A ummi cazin ah kal

A ummi cazin ah kal

Zeizong Vialte Hram a Thawktu Hngalhnak

Zeizong Vialte Hram a Thawktu Hngalhnak

Pa Lian nih Jehovah biakam kong hna kha a theih caah aa nuam ko nain mah biakam hna a tlinter khotu ṭhawnnak cu pakhatkhat sinah zeitindah a um khawh lai ti kha hngalh a duh. Jehovah nih a biakam vialte zeitindah a tlinter khawh ti hngalhthiam awkah mi tampi nih ṭha tein an hngalhciami a hrampi phunglam a simi a tuahtu um loin thil a um kho lo timi kong kha ruah awkah Sang Sang nih a chimh.

Sang Sang nih mah a hrampi phunglam kha Baibal chung zongah a fianternak kong a chimh i mah Baibal cang hi Pa Lian kha a relpiak:

  • ‘Inn cu mi nih an sakmi a si.’—Hebru 3:4.

“Mah cu aa tlak ngaingaimi a si, a satu um lo ahcun zei inn hmanh amah tein a um kho lo ti cu a fiang ko” tiah Pa Lian nih a leh.

“A dang pakhat zong hi ruathmanh. A chuangtu um lo ahcun meh khengkhat hmanh amah tein a um kho lo” tiah Sang Sang nih a chim chap.

An pawngkam i a ummi thil vialte cu inn pakhat nakin hngalhthiam awkah a har deuh kha Sang Sang nih Pa Lian a hngalhter ṭhan. “Aa dawhmi pangpar hna, rumra a ngeimi tlang hna, a ngan i a thuk tukmi rili le van le vawlei zong hi zohhmanh. Inn pakhat ah pungsan suaitu le a satu a herh bantukin meh khengkhat si awk zongah a chuangtu a herh ahcun van le vawlei ah a ummi khuaruahhar thil hna kong he aa tlaiin tah zeitin? Mah thil vialte hna ca zongah pungsan suaitu le a tuahtu a herh ve lai a si ko lo maw?” tiah a ti.

 Sang Sang nih a chimmi hna cu aa tlak ngaingaimi a si ti kha Pa Lian nih a cohlan.

“A taktak ti ah cun zeizong vialte hi a hmasa bik pungsan suaitu le a tuahtu a um tiah Baibal nih a ti. Zeizong vialte a sertu si ding ahcun a sertu cu ṭhawnnak a ngeimi a si a hau lai. Cucaah Baibal nih Pathian tiah a auhnak a si. Baibal i a hrampi holh ah mah biafang cu ‘a liannganmi’ asiloah ‘a ṭhawngmi’ timi sullam a ngei. Tuchan ah mi nih ‘pathian’ tiah an auhmi tampi a um ko nain zeizong vialte a sertu cu Jehovah a si caah amah cu Lianngan Bik Pathian tiah kan auh khawh” tiah Sang Sang nih a ti.

Zeizong vialte ah pungsan suaitu le a tuahtu um a herh

Jehovah Pathian nih khuaruahhar thil a tuahmi hna kong Baibal ah a langhtermi a hmuh caah Pa Lian cu a khuaruah a har tuk. A tanglei hi Sang Sang nih a hmuhsakmi hna kong cheukhat an si:

  • “A hramthawk ah, Pathian nih van le vawlei a ser hna.”—Genesis 1:1.

  • “Bawipa cu Pathian a si kha zeitikhmanh ah philhhlah u! A kan sertu cu amah a si i kannih cu amah ta kan si.”—Salm 100:3.

  • “Van nih khin Pathian sunparnak a langhter i a tuahmi thil kha a kan hmuhsak.”—Salm 19:1.

  • ‘Pathian nih a hlei cu van tawng in a ser hna i van cu vawlei cungah siling bantukin a khuh; Pathian nih cun rili ti cu a kawh hna i vawlei cungah a thlet hna.—Amah a min cu Jehovah a si.’—Amos 9:6, NW.

A hmaan ko, Jehovah Pathian cu zeizong vialte a sertu a si. Asinain Pathian nih mah thil vialte hna kha umter sawhsawh asiloah ser  sawhsawh lawng si loin thilnung vialte kha nunnak a pek hna. Jehovah kong he aa tlaiin Baibal nih hitin a chim: “Nang cu nunnak vialte hram na si.” (Salm 36:9) Cucaah Pathian cu nunnak a kan Petu le a kan Sertu a si. Jehovah cu nunnak Hram a Thawktu a si caah kan Pa a si taktak. Cucaah Baibal nih hitin a ti: “Kan dihlak in pa pakhat fa kan si lo maw? Pathian pakhat sermi kan si lo maw?”—Malakhi 2:10.

Jehovah cu nunnak vialte Hram a si

Pa Lian cu a lung a fiang i hitin a ti: “Kan pawngkam ah a ummi thil hna hi zoh in ruah tikah hram a thawktu, pungsan suaitu le nunnak a kan petu a simi sertu a um lai ti cu fawi tein hngalh khawh a si.”

“Jehovah nih zeizong vialte ser khawhnak ṭhawnnak a ngeih ahcun Baibal chung i a biakam vialte zong tlinter khawhnak ṭhawnnak a ngei lai ti cu a fiang ko” tiah Sui Sui nih lungtho ngaiin a chim ve.

Pa Lian le Sui Sui caah mah ni i an theihmi vialte cu aa tlak ngaingaimi a si ko nain cutin ṭhawnnak a ngeimi Pungsan Suaitu cu zeibantuk dah a si hnga ti kha hngalh an duh.