A ummi cazin ah kal

A ummi cazin ah kal

Kan Zumh Khawhmi Biakamnak Hna

Kan Zumh Khawhmi Biakamnak Hna

Sang Sang nih a chimmi kong he aa tlaiin Pa Lian nih khua tampi a ruah. A taktak ti ah cun Pa Lian nih Baibal kong a theihnak cu voikhatnak a si lo. Mah cauk cu a thiangmi cauk a si ti kha Pa Lian nih a cohlan. Asinain a tling taktakmi hmailei kong chimchungbia hna Baibal ah aa tel ahcun mah cu a thiang i a hlun ngai cangmi cauk pakhat menmen lawng a si lai lo tiah a ruah. Cun science lei kong he aa tlaimi hna le atu tiang a hmaan pengmi tuanbialei kong hna kha Baibal ṭialtu hna nih an hngalh chungmi zong a khuaruah a har. Zeitindah an hngalh hnga?

A thaizing ah Pa Lian le Sui Sui cu Sang Sang le Par Ku sinah an va leng i Pa Lian nih Sang Sang kha hngalh a duhmi mah biahalnak hi a hal: “Baibal ṭialtu hna nih mah kong vialte hna hi zeitindah an hngalh chung khawh?”

Kan ca ṭhatnak ding caah a biakam hna kha ṭial awkah minung kha Pathian nih lam a hruai hna

Sang Sang nih hitin a chimh: “Mah kong a ṭialtu hna nih an ruahnak hna kha an ṭialmi a si lo asiloah a konglam hna a ṭialtu an si lo. Pakhatkhat nih a chimmi a konglam hna a ṭialpiaktu chungṭuan hna he an i lo. A Ṭialtu taktak cu minung vialte i kan Pa a si.”

“Minung vialte i kan Pa cu ahodah a si?” tiah Pa Lian nih a hal.

“Amah cu nunnak a kan petu a si. Mah lengah kan pale bantukin amah zong min a ngei ve” tiah Sang Sang nih a chimh i a Baibal in Salm 83:18, NW kha a kau i Pa Lian kha a relpiak:

  • ‘Nangmah lawnglawng hi Jehovah na si le vawlei dihlak uktu Cung Nung Bik na si kha hngal hna seh!’

Sang Sang nih Pa Lian kha a dang Baibal cang zong a hmuhsak. Mah Baibal cang ah Jehovah kha ‘a hramthawk tein a phichuak zeidah a si te lai ti kha a rak chimtu; thil um ding  kha a um hlanpi in a rak chimtu’ a si tiah a langhter. (Isaiah 46:10) Mah Baibal cang kha Sang Sang nih hitin a fianter: “Kan pale cu hmuhtonnak tampi an ngei i kan hngalhmi nakin an hngalh deuh tawn bantukin minung vialte i kan Pa, Jehovah zong kan zapi nakin hngalhnak le fimnak a ngei deuh ve, hmailei kong hmanh a chimchung khawh. Mah ruangah Pathian nih Baibal ṭialtu hna kha hmailei kong a ṭialter khawh hnanak a si.”

“Keimah le Sui Sui i kan hmailei kong tah Jehovah nih a hngal chung maw?” tiah Pa Lian nih a hal.

“Jehovah nih mi pakhat cio i an nunnak a donghnak kha ri a khiahpiak hna lo. Asinain pa pakhat bantukin kan tonmi buaibainak kha a hngalh i bawmh a kan duh” tiah Sang Sang nih a chimh.

Daihnak le lawmhnak hmuh awkah Jehovah nih a pek hna hngami bawmhnak kha Baibal ah an hmuh khawhnak kong le biakhiahnak an tuahmi nih atu le hmailei an nunnak ah zeitindah a hnorsuan khawh hna timi kong an cawn khawh kha Sang Sang nih Pa Lian a chimh.

Pa Lian nih mah cu aa tlak ngaingaimi a si tiah a ruah. Zeicatiah amah theng pa pakhat a si i a fale nih a nuammi hmailei nunnak an hmuh khawh nakhnga a si khawh chungin tuahpiak a duh hna caah a si. Sang Sang nih Pa Lian le Sui Sui kha Baibal ah a ummi biakam cheukhat kha lungtho tein a chimh hna. A tanglei hi a hmuhsakmi hna kong cheukhat an si:

  • “Vawleicung pumpi ah ral cu a daihter dih ko hna.”—Salm 46:9.

  • “Mi nih inn an i sak lai i an umnak hna lai, midang nih an hmankanh hna lai lo. Mitsur dum kha an i ser lai i a mitsur hang kha an din hna lai, midang nih an dinkanh hna lai lo. Thingkung bantukin ka mi cu an chan a sau lai.”—Isaiah 65:21, 22.

  • “Ram chungah rawl tampi in um ko seh; Lebanon tlang i a ummi rawl kung ṭha bantuk nih tlang vialte cu tuam dih hna  seh. Ramlak i a khomi ram bantukin khuapi cu minung in khat hna seh.”—Salm 72:16.

  • “An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang.”—Biathlam 21:4.

A kan hngakmi hmailei khuaruahhar kong kha Baibal ah a langhter

Pa Lian cu Baibal chung i khuaruahhar a simi mah biakam hna nih a lung a suk tuk. Mikip aa ruang tein pehtlaih an si lainak, zawtnak le thihnak a um ti lai lonak le mikip caah tirawl tampi a um lainak vawlei kha a duh tuk. Sui Sui zong nih a duh tuk ve. Asinain mah vialte cu a ṭhat tuk caah a si kho ngaingai hnga maw tiah a ruah.

“Sui Sui, zeitindah na ruah ti cu ṭha tein ka hngalhthiam ko. Asinain mah kong hi ruathmanh: Kan hmuh cang bantukin Baibal chung i a dang chimchungbia hna zong a dikthliar in a tling cang. Mah nih atu kan chimmi biakam hna zong hi a tling hrimhrim lai ti kha a kan zumhter a si ko lo maw? A taktak ti ah cun mah hna hi a tling lai ti kha Baibal Ṭialtu taktak nih mah bia in aamah a khan: ‘Hi bia hi ṭial hna, zeicatiah a hmaanmi le zumhawktlak a simi bia an si’” tiah Sang Sang nih a ti.—Biathlam 21:5.