A ummi cazin ah kal

A ummi cazin ah kal

 ṬHEN 16

Khuachia Kha Doh U

Khuachia Kha Doh U

“Khuachia kha doh u law aan zamtak ko hna lai.”—JEIM 4:7.

1, 2. Satan le khuachia pawl kong he aa tlaiin zeidah kan hngalh a herh?

JEHOVAH i vawlei thar nunnak cu a ṭha tuk cang lai. Pathian nih kan caah aa tinhmi ningin kan nung kho cang lai. Asinain atu ahcun Satan le a khuachia pawl nih an ukmi vawlei ah kan nung. (2 Korin 4:4) Kan mit in cun kan hmu kho hna lo nain annih cu a um taktakmi le a ṭhawng tukmi an si.

2 Hi ṭhen ah Jehovah he zeitindah naih tein kan um khawh ti le Satan kut in zeitindah kan i huhphenh khawh ti kha kan i ruah hna lai. Jehovah nih kaan bawmh hna lai tiah bia aa kam. Asinain Satan le khuachia pawl nih kanmah hlen awk le doh awkah an hmanmi lam hna kha kan hngalh a hau.

‘A Hukmi Chiandeih Bangin’

3. Khuachia nih kan cungah zeidah tuah a duh?

3 Mi nih Jehovah an biakmi cu anmah ṭhatnak caah a si i a har tukmi thil hna an ton ahcun Jehovah kha an kaltak ko lai tiah Satan nih a ti. (Job 2:4, 5 rel.) Mi pakhat nih Jehovah kong cawn a duh kha a langhter tikah Satan le khuachia nih an hmuh i kham awkah an i zuam. Mi pakhat nih Jehovah sinah aa pumpe i tipil a in tikah an thin a hung. Baibal nih Khuachia cu ‘seh awk kawl ah, chiandeih bangin a vak cuahmahmi’ he a tahchunh. (1 Peter 5:8) Jehovah he kan i pehtlaihnak kha Satan nih hrawh a duh.—Salm 7:1, 2; 2 Timote 3:12.

Jehovah sin kan i pumpek tikah Satan cu a thin a hung

4, 5. (a) Satan nih zeidah a tuah khawh lo? (b) “Khuachia kha doh u” ti cu zei sullam dah a si?

 4 Asinain Satan le a khuachia kha kan ṭih hna awk a si lo. Kan cungah an tuah khawhmi he aa tlaiin Jehovah nih ri a serpiak hna. Jehovah nih a hmaanmi Khrihfa a simi, “mibu nganpi” cu ‘harnak nganpi’ in an luat lai tiah bia aa kam. (Biathlam 7:9, 14) Jehovah nih a miphun kha a huhphenh hna caah a biakam tlin lo awkah Satan nih zeihmanh a tuah kho lo.

5 Jehovah he naih tein kan um ahcun amah he kan i pehtlaihnak kha Satan nih a hrawk kho lai lo. Baibal  nih hitin bia a kan kamh: “Amah sinah nan um chung cu BAWIPA cu nan sinah a um.” (2 Chanrelnak 15:2; 1 Korin 10:13 rel.) Abel, Enok, Noah, Sarah le Moses ti bantuk hlanlio zumhfekmi tampi nih Jehovah he naih tein an umnak thawngin Satan kha an doh. (Hebru 11:4-40) Kannih zong cutin kan tuah khawh ve. Baibal nih hitin bia a kan kamh: “Khuachia kha doh u law aan zamtak ko hna lai.”—Jeim 4:7.

“Kan Dohmi”

6. Satan nih zeitindah a kan doh?

6 Satan nih a tuah khawhmi he aa tlaiin Jehovah nih ri a ka serpiak ti kha a hngalh ko bu hmanhin Pathian he kan i pehtlaihnak derter awkah zeipaoh tuah aa zuam rih ko lai. Tuchan ah Satan nih lam tampi hmangin a kan doh i kum thong tampi chung lam a phunphun a hman. A hmanmi lam cheukhat cu zeidah an si?

