A ummi cazin ah kal

A ummi cazin ah kal

 ṬHEN 10

Jesuh cu Nawl a Ngai

Jesuh cu Nawl a Ngai

Ngakchia hna nulepa bia kha nan ngai peng maw?— A caan ah cun ngaih nan duh lo, a si ko lo maw? Jesuh tah ahote bia dah a rak ngaih?— Jehovah Pathian le nulepa bia kha a rak ngaih. Jesuh kong nan hngalh ahcun nulepa bia ngaih kha nan duh ve lai. Jesuh kong kha zoh hna u sih.

Jesuh cu vawleicung i a rat hlanah vancung ah a Pa Jehovah Pathian he an umṭi. Vawleicung zongah Jesuh nih nulepa a ngeih hna. A pa min cu Josef a si i a nu min cu Mary a si. Annih cu zeitindah Jesuh nulepa an hun si ti kha nan hngal maw?—

Jehovah Pathian nih Jesuh i vancung a nunnak kha Mary paw chungah a chiahpiak. Cucaah Jesuh cu kanmah bantukin minung in hrin a si ve. Mah cu khuaruahhar thil a si ko lo maw? Nule paw chungah duhsah tein nan ṭhan bantukin Jesuh zong Mary paw chungah duhsah tein a ṭhang ve. Thla kua hrawng a rauh hnuah Jesuh cu hrin a si. Cuticun Mary le Josef cu Jesuh i vawleicung a nu le a pa an hung si.

Jesuh le a chungkhar cu Jehovah Pathian biak awkah lamhlapi ah a ummi Jerusalem khua ah an kal. Mah lioah kum 12 lawng a si rihmi Jesuh nih vancung ah a ummi a Pa Jehovah Pathian zeitlukin dah a dawt ti kha a rak langhter. Innlei i an kir ṭhan tikah Josef le Mary nih Jesuh kha an hmu ti lo. Jesuh cu khoika ah dah a um?—

Jesuh cu zeicah biakinn ah a um?

Josef le Mary cu a rannak in Jerusalem khualei ah an kir ṭhan i Jesuh kha an kawl. An hmuh lo caah an lungre a thei tuk. Asinain ni thum a rauh hnuah Jesuh cu biakinn ah an va hmuh. Jesuh cu zeicah biakinn ah a um ti kha nan hngal maw?— Cuka ah a Pa Jehovah Pathian kong kha a cawn khawh caah a si. Jesuh nih Jehovah Pathian kha a dawt tuk. A lung zong lawmhter a duh. Jesuh cu a upat hnu hmanhah Jehovah Pathian bia kha a ngai peng. Nawlngaih awk a har caan le harnak ka in lai ti a hngalh caan hmanhah Jehovah Pathian bia kha a ngai peng. Jesuh nih Josef le Mary bia tah a ngai hna maw?— A ngaih hna tiah Baibal nih a ti.

Jesuh sinin zeidah nan i cawn khawh?— Nulepa bia ngaih nan duh lo caan zong a um ko lai. Asinain an bia nan ngaih peng hna lai. Nulepa bia nan ngai lai maw?—

BAIBAL AH REL

  • Luka 1:30-35; 2:45-52

  • Efesa 6:1

  • Hebru 5:8