A ummi cazin ah kal

A ummi cazin ah kal

 ṬHEN 1

Hngalh kan Duhmi Biathli

Hngalh kan Duhmi Biathli

Ngakchia hna mi nih theih lo dingin aw din tein an chimmi bia kha zeitindah kan auh, nan thei maw?— * Biathli tiah kan auh. Baibal chung zongah a hleikhunmi biathli pakhat kong a um. Mah cu Pathian sinin a rami a si caah aa thupmi biathli tiah kan auh. Hlanah mah kong kha ahohmanh nih an hngalh lo caah biathli a si. Mah biathli kong kha vancungmi hna hmanh nih hngalh an rak duh. Nannih tah hngalh nan duh ve maw?—

Vancungmi hna nih zei kong dah hngalh an rak duh?

Hlanliopi ah, Pathian nih minu le mipa a rak ser hna. Pa a min cu Adam tiah auh a si i nu a min cu Evi tiah auh a si. Pathian nih aa dawh tukmi Eden dum ah a umter hna. Adam le Evi nih Pathian nawl an ngaih ahcun anmah le an fale nih vawlei pumpi kha aa dawh tukmi Eden dum ah cang dingin an tuah khawh lai. Mah dum chungah an zapi tein zungzal in an nung kho lai. Asinain Adam le Evi nih zeidah an tuah ti kha nan hngal maw?—

Adam le Evi nih Pathian nawl an rak ngai lo. Cucaah vawlei hi atu ah aa dawh tukmi Eden dum a si khawh lonak a si. Asinain Pathian nih vawlei pumpi hi aa dawh tukmi Eden dum ah ka canter ṭhan lai tiah bia a kan kamh. Cuka ah ahopaoh nuam tein zungzal in kan nung lai. A nuam tukmi Eden dum si dingin Pathian nih zeitindah a kan tuahpiak lai? Mah kong kha ahohmanh nih caan saupi tiang an rak hngal lo. Cucaah biathli tiah kan auhnak a si.

Jesuh nih vawleicung i a um lioah a hleikhunmi biathli kong kha a dikthliar in mi pawl a rak chimh hna. Mah biathli cu Pathian Pennak a si. Pathian Pennak tlung cang ko seh tiah thlacam ding zongin a rak cawnpiak hna. Mah Pennak nih vawlei hi aa dawh tukmi Eden dum ah a canter lai.

Mah biathli kong nan hngalh caah nan i nuam ko lo maw?— Jehovah Pathian bia a ngaimi lawnglawng Eden dum ah an um lai. Pathian bia a ngaimi tampi an um tiah Baibal nih a ti. An kong hngalh nan duh lo maw?— Annih cu ahote dah an si, anmah buntukin si kan duh ve ahcun zeidah kan tuah awk a si ti kha zoh hna u sih.

BAIBAL AH REL

  • Marka 4:11

  • 1 Piter 1:12

  • Genesis 1:26-28; 2:8, 9; 3:6, 23

  • Matthai 6:9, 10

  • Salm 37:11, 29

^ cat. 3 Cheukhat biahalnak i a hnulei ah mah bantukin aa rinmi (—) hi nan hmuh lai. Mah tin aa rinmi cu chikkhat dirta in ngakchia kha a phi pekter hna tinak a si.