A ummi cazin ah kal

A ummi cazin ah kal

 ṬHEN 13

Timote nih Mi Pawl kha Bawmh a Duh Hna

Timote nih Mi Pawl kha Bawmh a Duh Hna

Timote cu mi bawmh duhnak lungthin a ngeimi mino a si. Hmun tampi ah a kal i mi pawl kha a bawmh hna. Cucaah a nunnak cu a nuam tuk. A kong kha hngalh nan duh maw?—

Timote cu a nu le a pi nih Jehovah Pathian kong kha an cawnpiak

Timote cu Listra khua ah a ṭhangmi a si. A ngakchiat lio tein a pi Lois le a nu Zunis nih Jehovah Pathian kong kha an cawnpiak. Timote cu a hun ṭhan tikah midang kha Jehovah Pathian kong chimh a duh hna.

Ni khat cu Paul nih ‘hmun dang ah phungchim awkah na ka zul lai maw’ tiah mino Timote kha a hal. ‘Kaan zulh lai’ tiah a leh. Midang sinah kal in bawmh awkah Timote cu timhcia a si.

Masidonia ram ah a ummi Thesalonika khua ah Timote cu Paul he an kal. Cuka  khua phanh khawh awkah lamhlatpi ke in kal a hau. Cun tilawng zong i cit a hau. An va phanh tikah cuka khuami hna kha Jehovah Pathian kong an chimh hna. Mah tikah mi cheukhat cu an thin a hung i harnak pek an duh hna. Cucaah Paul le Timote cu cuka khua in an chuak i khua dang ah phung an va chim.

Timote nih a nuammi nunnak kha a hmuh

Thla tlawmpal a rauh hnuah Paul nih Timote kha Thesalonika khua i a ummi unau hna kha zeidah an lawh ti hngalh awkah a va zohter ṭhan. Harnak a petu hna an umnak khua ah va kal ṭhan timi cu ralṭhatnak ngeih a hau lai a si ko lo maw? Asinain Timote nih cuka khua i a ummi unau pawl kha a thin a phanpiak hna caah a kal ṭhan. A kir ṭhan tikah unau pawl cu an sining a ṭha ko tiah Paul kha a chimh.

Timote cu Paul he kum tampi chung rian an ṭuanṭi. Cucaah khrihfabu pawl bawmh hna awkah Timote cu a ṭha bikmi a si tiah Paul nih a ṭialnak a si. Zeicatiah Jehovah Pathian le mi pawl kha a dawt hna caah a si.

Nannih tah mi pawl kha nan daw ve hna maw? Jehovah Pathian kong tah chimh nan duh ve hna maw?— Nannih zong mi pawl kha nan dawt hna i Pathian kong nan chimh hna ahcun Timote bantukin a nuammi nunnak nan hmuh ve lai.

BAIBAL AH REL

  • 2 Timote 1:5; 3:15

  • Lamkaltu 16:1-5; 17:1-10

  • 1 Thesalon 3:2-7

  • Filipi 2:19-22