A ummi cazin ah kal

A ummi cazin ah kal

 BIAHALNAK 7

Nupa Sualnak Tuah Dingin Hnek Ka Si Ahcun Zeitindah Ka Tuah Lai?

Nupa Sualnak Tuah Dingin Hnek Ka Si Ahcun Zeitindah Ka Tuah Lai?

ZEICAH A BIAPIT?

Nupa sualnak kong he aa tlaiin na biakhiahnak nih hmailei na nunnak tiang a hnorsuan khawh caah a si.

NANGMAH SI LAW ZEITINDAH NA TUAH LAI?

Mah thil sining hi na mitthlam ah cuanter hmanh: Heather le Mike an i komhnak cu thla hnih lawng a si rih. Asinain Mike kong kha ka hngalh dih tiah Heather nih a ruah. Pakhat le pakhat ca an i kua, phone saupi an i chawn, phone chawnh an cim lo. Asinain atu cu Mike nih bia i ruah lawngin aa lungsak kho ti lo.

A luanciami thla hnih chungah cun kut tlaih le hnamh lawng a si rih. Heather nih mah lengin tuah cu a duh lo. Mike he i ṭhen lai zong kha a duh lo. Mike nih a nunnak bantukin a dawt. ‘Mike le kei cu aa duhmi pei kan si ko cu’ tiah aa silhnalh.

Nang cu nungak tlangval ngeih a cu cangmi na si i Heather bantuk thil sining na ton ahcun zeidah na tuah lai?

RUAT ṬHAN

Nupa umṭinak cu aa ṭhiummi hna caah Pathian pekmi laksawng a si. I ṭhitum hlanah nupa sualnak tuah cu mah laksawng kha ningcang loin hman a si. Pakhatkhat nih laksawng aan pekmi aa dawh tukmi angki kha puanchia caah hmanmi he aa lo

Vawlei dah kha na ralchanh ahcun harnak na tong lai. Cu bantukin, ‘nu le pa sualnak tuah kha hrial u’ timi ziazalei phunglam kha na zulh lo ahcun harnak na tong lai.​—1 Thessalon 4:3.

Mah phunglam kha na zulh lo ahcun zeidah na ton khawh? Baibal nih hitin a ti: “Nu le pa sualnak a tuahmi nih cun amah pum cung hrimhrim ah khan sualnak a tuah a si.” (1 Korin 6:18) Mah cu zeitindah a si khawh?

 Nupa sualnak a tuahmi mino hna lakah tam deuh nih a tanglei ah langhtermi ṭhatlonak pakhat asiloah pakhat an tong ti kha hlathlainak hna nih a langhter.

  • LUNGRETHEIHNAK. Mino tam deuh nih i ṭhitum hlanah nupa sualnak an tuah caah kan i ngaichih tiah an ti.

  • ZUMHLONAK. Nupa sualnak an tuah dih hnuah ‘aho he dah hitin an tuah cang hnga?’ tiah lung­hrinnak an hun ngei.

  • LUNGRAWHNAK. A taktak ti ah cun nu pawl nih an cungah caanṭha lak a hmangmi kha si loin anmah a kilveng hngami kha an duh hna. Pa pawl nih cun caanṭha fawi tein pek a hmangmi nu pawl kha an duh hna lo.

  • A BIAPI BIKMI: I ṭhitum hlanah nupa sualnak nan tuah ahcun a sunglawi tukmi thil pakhat kha midang na pek caah nangmah le nangmah man ngei lomi ah naa tuahmi a si. (Rom 1:24) Na pum cu man a ngei tukmi a si caah fawi tein na pek awk a si lo.

“Nu le pa sualnak aa sum” khomi ziaza ṭha a ngeimi na si kha langhter. (1 Thessalon 4:3) Nikhatkhat ah innchunghawi na ngeih tikah chungkhar nuamhnak na hmuh lai. I ṭhitum hlanah nupa sualnak tuah ruangah a chuakmi lungretheihnak, ngaihchihnak le zumhlonak hna na ngei lai lo.​—Phungthlukbia 7:22, 23; 1 Korin 7:3.

 ZEITINDAH NA RUAH?

  • Aan daw taktakmi nih cun na lungthin le na pum kha fahnak pek dingin a tuah lai maw?

  • Aan sunsak taktakmi nih cun Pathian he nan i pehtlaihnak rawh dingin a tuah lai maw?​—Hebru 13:4.