A ummi cazin ah kal

A ummi cazin ah kal

 LESSON 4

A Pa le Jehovah Pathian Lung a Lawmhtertu Nu

A Pa le Jehovah Pathian Lung a Lawmhtertu Nu

Jepthah nih Jehovah Pathian kha zei bia dah a kamh?

Jepthah fanu cu a pa biakam ningin tuah awkah a har ko nain a tuah

Hmanthlak chung i minu hi nan hmu maw?— Amah cu Jepthah fanu a si. Baibal chungah a min cu aa ṭial lo. Asinain a pa le Jehovah Pathian an i lawmh nakhnga a rak tuah. Amah le a pa Jepthah kong kha zoh hna u sih.

Jepthah cu miṭha pakhat a si i a fanu kha Jehovah Pathian kong a cawnpiak zungzal. Amah cu miṭhawng a si lengah mi a hruai khotu zong a si. Cucaah Israel mi hna nih ral doh awkah an kal tikah rak kan hruai tiah an ti.

Jepthah nih ral ka tei khawh nakhnga ka bawm tiah Jehovah Pathian sinah thla a cam. Ral ka tei i inn ah ka kir ṭhan tikah a ka dong hmasa bikmi kha kaan pek lai tiah bia aa kam. Jehovah Pathian sinah pekchanhmi nih cun a nun chung vialte Pathian biakinn ah a um lai i rian a ṭuan lai.  Biakinn timi cu mi pawl nih Pathian biak awk i an kalnak hmun kha a si. Atu ah Jepthah nih ral cu a tei cang. Innlei i a kir ṭhan tikah a dong hmasa biktu cu ahodah a si?—

Jepthah fanu a si. Amah cu a fanu ngeihchunte a si. Atu cu a fanu he an i ṭhen cang lai. Cucaah Jepthah cu a ngaih a chia tuk. Asinain Pathian sinah biakamnak a tuah cang ti kha nan hngal rih ko lo maw? A fanu nih hitin a ti: ‘Ka pa Jehovah Pathian sinah biakamnak na tuah cang a si ahcun mahning tein tuah ko.’

Jepthah fanu cu a hawile nih kum fatinte an va leng tawn

Jepthah fanu zong a ngaih a chia tuk ve ko lai. Pathian biakinn ah a um ahcun va zong a ngei kho ti lai lo i fa zong a ngei kho ti lai lo. Asinain Jepthah fanu nih a pa kha a biakam ning tein tuahter a duh. Jehovah Pathian zong lawmhter a duh. Mah cu a caah va ngeih le fa ngeih nakin a biapi deuh. Cucaah biakinn i rianṭuan awkah inn kha a kaltak.

A pa le Jehovah Pathian kha an lung a lawmhter hna maw?— Si, a lawmhter hna. Nannih tah Jepthah fanu bantukin si nan duh ve maw? Nan duh ahcun Jehovah Pathian kha nan dawt lai i bia nan ngai lai. Cutin nan tuah ahcun nan nu le nan pa an i lawmh lai lengah Jehovah Pathian zong aa lawm tuk ve lai.