A ummi cazin ah kal

A ummi cazin ah kal

Zulhawktlakmi Lamhruainak Kawlnak

Zulhawktlakmi Lamhruainak Kawlnak

Sui Sui nih a innpa a simi Sang Sang le a nupi Par Ku cu lungsinak ngei in le lungdai tein an um zungzalmi kha a hmuh hna. Zeicah cutin an um khawh hnga ti kha Par Ku ka va hal tuah lai tiah a vapa Pa Lian kha a ti. Cuticun a hnuah Par Ku he an i ton tikah a hal.

Par Ku nih hitin a ti: “Sui Sui le Pa Lian nih nan tonmi buaibainak le lungretheihnak hna hi kannih zong kan tong ve ko. Asinain naiah keimah le ka chungkhar caah zulhawktlak taktak a simi lamhruainak cheukhat aa telmi cauk pakhat ka hmuh. Mah cauk ah daihnak le lawmhnak hmuh khawhnak lam kha a fianter. Mah lengah nifatinte hneknak le lungretheihnak hna kan tong ko nain kan i nuamh khawh nakhnga mah cauk nih a kan bawmh.”

Sui Sui nih hngalh a duh caah mah cauk kong kha Par Ku nih tam deuh in a chimh chap. “Mah cauk cu a hlun ngai cangmi cauk a si i Israel le a pawngkam khua hna ah ṭialmi a si. Asinain zeibantuk biaknak le bu hmanh a aiawhmi cauk a si lo caah mi vialte caah a si. A taktak ti ah cun mah cauk cu holhphun za lengin leh a si caah mikip ti awk in rel khawh a si.” Mah cauk cu mifim hna nih atu le atu an cherhchanh tawn i ram tampi i upadi hna caah a hrampi a si ti zongin Par Ku nih a chimh.

Sui Sui nih mah cauk cu hmuh a duh tuk. Mah ni zanlei ah Par Ku inn ah a va kal. Par Ku nih a tanglei kong hna he aa tlaiin mah cauk chung i zulhawktlakmi lamhruainak hna kha a hmuhsak:

 Fale cawnpiak ning

  • “A zulh awk a simi lam kha ngakchia cu cawnpiak law, a upat tikah mah cucu a pialtak ti lai lo.”

  • “Nulepa hna, nan fale kha an thin hung seh tiin ti hna hlah u.”

Rian le tangka hman ning

  • “Fir a hmangmi kha fir ti hlah seh, amah ca i ding tein pawcawmnak caah le sifakmi bawmhnak caah rian ṭuan seh.”

  • “Ahohmanh rianṭuan a duh lomi cu ei awk zeihmanh pe hna hlah u.”

Ritnak siivai le zu

  • “Cucaah pum siseh, thlarau siseh, a thurhnomhtertu paohpaoh kha i thenh u.”

  • “Zu hi nihsawhnak mi a phorhtu a si, Ritnak zu hi i siknak a si; zu rit cu hruh a si.”

Ziazalei nunphung hna

  • “Ṭhitumnak hi mi vialte nih kan hmaizah awk a si i nuleva hi zumhawktlak an si veve awk a si.”

  • ‘Nu le pa sualnak tuah kha hrial u.’

  • “Ahohmanh nih nu kha sual duhnak lungthin he a zoh ahcun, cu pa cu a lung chungin a sual cang.”

Chungkhar ah i upatnak

  • “Na nu le na pa upat hna.”

  • “Nangmah an hringtu na pa kha a bia va ngai, na nu kha a tar tikah va serhsat hlah.”

  • “Vale nih nan nupile cu nan pum nan i dawt bantukin nan dawt hna lai i nupile nih nan vale cu nan hmaizah hna lai.”

Baibal a ngeimi hna caah a cunglei i cherhchanhmi Baibal cang hna kha a tangah langhter a si.

Phungthlukbia 22:6; Efesa 6:4

Efesa 4:28; 2 Thesalon 3:10

2 Korin 7:1; Phungthlukbia 20:1

Hebru 13:4; 1 Thesalon 4:3; Matthai 5:28

Efesa 6:2; Phungthlukbia 23:22; Efesa 5:33