A ummi cazin ah kal

A ummi cazin ah kal

 ṬHEN 5

Samuel nih a Hmaanmi Thil kha a Tuah Peng

Samuel nih a Hmaanmi Thil kha a Tuah Peng

Samuel cu a ngakchiat tein biakinn ah um in rian a ṭuanmi a si. Biakinn timi cu Jehovah Pathian an biaknak hmun a si. Samuel cu zeitindah biakinn ah a phanh ti kha nan hngal maw? Mah kong kan i ruah hlanah Samuel a nu Hannah kong kha i ruah hmasa hna u sih.

Hannah cu fa a ngeih lo caah fa ngeih a duh tuk. Cucaah fa a ngeih khawh nakhnga Jehovah Pathian sinah thla a cam. Fapa ka ngeih ahcun biakinn ah ka umter lai i rian ka ṭuanter lai tiah bia aa kam. A thlacamnak kha Jehovah Pathian nih a ngaihpiak. Cucaah fapa a hrin. Hanah nih a fapate kha Samuel tiah min a sak. Hannah nih Pathian sinah bia aa kam ningin Samuel kha kum thum asiloah kum li a si ah biakinn ah Pathian rian ṭuan awkah a kalpi.

Pathian biakinn i rian a ṭuanmi lakah tlangbawi ngan bik cu Eli a si. A fale pahnih zong Pathian rian a ṭuanmi tlangbawi an si ve. Biakinn cu Pathian biaknak hmun a si ti kha nan hngal rih ko lo maw? Cuka hmun ah a ṭhalomi thil tuah awk a si lo. Asinain Eli fapale pahnih nih a ṭhalomi thil kha an tuah. Mah kha Samuel nih a hmuh. Samuel nih Eli fale bantukin a ṭhalomi thil kha a tuah ve maw?— A tuah lo, a nu le a pa nih an cawnpiak ning tein a hmaanmi thil kha a tuah peng.

Eli nih a ṭhalomi a fale pahnih kha zeitindah a tuah hna awk a si? Chimchun hmanh u.— Dan a tat hna awk a si. Pathian biakinn ah a ṭhalomi thil kha tuah hlah u tiah a cawnpiak hna awk a si. Asinain Eli nih dan a tat hna lo lengah a cawn zong a cawnpiak hna lo. Mah ruangah Jehovah Pathian cu Eli le a fale pahnih cungah a thin a hung tuk. Cucaah Jehovah Pathian thengte nih dan a tat cang hna lai.

Jehovah Pathian nih a fial ning tein Eli kha Samuel nih a chimh

Zan khat cu Samuel nih aa hngilh lioah, “Samuel!” tiah auh thawng a theih. Mah tikah Samuel cu Eli sinah a tli. Asinain Eli nih “kan au lo” tiah a ti. A voi thumnak ah Eli nih Samuel kha auh thawng na theih ṭhan ahcun hitin na ti lai tiah a ti: ‘Chim ko Jehovah Pathian, ka ngaih ko.’ Mah ning tein Samuel nih a ti tikah Jehovah Pathian  nih Samuel kha hitin a chimh: ‘Eli innchungkhar nih ṭhatlonak an tuah caah dan ka tat cang hna lai. Mah kong kha Eli va chim.’Samuel nih Eli sinah mah kong kha a chim ngam lai tiah nan ruat maw?— A chim ngam lai lo. Samuel nih a chim ngam lo nain Jehovah Pathian nih a fial ning tein Eli kha a chimh. Jehovah Pathian nih a chim ning tein a si taktak. A ṭhalomi Eli fale pahnih an thih hnuah Eli zong a thi ve.

Samuel hi kan i zohchunh awk a si ko lo maw? Midang nih ṭhatlonak an tuahmi kha a hmuh ko nain anih cu a hmaanmi thil kha a tuah peng. Nannih tah Samuel bantukin a hmaanmi thil kha nan tuah peng ve lai maw? Cutin nan tuah ahcun Jehovah Pathian aa lawmh lai lengah nan nu le nan pa zong an i lawm ve lai.

BAIBAL AH REL

  • 1 Samuel 2:22-26; 3:1-21