohlan a si lai.—2 Kor. 9:6; 2 Tim. 2:15.

9, 10. Biatak thlaici tuhnak le ti toihnak ah cauk cu zeitindah aa tel ve?

 9 Jehovah nih a hrampi Baibal cawnpiaknak fianter awkah a kan bawmmi cauk pawl kha a bupi hmangin a kan chuahpiaknak thawng zongin a kan bawmh. Zungzal Nunnak a Pemi Biatak timi cauk cu hmual a ngei tukmi cauk a si. Mah cauk cu 1968 ah a voikhatnak an chuah i ṭhatnak a chuak colh. 1968, November thla Pennak Rianṭuannak nih hitin a ti: “Biatak cauk cu a kan cahmi an tam tuk caah September thla chungah Brooklyn i Bupi sehzung ah zan i rian a ṭuan dingmi phu pakhat kan dirh.” Hitin a ti chap: “August thla chung i voikhat ah Biatak cauk a kan cahmi cu kan chuahmi nakin uk nuai khat le cheu leng a tam deuh.” 1982 a phanh tikah holh phun 116 in uk nuai 100 leng chuah a si cang. 1968 in 1982 tiang, kum 14 chungah Biatak cauk thawngin mi nuai khat leng cu Pennak thawngthanhtu an hung si. *

10 Baibal cawnpiaknak caah bawmtu a simi Baibal Cawnpiakmi Taktak Cu Zeidah A Si? timi cauk kha 2005 ah an chuah. Atu ah mah cauk kha holh phun 256 in uk nuai 200 hrawng chuah a si cang. Zei ṭhatnak dah a chuak? 2005 in 2012 tiang, kum sarih chungah mi nuai 1.2 hrawng cu thawngthanhtu an hung si. Mah caan chungah kanmah he Baibal a cawngmi cu nuai 6 in nuai 8.7 leng tiang an karh. Jehovah nih Pennak biatak thlaici kan tuhmi le ti kan toihmi kha thluachuah a pek ti cu a fiang ko.—1 Korin 3:6, 7 rel.

11, 12. Cherhchanmi Baibal cacang ningin kan mekazin pawl cu ahote caah dah chuah a si?

11 Mekazin. A hramthawk ah cun Vennak Innsang cu vancung ruahchannak a ngeimi “tuurun hmete” hna caah chuahmi a rak si. (Luka 12:32; Heb. 3:1) 1919, October 1 ah Jehovah bupi nih mipi caah a dang mekazin pakhat an chuah ṭhan. Mah mekazin kha Baibal Siangngakchia hna le mipi nih an duh tuk caah kum tampi chung Vennak Innsang nakin tam deuh chuah a rak si. Mah mekazin kha Sui Chan tiah an rak auh. 1937 ah Hnemtu tiah an thlen i 1946 ah I Hlau! tiah an thlen ṭhan.

12 Kum tampi chungah Vennak Innsang le I Hlau! cu an ṭialning aa thleng lengmang nain aa tinhnak cu aa thleng bal lo, mah cu Pathian Pennak kong thanh le Baibal an zumh nakhnga bawmh kha a si. Atu ah Vennak Innsang kha cawn awk cauk le mipi pek awk cauk tiin chuah a si. Cawn awk cauk cu “sal hawi” a simi “tuurun hmete” le “tuudang” caah  chuahmi a si. * (Matt. 24:45; Johan 10:16) Mipi pek awk cauk cu Baibal le Pathian a upat ko nain biatak a hngal rih lomi hna caah a hleiin chuahmi a si. (Lam. 13:16) I Hlau! cu Baibal le a hmaanmi Pathian, Jehovah kong a hngal lomi hna caah chuahmi a si.—Lam. 17:22, 23.

13. Kan mekazin he aa tlaiin zei chingchiah awk dah na hmuh? (“ Vawleicung Pumpi Cauk Chuahmi Cazin” kha i ruah u.)

13 2014 thawkin thla fatin I Hlau! nuai 44 leng le Vennak Innsang nuai 46 hrawng chuah a si. I Hlau! kha holh phun 100 hrawngin le Vennak Innsang kha holh phun 200 lengin leh a si. Cucaah vawleicung ah holh phun tam bik in lehmi le chuahmi mekazin an si. Mah cu chingchiah awk tlak a si nain kan khuaruah a har awk cu a si lo. Zeicatiah mah mekazin ah Jesuh nih vawleicung khuazakip ah chim a si lai a timi thawngṭha aa tel caah a si.—Matt. 24:14.

14. Cauk chuahnak ah hmanmi bu min an thlenmi cu zeicah aa tlak, mah min thar he aa tlakin Pathian salle nih zeidah an tuah?

14 Baibal. 1896 ah Unaupa Russell le a hawile nih cauk chuahnak ah an hmanmi bu min kha Baibal timi biafang telh awkah Vennak Innsang Baibal le Cazual Bu tiin an rak thlen. Pennak kong thawngṭha karhternak ah Baibal cu hman bikmi hriamnam a si zungzal caah mah an thlenmi cu aa tlak taktak. (Luka 24:27) Mah min thar he aa tlakin Pathian salle nih Baibal chuahnak le relnak kha lungtho tein tha an pek. Tahchunhnak ah, 1926 ah The Emphatic Diaglott timi Baibal kha bupi seh in chuah a si, mah cu Benjamin Wilson nih a chuahmi Khrihfa Greek Baibal a si. 1942 thawkin King James Version uktling kha uk 700,000 hrawng chuah a si. Kum hnih a rauh hnuah American Standard Version kha chuah a si, mah ah Jehovah min voi 6,823 aa tel. 1950 a phanh tikah uk 250,000 leng mi kan pek cang hna.

