A ummi cazin ah kal

A ummi cazin ah kal

 ṬHEN 7

Mah Lawng si lioah Ṭihnak Lungthin na Ngei Bal Maw?

Mah Lawng si lioah Ṭihnak Lungthin na Ngei Bal Maw?

Mah hmanthlak chung i ngakchiapate hi zohhmanh u. Amah lawng a um i a ṭihmi a lo. Nannih tah cutin nan um bal maw?— Ahopaoh cutin kan um bal. Baibal nih Jehovah Pathian a hawile cheukhat hmanh mah lawng si lioah ṭihnak lungthin an ngeih balnak kong kha a chim. Anmah lakah pakhat cu Elijah a si. Amah kong kha zoh hna u sih.

Elijah kha Jezebel nih thah a duh

Elijah cu Jesuh a chuah hlanpi in Israel ram ah a rak nungmi a si. Mah lio caan ah Israel siangpahrang Ahab cu Jehovah Pathian a bia lo. Ahab le a nupi Jezebel nih a hmaan lomi Baal pathian kha an biak. Cucaah Israel mi cheukhat zong nih Baal pathian kha an hun biak ve. Siangpahrangnu Jezebel nih Jehovah Pathian a biami paoh kha thah hna awkah khua a khan. Mah hna lakah Elijah zong aa tel ve. Mah kong a theih tikah Elijah cu zeidah a tuah lai tiah nan ruah? Chimchun hmanh u.—

Elijah cu a rak zam. Ramlak ah a zam i lungkua ah aa thup. Zeicah a rak zam?— A ṭih  caah a si. A ngaite ti ah cun Elijah nih a ṭih awk a si lo. Zeicah ti kha nan hngal maw? A hramthawk tein Jehovah Pathian nih a ka bawmh khawh ti kha Elijah nih a hngalh. Jehovah Pathian nih a ṭhawnnak a langhtermi zong kha a hmuh bal. Voikhat cu Elijah nih thla a cam i Jehovah Pathian nih van in mei a tlakter. Atu ah tah Jehovah Pathian nih Elijah kha a bawm kho ko lai lo maw? A bawmh khawh ko.

Elijah kha Jehovah Pathian nih zeitindah a bawmh?

Elijah lungkua chung i aa thuh lioah Jehovah Pathian nih “hika ah hin zeidah na tuah?” tiah a hal. Mah tikah Elijah nih hitin a leh: ‘Nangmah an biami ah keimah lawnglawng hi ka taang. An ka thah sual lai ti ka phang i ka zammi a si.’ Elijah nih Jehovah Pathian a biami pawl vialte cu thah an si dih cang tiah a ruah. Asinain Jehovah Pathian nih Elijah kha ‘na ruahnak cu a palh cang. Keimah a ka biami thong sarih an um rih. Ṭih hlah. Na ṭuan dingmi tampi a um rih’ tiah a ti. Mah bia a theih tikah Elijah cu aa nuam tuk lai a si ko lo maw?—

Elijah sinin zeidah kan i cawn khawh?— Nannih zong keimah lawng ka si tiah nan ruah awk a si lo. A ṭih zong nan ṭih awk a si lo. Nan sinah Jehovah Pathian le nanmah an dawtu hna hawikom tampi an um. Mah lengah ṭhawnnak tampi a ngeimi Jehovah Pathian nih aan bawmh zungzal hna lai. Jehovah Pathian nih a kan bawmh zungzal lai ti nan hngalh caah nan i nuam ko lo maw?—

BAIBAL AH REL

  • 1 Siangpahrang 19:3-18

  • Salm 145:18

  • 1 Piter 5:9