A ummi cazin ah kal

A ummi cazin ah kal

Buaibainak Vialte Donghnak

Buaibainak Vialte Donghnak

Jehovah kong Sang Sang nih a chimhmi vialte nih Pa Lian cu a lung a suk tuk ko nain a lung a buaitermi thil a um rih. Sang Sang kha hitin a hal: “Jehovah cu zeizong vialte a sertu ṭhawnnak le dawtnak a ngeimi a si ahcun vawleicung ah zeicah sifah harnak hi mah tluk in a tam hnga? Buaibainak hna hi zeicah mah tluk in kan ton hnga?”

Sang Sang nih Pa Lian kha hitin a ti: “Na biahalnak cu a ṭha tuk. Mi tampi zong mah kongah an lung a buai ve. Jehovah i a sining hna kan ruah tikah atu vawlei thil sining ṭhalo hna hi minung caah Pathian nih umter a duhmi a si lo ti cu a fiang. Cucaah mah thil pawl an umnak a ruang kha hngalh awkah vawlei ca i a hramthawk Pathian tinhnak le mah aa tinhnak zeitindah a can ti kha kan hngalhthiam a herh.

Cun vawlei sernak rian kha Jehovah Pathian nih a liim tikah zeitindah a hmuh ti kha Sang Sang nih Pa Lian kha a chimh. Sang Sang nih a relpiakmi Baibal cang cu mah hi a si:

  • “Pathian nih a sermi thil vialte cu a zoh i a lung a si ngaingai.”—Genesis 1:31.

Vawleicung ah Jehovah nih a sermi vialte lakah aa thleidang bikmi cu a hmasa bik minu le mipa an si. An min cu Adam le Evi a si. Pathian nih a sermi thil dang vialte bantukin annih zong mitling in a ser hna, cucaah annih cu vawleicung ah zungzal in an nung kho. Pathian nih Eden dum tiah auhmi aa dawh tukmi hmun ah a umter hna. Mah hmun ah nuam tein an nun khawh nakhnga an herhmi thil vialte kha a pek hna. An herhbaumi zeihmanh a um lo. (Genesis 2:8, 9) Mah lengah Jehovah nih fa tampi ngei u law vawleicung ah khat hna seh tiah  a ti hna. (Genesis 1:28) Chim duhmi cu a donghnak ah vawleicung pumpi hi a tling i a nuammi minung chungkhar in a khatmi paradis ah a cang lai tinak a si. Mah cu a ṭha tukmi ruahchannak a si.

Cu a si ah zeidah a palh? Sang Sang nih Pa Lian kha Baibal in hngalh awk a fawimi mah fianternak pakhat hi a relpiak:

  • “Sualnak cu mipa pakhat thawngin vawleicung ah hin a tlung i cu sualnak nih cun thihnak kha a ratpi. Cun mi vialte cu an sual dih caah thihnak nih cun a ciah dih hna.”—Rom 5:12.

Dawtnak a ngeimi Pa pakhat in Jehovah Pathian nih Adam le Evi kha zulh awk asiloah phunglam cheukhat kha a pek hna. Mah kha an zulh ahcun Paradis ah an nun khawh peng lai lengah mah dum kha an zohkhenh khawh lai. (Genesis 2:15-17) Fimnak a ngeimi Pa pakhat in Jehovah nih a chimmi kha hramhram in a zulhter hna lo i nawlngaimi fale si awkah anmah tein a thimter hnanak thawngin amah kha zeitlukin dah an dawt ti langhternak caan a pek hna. Zalong tein i thimnak nawl kan ngeih bantukin Adam le Evi zong nih an ngei ve. Zeidah an rak tuah?

Ngaihchiat awk cu Adam le Evi nih Sertu lamhruainak zulh canah an lam kha anmah tein an i thim. Cutin an i thimmi cu sual a si. Sualnak an ngeih caah mitlinglo an hung si. Mitlinglo an hung si caah Adam le Evi cu an tar i an thi. Cutin a sinak cu Jehovah Pathian nih a phunglam hna kha nan zulh lo ahcun nan ton lai tiah a timi hna i a phichuak a si.—Genesis 2:17.

Kan zapi tein Adam le Evi tefa kan si caah tlinlonak ro kan co, cucaah kan tar i kan thi. Asinain minung caah Pathian tinhnak cu aa thleng lo ti kha Sang Sang nih Pa Lian kha a zumh nakhnga a chimh. Dawtnak a ngeimi Pa pakhat in Jehovah nih minung kha Paradis bantuk a simi vawleicung ah  nunter a duh rih ko hna. Sang Sang nih Pa Lian le Sui Sui kha mah Baibal cang hi a hmuhsak hna:

  • “Van cu Bawipa nih a ser hna, amah cu Pathian a si. Vawlei kha a ser i a siam, fekte le suapi nguh in a ser, vawlei cu thetse ram, ram pakpalawng ah a ser lo, minung umnak caah a ser.”—Isaiah 45:18.

Vawlei caah Pathian i a hramthawk aa tinhnak cu a tling lai

Sang Sang nih Pa Lian le Sui Sui kha Baibal ah a ummi a ṭha tukmi biakam vialte kha a theihter ṭhan hna. Zawtnak, fahnak le sifah harnak a um ti lai lo, mi vialte caah tirawl tampi a um lai, inn ṭha lo ṭha an ngei lai i thihnak zong a um ti lai lo. Mah thluachuah vialte cu vawlei Paradis ah zungzal in nun ding timi minung caah Pathian i aa thleng kho lomi a hramthawk aa tinhnak i a cheubang an si. Sang Sang nih Pa Lian kha mah biakam hi a hmuhsak:

  • “A dingmi cu ram [“vawlei,” NW] chungah him tein an um lai i ram cu zungzal in anmah ta a si lai.”—Salm 37:29.

Mah cu Jehovah Pathian biakam a si i a tling hrimhrim lai.