A ummi cazin ah kal

A ummi cazin ah kal

Aa Thleidangmi Cauk

Aa Thleidangmi Cauk

Mah ni zanlei ah rianṭuannak in Pa Lian a rak ṭin tikah Par Ku nih a chimhmi vialte kha Sui Sui nih a chimh dih ṭhan. Pa Lian nih hngalh duh awk ngai a si tiah a ruah ko nain daihnak le lawmhnak hmuh khawhnak a dang lam kong hna kha midang nih an chimmi a theih bal caah mah kong cu zumh awkah aa harh. Asinain mah kong cu Sang Sang he kan i ruah tuah lai tiah bia a khiah i a hmai zarh Zarhte Ni ah an i ruah.

Sang Sang nih Pa Lian kha hitin a ti: “Mah cauk hi Baibal tiah kan auh. Mah cauk hi atu tiang ka rel peng rih, a hmaan i zumhawktlakmi a si tiah zakhat ah zakhat ka zumh.”

Pa Lian nih Sang Sang kha zumh awkah aa harhmi kong kha hitin a chimh: “Kan pawngkam ah a ummi sifah harnak le lungretheihnak hna cu a dongh lo lengah mah nih miphun kip le ram kip a hnorsuanmi hna kha kan hmuh. Mah lengah lam hmaan a si ko tiah aa timi biaknak hna le mifim tampi an um ko nain ahohmanh nih raltuknak, a ṭhalomi uknak, miphun i huatnak le sifah harnak hna hi a kan tawnghthampiak kho lo. Mah cauk chungah a ummi kong hna cu mah biaknak hna le mifim hna nih an chimmi he aa thleidannak a um hlei hnga maw?”

Baibal chungah a ummi kong pakhat kha Sang Sang nih a relpiak tikah Pa Lian cu a khuaruah a har tuk. Mah Baibal cang hna hi a relpiak: ‘Minung nih minung cu harnak pek in a uk.’ “Minung nih a zulhmi a lam hi amah nih aa thimmi an si lo i A nun chung i a kalnak lam zong hi amah nih aa ser khawhmi an si lo ti kha ka hngalh.” Mah bia hna a hmaan ti kha ahohmanh nih al khawh a si lo kha Pa Lian nih a cohlan. Mah bia hna cu Nitlaklei ram hna lawngah si loin Pa Lian a umnak ram ah a ummi hna i an nunnak zongah a hmaan ve.

Sang Sang nih a kong dang tampi hna ruang zongah Baibal a zumh kha Pa Lian a chimh. Hitin a chimh: “Par Ku nih Sui Sui a chimh bantukin Baibal nih nifatinte kan nunnak caah zulhawktlakmi  lamhruainak a kan pek lengah mi nih kan tonmi buaibainak hna i a hrampi zong fiang tein a kan chimh.” Hitin a chimh chap: “Pa Lian, Baibal cu science lei zongin a hmaan.”

Pa Lian cu zumh awkah aa harh peng rih. Hitin a hal chap: “Baibal bantukin a hlun cangmi cauk pakhat cu tuchan ah tonmi buaibainak he aa pehtlaih lengah science lei zongah a hmaan ti cu zeitindah a si khawh lai?” Mah cauk a ṭialtu zong hngalh a duh.

Sang Sang nih hitin a chimh: “Baibal cu minung pakhat lawng nih a ṭialmi a si lo. A taktak ti ah cun mah cauk cu kum 1,600 chungah minung 40 leng nih an ṭialmi cauk fatete uk 66 in fonhmi a si i a luancia kum 1,900 hrawngah an rak liim. A ṭialtu hna cu science lei he aa tlaiin hngalhnak tlawmte lawng a ngeimi an si ko nain kum thong tampi a rauh hnu lawngah hngalhmi a konglam hna kha an ṭial. Tahchunhnak ah, Baibal ṭialtu pakhat nih vawlei hi ‘zeihmanh lo chungah aa thlai,’ tiah a ṭial i a dang pakhat nih vawlei cu a pum tiah a ṭial. Baibal an ṭial lioah mah kong hna kha ṭha tein an rak hngal rih lo, mah cu a hmaan ko ti kha nai hrawng lawngah science lei mifim hna nih an langhter khawh.”

“Hngalh duh awk ngai a si” tiah Pa Lian nih a ti. Sang Sang nih Pa Lian kha mah bantukin hngalh duh awk ngai a simi a kong pakhat kha hmuhsak a duh rih.

“Baibal nih Babilon tiah auhmi a ṭhawngmi vawlei uknak pakhat a rawh lainak kong kha kum 200 hrawngin a chimchung. Babilon zeitindah tei a si lai timi kong lengah khuaruahhar a simi cu a teitu ding siangpahrang i a min hmanh a chuah hlanpi in a langhter. A taktak ti ah cun Baibal ah hmailei kong he aa tlaiin a chimchungmi za lengin a um.”

Mah kong hna kha Pa Lian nih a ruah lioah mah nakin a khuaruah a harter chinmi kong kha Sang Sang nih a chimh. “Kanmah i tel in midang zong nih atu ah an tonmi harnak kong hna kha a luancia kum 1,900 lio in Baibal ah a chimchung ti kha na  hngal maw?” Baibal chung i mah Baibal cang hi Pa Lian kha a relpiak:

  • Tuchan ah kan hmuhmi buaibainak tampi hi Baibal ah a chimchung

    “Ni hmanung bik kha an phak tikah harnak caan a si lai ti kha philhhlah. Mi cu anmah zawn lawng aa ruatmi, a hak a kaumi, aa porhlawmi le lung a puammi an si lai; an nu le an pa kha an zomhtaih hna lai i an nawl an ngai duh hna lai lo; lawmh a hngal lomi le biaknak zeihmanh i a rel lomi an si lai; zaangfahnak an ngei lai lo, mi zawnruahnak an ngei lai lo, mi thangchiat duhmi an si lai, ruru-hranghrang in khua a sami an si lai i ṭih a nungmi an si lai; ṭhatnak kha an huat lai; hawi rawi a hmangmi an si lai, duhpaoh khuasa an si lai i porhlawtnak in an khat lai; Pathian nakin nuamhnak kha an duh deuh lai; kan biaknak phung hi a lenglei in an i tlaih, sihmanhsehlaw a chung i a ummi ṭhawnnak taktak kha cu an duh lai lo.”

Raltuknak, zawtnak, mangṭam, lihnin le dinlonak hna i tel in vawleicung pumpi ah sifah harnak a um lainak kong kha a dang Baibal cang hna zongah a chimchung tiah Sang Sang nih Pa Lian kha a chimh.

Amah le Sui Sui nih an tonmi buaibainak tampi kha hlanliopi in Baibal ah a hmaanning tein a langhtermi kha a hmuh tikah Pa Lian cu a khuaruah a har.

“Aa thleidang tuk hi ta!” tiah Pa Lian nih khuaruahhar ngaiin a chim.

Phungchimtu 8:9; Jeremiah 10:23

Job 26:7; Isaiah 40:22; 2 Timote 3:1-5