7. Satan nih Jehovah miphun kha zeicah a doh hna?

7 Lamkaltu Johan nih hitin a ṭial: “Vawlei hi a pumpi in miṭhalo pa kut tangah a um.” (1 Johan 5:19) Satan nih hi vawlei ṭhalo hi a uk i Jehovah salle zong kha uk a duh hna. (Mikah 4:1; Johan 15:19; Biathlam 12:12, 17) Satan nih caan tawite lawng ka ngei cang ti kha a hngalh caah Pathian cungah zumhawktlak loin kan um nakhnga pakhat cio kha fakpi in tukforh awkah aa zuam. A caan ah hlangfang in a kan doh i a caan ahcun fimzer ngaiin a kan doh.

8. Khrihfa pakhat cio nih zeidah kan hngalh a herh?

8 Efesa 6:12 ah hitin kan hmuh: “Kan dohmi hna cu . . . vancung khua i a ummi thlarau sual ṭhawnnak hna . . . hi an si.” Khrihfa pakhat cio nih Satan le khuachia pawl kha kan doh hna. Jehovah sinah aa pumpemi vialte cu mah dohnak ah kan i tel ti kha kan hngalh a  hau. Lamkaltu Paul nih Efesa Khrihfabu sin a cakuat ah “fek tein” um awkah voithum tiang a forh hna.—Efesa 6:11, 13, 14.

9. Satan le khuachia pawl nih kan cungah zei tuah awkah dah an i zuam?

9 Satan le khuachia pawl nih lam a phunphun hmangin kanmah hlen awkah an i zuam. Satan dohnak lamkhat kha kan tei khawhnak men in lamdang zong kan tei khawh lai tinak a si lo. Satan nih kanmah foih awkah zei rap dah ka hman lai ti a hngalh nakhnga kan derthawmnak kha hngalh aa zuam. Asinain Baibal nih Satan hmanmi rap he aa tlaiin a kan cawnpiak caah kan i foih awk a si lo. (2 Korin 2:11; A Donghnak I Fianternak 31 ah zoh.) Mah lak i pakhat cu khuachia thiamnak a si.

Khuachia Kha Hrial Hna

10. (a) Khuachia thiamnak timi cu zeidah a si? (b) Jehovah nih khuachia thiamnak kha zeitindah a hmuh?

10 Khuachia thiamnak ah kutṭial zoh, hnam tuah, camh thiam le thitlawn thiam ti bantuk kokek thil a lonhmi kha hmangin khuachia he pehtlaihnak tuah hna aa tel. Baibal nih khuachia thiamnak cu “fihnung” a si tiah a ti. Cucaah khuachia thiamnak ah i tel buin Jehovah biak khawh a si lo. (Deuteronomi 18:10-12; Biathlam 21:8) Khrihfa a simi nih cun khuachia thiamnak ah aa telmi vialte kha kan hrial a hau.—Rom 12:9.

11. Kokek thil a lonhmi nih kan lungthin a lak ahcun khoika lei ah dah a kan hruai khawh?

11 Kokek thil a lonhmi hna nih kan lungthin a lak ahcun khuachia thiamnak ah fawi tein ka leem khawh hna lai ti kha Satan nih a hngalh. Khuachia thiamnak ah aa telmi zei bantuk thil paoh nih Jehovah he kan i pehtlaihnak kha a hrawh khawh.

 Satan nih Kanmah Hlen awkah aa Zuam

12. Satan nih zeitindah kan ruahnak cungah huham ngeih a duh?

12 Satan nih minung ruahnak kha buaibaiter awkah aa zuam. Duhsah duhsah in lunghrinnak a ngeihter hna i ‘thilṭha cu thilṭhalo an ti i thilṭhalo cu thilṭha’ tiah a ruahter hna. (Isaiah 5:20) Baibal cawnpiaknak cu san a tlai lo i Pathian phunglam hna kan zulh lo tikah kan i nuam deuh lai timi ruahnak kha Satan nih a hlorh.

13. Satan nih lunghrinnak a um nakhnga zeitindah aa zuam?

13 Lunghrinnak karhternak cu Satan hmanmi lakah a hlawh a tling tukmi lam pakhat a si ve. Mah lam hi a hmannak a saupi cang. Eden dum ah Evi kha hitin a halnak thawngin lunghrinnak a ngeihter: “Dum chung i a ummi thingthei hi a zeihmanh nan ei lai lo tiah Pathian nih aan ti taktak hna maw?” (Genesis 3:1) A hnuah, Job chan zongah Satan nih Jehovah kha vancungmi pawl hmaiah hitin a hal: “Job nih hin Pathian cu a lak in maw a ṭih?” (Job 1:9) Jesuh tipil a in hnuah Satan nih hitin a zuamcawh: “Nangmah cu Pathian Fapa na si ahcun, hi lung hi changreu ah canter hna ngat.”—Matthai 4:3.

