A ummi cazin ah kal

A ummi cazin ah kal

 ṬHEN 4

Sualnak Ka Ngei Tiah Ruahnak​—⁠Sualnak Ka Ngeih Ti Lo Nakhnga “Ka Sualnak Cu Ka Thianhpiak Ko”

Sualnak Ka Ngei Tiah Ruahnak​—⁠Sualnak Ka Ngeih Ti Lo Nakhnga “Ka Sualnak Cu Ka Thianhpiak Ko”

“Ka rian nih ka chungkhar kha nunning sang in a chiah khawh hna. Asinain mah rian ruangah Baibal he aa ralchanhmi thil hna kha ka hun tuah. Pathian nih a duh lomi nuamhsaihnak hna kha ka hun tuah, ramkhel rian ah kaa tel, midang biakinn hmanhah kaa pum. Jehovah Tehte ka si ko nain kum 40 tiang Pathian rianṭuannak ah kaa tel ti lo. Caan a liam deuhdeuh tikah kei cu Pathian nih a ka ngaithiam kho ti lai lo timi ruahnak ka hun ngei deuhdeuh. Keimah le keimah zong kaa ngaithiam kho lo. Mah nakin a ṭha lo deuhmi cu biatak ka hngalh hnuah lam ka pialmi hi a si.​​—⁠Martha.

SUALNAK KA NGEI timi ruahnak cu thilrit pakhat bantuk a si kho. “Ka sualnak tilet chungah ka pil i ka sualnak cu an rih caah tangah an ka hnuh” tiah Siangpahrang David nih a rak ṭial. (Salm 38:⁠4) Unau cheukhat nih Pathian nih zeitikhmanh ah a kan ngaithiam kho ti lai lo tiah an ruah i ngaihchia le lungkuai in an um. (2 Korin 2:⁠7) Cutin ruah cu a hmaan maw? Sualnak ngan na tuah sual hmanh­ah Jehovah Pathian nih zeitikhmanh ah ngaihthiam khawh ti lo tiangin Pathian he nan i hlat lai maw? Nan i hlat lai lo!

“Hi Bia Hi Ṭha Tein Ruatṭi Tuah U Sih”

Jehovah nih aa ngaichihmi hna kha a hlaw hna lo. Pathian nih kutza chanh in a don hna. Fapa tlau bianabia chung i dawtnak a ngeimi pa le Jehovah Pathian cu an i lo tiah Jesuh nih a ti. Fapa tlau nih a chungkhar kha a kaltak, nuamhsaihnak kha a kawl i a hnuah inn ah kir ṭhan dingin bia a khiah. Fapa tlau a kir ṭhanmi kha a pa nih lam hlatpi in a hmuh tikah “a zaang a fak ngaingai i a hei tlik hnawh i a fapa cu a kuh i a hnamh.” (Luka 15:​11-​20) Jehovah sinah kir ṭhan na duh ko nain Pa­thian he kan i hlat tuk tiah na ruat maw? Jesuh bianabia ah aa telmi pa bantukin Jehovah Pa­thian nih zaangfahnak he na rak kir ṭhan lai caan kha lungthawhnak nganpi he a hngah.

Asinain na tuahmi sualnak cu a ngan tuk asiloah a tam tuk caah Pathian nih a ka ngaithiam kho lai lo tiah na ruah ah tah? Isaiah 1:​18 ah aa ṭialmi Jehovah i sawmnak hi zaangfahnak in ruathmanh: ‘BAWI­PA nih aa thawh i, “Atu cu hi bia hi ṭha tein ruatṭi tuah u sih. Nan sualnak cu a sen in sen hna hmanh sehlaw, hawhra bantuk thiang in kaan kholh hna lai.’ ” A vaarmi thilpuan cungah a senmi aa nehmi phun bantukin hnawh awkah a harmi sualnak a si hmanhah Pathian nih aan ngaihthiam khawh ko.