15, 16. (a) Vawlei Thar Lehnak Baibal he aa tlaiin zei kha dah na sunsak? (“ Baibal Lehnak A Ṭhangcho” timi rinli kulh kha i ruah u.) (b) Jehovah bia nih zeitindah na lung aan suk khawh?

15 1950 ah Vawlei Thar Lehnak Khrihfa Greek Baibal kha chuah a si. 1961 ah Vawlei Thar Lehnak Baibal uktling in chuah a si. Mah Baibal ah Jehovah min kha a hramthawk Hebru Baibal i aa telnak paohah an telh ṭhannak thawngin Jehovah kha an thangṭhat. Pathian min cu a hramthawk Khrihfa Greek Baibal zongah voi 237 aa tel. Mah Baibal cu a hmaanmi le rel a fawimi a si nakhnga voi tampi an remh ṭhan lengmang i hmanung bik an remhmi cu 2013 ah a si. 2013 ah Vawlei Thar Lehnak Baibal uktling asiloah a cheubang kha holh phun 121 in uk nuai 201 leng chuah a si.

16 Vawlei Thar Lehnak Baibal kha anmah holh tein an rel tikah cheukhat nih zeitindah an lehrulh? Nepal mi pa pakhat nih hitin a chim: “Nepal Baibal hlun cu hlanlio holh in ṭial a si caah mi tampi nih hngalhthiam awkah kan i harh tuk. Asinain Vawlei Thar Lehnak Baibal cu nifa hmanmi holh in ṭial a si caah ṭha tein kan hngalhthiam khawh cang.” Central African Republic i nu pakhat nih Sango holh in lehmi Baibal a rel tikah a mitthli a tla i “mah hi pei ka lung a ka sumi holh a si cu” tiah a ti. Mah minu bantukin kannih zong Baibal nifate kan  relnak thawngin Jehovah bia nih kan lung a suk khawh ve.—Salm 1:2; Matt. 22:36, 37.

Kan Hmuhmi Hriamnam le Cawnpiaknak caah i Lawmhnak

17. Na hmuhmi hriamnam le cawnpiaknak na sunsak kha zeitindah na langhter khawh, cutin na tuah ahcun zei ṭhatnak dah na hmuh lai?

17 Siangpahrang Jesuh Khrih nih a kan pekmi hriamnam le cawnpiaknak kha na sunsak maw? Pathian bupi nih an chuahmi cauk kha a caan pe in na rel maw, mah kha midang bawmhnak ah tah na hmang maw? Cutin na tuah ahcun 1914, October 4 ah tipil a ingmi Unaunu Opal Betler nih a chim bantukin na chim khawh ve lai. Hitin a chim: “Kum tampi chung ka vapa [Edward] he awkhumhmi kuang le tehte khaannak card kha kan rak hman. Cauk, cauk hmemi le mekazin pawl hmangin innkhat hnu innkhat ah phung kan rak chim. Campaign tuahnak, artlang in kalnak le cazual phawtnak ah kan rak i tel. A hnuah, lungthawhnak a ngeimi lennolh tuah awk le Baibal cawnpiaknak tuah awkah cawnpiak kan si. Kan rian a tam ko nain kan i nuam.” Jesuh nih a uknak tangah a ummi hna cu thlaici tuhnak le zunnak ah an rian a tam lai i hmunkhat ah an i nuam lai tiah bia aa kam. Mah biakam a hmaan kha Opal bantukin mi tampi nih an hmuh.—Johan 4:35, 36 rel.

18. Zei tinvo sung dah kan ngeih?

18 Siangpahrang sal a si rih lomi mi tampi nih Pathian miphun cu “fimthiamnak zeihmanh a ngei lomi, mi sawsawh menmen an si” tiah an ruah men lai. (Lam. 4:13) Asinain ruathmanh. Siangpahrang nih mi sawhsawh a simi annih kha a ṭha bikin cauk a chuah khotu si awkah a bawmh hna caah vawleicung ah tam bikin lehmi le chuahmi cauk cheukhat kha an chuah khawh. A biapi deuhmi cu miphun kip sinah thawngṭha a phanh nakhnga mah hriamnam pawl kha hman awkah Siangpahrang nih a kan cawnpiak i a kan forh. Biatak thlaici tuhnak le zunnak rian ah Khrih he kan ṭuanṭi khawhmi hi tinvo sung taktak a si.

^ cat. 2 A luancia kum hra chung lawngah Jehovah miphun nih Baibal hrambunhmi cauk nuai 20,000 leng an chuah. Mah lengah kan Web site a simi jw.org kha vawleicung pumpi i Internet a hmangmi mi nuai 2,700 leng nih an zoh khawh cang.

^ cat. 9 Baibal biatak cawnpiak awkah thawngthanhtu pawl a bawmmi a dang cauk cheukhat cu Pathian Tingtang (1921 ah chuah a si), “Pathian cu Zumhawktlak a Si” (1946 ah chuah a si), Vawleicung Paradis ah Zungzal Na Nung Kho (1982 ah chuah a si), Zungzal Nunnak ah a Hruaimi Hngalhnak (1995 ah chuah a si) hna hi an si.

^ cat. 12 “Sal hawi” cu ahote dah an si timi hngalhthiamning thar kha 2013, July 15, Vennak Innsang, cahmai 23, catlangbu 13 ah zoh.