14. Khuachia thiamnak cu ṭih a nung taktak hnga maw tiah mi nih lunghrinnak an ngeih nakhnga Satan nih zeitindah a tuah?

14 Tuchan zongah Satan nih lunghrinnak a um nakhnga aa zuam. Khuachia thiamnak cheukhat kha a palh lomi a lawhternak thawngin khuachia thiamnak cu a palh taktak hnga maw tiah mi nih lunghrinnak an ngeih nakhnga aa zuam. Khrihfa cheukhat hmanh nih khuachia thiamnak ṭih a nunnak kha an hun hmu ti men lai lo. (2 Korin 11:3) Cu a si ah mahle mah i kilven awkah zeidah kan tuah khawh? Satan  hlenthawinak nih a kan hleng kho lo ti kha zeitindah kan hngalh khawh? Hlen kan si khawhnak thil sining pahnih kha zohhmanh hna u sih. Mah cu nuamhsaihnak le siithlopnak a si.

Satan nih Kan Lung Duhnak kha a Hman

15. Nuamhsaihnak in khuachia he zeitindah kan i pehtlaih khawh?

15 Tuchan ah baisikup, video, TV, computer game le Internet hna ah khuachia, khuachia thiamnak le kokek thil a lonhmi kong hna kha an langhter. Mi tampi nih mah thil hna kha zoh a nuammi le ṭih a nung lomi in an hmuh. Mi pakhat cu chuah nithla tuak in hmailei kong chimchungnak, kutṭial zohnak, tarot card le thlalang fim ti bantuk thil hna a hmannak thawngin khuachia thiamnak ah a hun i tel kho. Satan nih khuachia thiamnak ṭih a nunnak kha a thuh i khuaruahhar a simi, lungthawh awk ngai a simi le a nuammi lawhter dingin aa zuam. Cucaah mi pakhat nih khuachia thiamnak ah kan i tel lo paohah cun khuachia asiloah kokek thil a lonhmi kong zoh tham cu ṭih a nung lo ti hmanhin a ruah khawh men. Cu bantuk ruahnak cu zeicah ṭih a nun?—1 Korin 10:12.

16. Kokek thil a lonhmi kong a langhtermi nuamhsaihnak hna kha zeicah kan hrial awk a si?

16 Satan le khuachia nih kan ruahnak kha an hngal kho lo. Asinain nuamhsaihnak kan i thimmi telin kanmah le kan chungkhar caah kan tuahmi thimnak hna kha an zohnak thawngin kan duhnak le kan ruahnak hna kha an hngalh khawh. Khuavang a ngeimi, camh a thiammi, khuachia aa hrolhmi, hnam a ngeimi, thidawp a hmangmi ti bantuk kong a langhtermi baisikup, music asiloah cauk hna kha kan i thim ahcun Satan le khuachia nih kan kong hngalh an duh ti kha an hngalh  lai. Mah tikah khuachia thiamnak ah kan i tel chinchin nakhnga an i zuam lai.—Galati 6:7 rel.

17. Satan nih ngandam kan duhnak cungah zeitindah caanṭha aa lak khawh?

17 Satan nih ngandam kan duhnak kha hmangin caanṭha aa lak khawh. Tuchan ah mi tampi cu an ngandamnak a ṭha lo. Lam a phunphun in sii an i thlop ko nain damnak an hmu hlei lo. (Marka 5:25, 26) Mah tikah lungdongh in zeiti lam poahin thlop an duh men lai. Asinain Khrihfa nih cun “khuachia thiamnak” aa telmi siithlopning hna kha i thim lo awkah kan i ralrin a hau.—Isaiah 1:13, NW.