Jehovah Pathian nih sualnak ka ngei timi lungput ngeih peng ding kha aan duhpiak lo. A si ahcun Pathian ngaihthiamnak thawngin a chuakmi lung hnangamnak le chiaṭha thleidannak lungthin thiang kha zeitindah na hmuh khawh lai? Siangpahrang David nih a tuahmi thil pahnih kha ruat­hmanh. Pakhatnak ah, hitin a tuah: “Ka sualnak cu nangmah sinah ka phuan hna.” (Salm 32:⁠5) Jehovah Pathian nih a sinah thlacam in naih awk le thil sining hna kha tawnghtham awkah a ka sawm ti kha philhhlah. Mah sawmnak kha cohlang. Pathian sinah na sualnak kha phuang law na intuarnak kha chim. David nih a hmuhtonnak thawngin zumhnak taktak he hitin thla a cam khawh: “Ka ṭhatlonak cu ka ṭawlpiak hna law ka sualnak cu ka thianhpiak ko hna. . . . Maw Pathian, a kuaimi lungthin hi na hlaw lai lo.”​​—⁠Salm 51:​2, 17, NW.

Pahnihnak ah, Pathian nih rian a pekmi profet Nathan bawmhnak kha David nih a cohlan. (2 Sa­muel 12:13) Tuchan zongah aa ngaichihmi hna kha Jehovah Pathian he pehtlaihnak ṭha an ngeih ṭhan nakhnga bawmh awkah Khrihfa upa hna kha Pathian nih a kan timhpiak. Khrihfa upa hna sinah bawmhnak hal tikah lung hnangamnak hmuh awk, a ṭhatlonak lei in hmuhnak ngeihmi tlawm deuh awk asiloah tlau awk, Pathian he pehtlaihnak ṭha ngeih ṭhan awkah Baibal kha hmangin lungtak tein thla an in campiak lai.​​—⁠Jeim 5:​14-​16.

Jehovah Pathian nih chiaṭha thleidannak lungthin thiang ngeihter aan duh

‘A Sualnak Ngaihthiam A Simi Cu Aa Lawm’

Jehovah Pathian sinah sualnak phuan le Khrihfa upa hna sinah bawmhnak hal timi cu tuah awkah a har bikmi thil a si tiah na ruah khawh men. David zong mah bantuk ruahnak a rak ngei ve. A sualnak hna kha caan pakhat tiang cu “phuan” loin a rak um. (Salm 32:⁠3) A donghnak ah sualnak phuannak le sualnak hna remhnak i a ṭhathnemnak kha a sunsak.

David nih a bikin ṭhathnemhnak a hmuhmi cu lunglawmhnak a hmuh ṭhanmi kha a si. Cucaah “a sualnak ngaihthiam a si i a palhnak maimilh a simi cu a lung aa lawm” tiah a rak ṭial. (Salm 32:⁠1) Hiti zongin thla a cam rih: “Maw BAWIPA, bia chim ka bawm law nangmah cu kaan thangṭhat lai.” (Salm 51:15) David nih a sualnak kha a phuan caah lung hnangamnak a hmuh i Jehovah ngaihthiamnak kha a sunsak caah midang kha Pathian kong chimh a duh hna.

Jehovah Pathian nih chiaṭha thleidannak lungthin thiang ngeihter aan duh. Pathian nih amah kong le aa tinhnak kong hna kha sualnak ka ngei timi lungput he si loin lungthin thiang le lunglawmh­nak he midang na chimhmi hna kha a duh. (Salm 65:​1-4) Jehovah Pathian sawmnak kha philhhlah: “Nan sualnak cu aan hnawhpiak hna nakhnga, i ngaihchih u law Pathian lei ah khan i mer tuah u.”​​—⁠Lamkaltu 3:​19.

Mah bantukin Martha cu a rak si. Hitin a chim: “Ka fapa nih Vennak Innsang le I Hlau! mekazin hna kha a ka kuat peng. Duhsah duhsah tein Jehovah Pathian he kan i pehtlaihnak cu a ṭha ṭhan. Pa­thian sinah kir ṭhan awkah ka caah a har bikmi thil cu ka rak tuahmi sualnak dihlak caah ngaihthiamnak hal a si. Zeiti a si hmanhah a donghnak ahcun Pathian sinah thlacamnak in ka naih i ngaihthiamnak ka hal. Kum 40 a rauh hnuah Jehovah sinah ka kir ṭhan khawhmi cu a zumh hmanh ka zum kho lo. Mi pakhat cu kum tampi chung bupi he aa hlat hmanhah Pathian sinah a kir ṭhan kho i Pa­thian dawtnak a hmu ṭhan kho ti kha keimah ka hmuhtonnak nih a langhter.”