Na zawt tikah Jehovah kha i bochan

18. Khrihfa pakhat nih cun zei bantuk siithlopning hna dah a hrial awk a si?

 18 Hlanlio Israel chan ah “khuachia thiamnak” a hmangmi cheukhat an rak um. Jehovah nih hitin a ti hna: “Thlacam in nan kut nan hler tikah kaan zoh duh hna lai lo. Zeizat tam hmanhin cam u law kaan ngaihpiak hna lai lo.” (Isaiah 1:15) Jehovah nih an thlacamnak kha a ngaih hmanh a ngaihpiak duh ti hna lo! Jehovah he kan i pehtlaihnak a rawhter khomi le Pathian bawmhnak a kan sunghter khomi zeithil hmanh tuah kan duh lo. A hleiin kan zawt tikah tuah kan duh lo. (Salm 41:3) Cucaah siithlopning pakhat kha kan cohlan hlanah khuachia thiamnak asiloah kokek thil a lonhmi he pehtlaihnak a ngei maw, ngei lo ti kha kan dothlat hmasa awk a si. (Matthai 6:13) Pehtlaihnak a ngeih ahcun kan hrial awk a si.—A Donghnak I Fianternak 32 ah zoh.

Khuachia Kong Tuanbia

19. Mi tampi nih an ṭih nakhnga Satan nih zeitindah a tuah?

19 Mi cheukhat nih Satan le khuachia cu a um taktakmi an si lo tiah an ruah. Asinain cheukhat nih cun anmah pumpak hmuhtonnak ruangah an um ti kha an hngalh. Khuachia a ṭihmi le phungphai a zul tukmi mi tampi zong an um. A dang nih cun khuachia ṭhihnak kong tuanbia hna an chimnak thawngin khuachia ṭihnak kha an karhter. Mi nih khuachia kong tuanbia kha ngaih an duh i midang sin zongah chim an duh. Cu bantuk tuanbia hna ruangah mi nih khuachia kha an ṭih.

20. Satan hlennak kha zeitindah kan karhter khawh?

20 Mah hi ruathmanh—mi nih rak ka ṭih hna seh ti kha Satan nih a duh. (2 Thesalon 2:9, 10) Satan cu mi  lihchim a si caah khuachia thiamnak kong hngalh a duhmi hna cungah zeitindah huham ka ngeih lai, a hmaan lomi thil hna an zumh nakhnga zeidah ka tuah lai ti kha a hngalh. Cu bantuk mi hna nih an hmuhmi le an theihmi kha an zumh i midang sinah tuanbia bantukin an chim men lai. Mah kha midang nih an chim chin tikah biaperh in an chim. Kannih cu, cu bantuk tuanbia kong hna chim chinnak thawngin Satan karhtermi ṭihnak um awkah a bawmmi si kha kan duh lo.—Johan 8:44; 2 Timote 2:16.

21. Khuachia kong tuanbia chim canah zei kong dah kan chim khawh?

21 Jehovah miphun a simi nih cun khuachia hnahnawhnak a ton bal hmanhah midang sinah mah kong kha tuanbia bantukin a chim ṭhan lengmang awk a si lo. Satan le khuachia nih an tuah khawhmi zei bantuk thil hmanh Jehovah salle nih ṭih a hau lo. Mah canah Jesuh kong le Jehovah nih a pekmi ṭhawnnak kong tu ah lungthin kan pek awk a si. (Hebru 12:2) Jesuh nih a zultu pawl kha khuachia kong tuanbia a chim hna lo. Pathian Pennak kong thawngṭha le “Pathian nih thil lianngan a tuahmi” tu ah lungthin a pek.—Lamkaltu 2:11; Luka 8:1; Rom 1:11, 12.

22. Zei tuah awkah dah bia na khiah?

22 Satan a hmuitinh cu Jehovah he kan i pehtlaihnak hrawh awkah a si ti kha philh hna hlah u sih. Cutin tuah khawh awkah lam a phunphun a hman lai. Asinain Satan hmanmi lam hna kha kan hngalh i khuachia thiamnak ah aa telmi thil vialte kha hrial awkah bia kan khiah. Kan biakhiahnak derter awkah ‘Khuachia kha caanṭha kan pe’ lai lo. (Efesa 4:27 rel.) Satan kha kan doh ahcun a rap ah kan i foih lai lo i Jehovah huhphenhnak tangah him tein kan um lai.—Efesa 6:11.