A ummi cazin ah kal

A ummi cazin ah kal

THLAIHHLEI

Minung Nih Mit In Hmuh Khawh Lomi A Thi Kho Lomi Kan Ngei Maw?

Minung Nih Mit In Hmuh Khawh Lomi A Thi Kho Lomi Kan Ngei Maw?

Mi tampi nih cun kan chung ah mit in hmuh khawh lomi a thi kho lomi a um tiah an zumh. Thih tikah cu mit in hmuh khawh lomi cu pum chungin a chuak i a nung tiah an ruah. Cu zumhnak cu a karh tuk caah Baibal cawnpiakmi a si lo an hngalh tikah mi tampi cu an khuaruah a har. Cu a si ahcun Pathian Bia chim ningah kan thih tikah zeiahdah kan can?

BAIBAL AH NE’PHESH LE PSY.KHE’ HMAN NING

Baibal cu a hramthawk ah Hebru le Grik holh deuh in rak ṭial a si kha na theih ko lai. Baibal ah hmanmi Hebru biafang ne′phesh le Grik biafang psy‧khe′ kha Baibal cheukhat ah thlarau tiah an rak leh. Cu biafang pahnih cu Cathiang chungah voi 800 leng a um i a bikin (1) minung, (2) saram, (3) minung asiloah saram ngeihmi nunnak kha a chim duhmi a si. Cuti phun thum in a langhtermi Baibal cang cheukhat kha i ruah u sih.

Minung. “Lawng chungah a lutmi mi tlawmte minung [psy‧khe′] dihlak ah pariat hna kha ti chung cun khamh an si.” (1 Piter 3:20) Hika ah Grik biafang psy‧khe′ kha minung—Noah, a nupi, a fapale pathum le an nupile—caah hman a si ti cu a fiang. Exodus 16:16 ah manna changreu charnak he aa tlaiin Israel mi hna kha hiti hin lamhruainak pek an si: “Nan i zaat tawk cio in nan char lai,…Cun mahle thlam chung i khua a sami [ne′phesh] dihlak ca cio khan char a si lai.” Manna zeizat char ding timi cu chungkhar pakhat cio an chungkhar ne′phesh asiloah minung cungah aa hngat.

Saram. Baibal chungah sernak he aa tlaiin hitin kan rel: “Pathian nih cun aa thawh i, ‘Ti nih hin thilnung [ne′phesh] phun tampi a hrin hna lai i va hi thli lakah hin an zuang lai,’ a ti i cu bang cun a hung si.’ Cun Pathian nih hitin a chim chap: ‘Vawlei nih hin inn zuat saṭil [ne′phesh] a phunphun le ramlak saram a phunphun, a hme he a ngan he, hring hna seh,’ a ti i cu bang cun a hung si.” (Genesis 1:20, 24) Hi Baibal cang ah hin nga, innzuat saṭil le ramlak saram vialte caah Hebru biafang ne′phesh ṭhiamṭhiam kha a hman

Minung nunnak. A caancaan ah ne′phesh le psy‧khe′ timi biafang nih minung pakhat nunnak zong kha a chim duhmi a si tawn. Jehovah nih Moses kha hitin a ti: “Nangmah [Na ne′phesh′] thah an duhmi vialte kha an thi cang.” (Exodus 4:19) Rachel nih a fapa Benjamin kha a hrin i ‘a thaw hmanung bik [ne′phesh] a cat.’ (Genesis 35:16-19) Jesuh chimmi hi bia zong hi ruat hmanh: “Tukhal ṭha cu keimah hi ka si. Ṭukhal ṭha cu a tuu hna caah a lu [psy‧khe′] hloh kha a sian.” (Johan 10:11) Jesuh nih minung caah a psy‧khe′ asiloah a nunnak kha a rak pek. Mah Baibal cang hna chim ningin ne′phesh le psy‧khe′ timi biafang nih minung nunnak a sawh ti cu a fiang.

Pathian Bia kha tamdeuh in hlathlai ahcun Baibal chung dihlak khua zei ka hmanh ah ne′phesh le psy‧khe′ timi biafang kha “a thi kho lomi” asiloah “a hmun zungzalmi” timi biafang he aa sengtlai lo ti kha hmuh khawh a si.

BAIBAL AH RU’ACH LE PNEU’MA HMAN NING

Baibal cheukhat nih Hebru biafang ru′ach le Grik biafang pneu′ma zong kha thaw le thlarau tiah an leh. Cathiang theng nih mah biafang hna sullam kha a chim. Tahchunhnak ah Salm 104:29 nih hitin a ti: “[Jehovah] na thaw [ru′ach] kha na tlaih kanh hna tikah an thi i an chuahkehnak vawlei ah khan an kir ṭhan.” Jeim 2:26 zong nih ‘pum cu thlarau [ pneu′ma] loin a thi’ tiah a langhter. Cu a si caah mah cacang hna ningin ru′ach le pneu′ma cu pum a nuntermi a si. Ru′ach asiloah pneu′ma lo cun pum cu a thi. Cucaah, Baibal i ru′ach timi biafang kha thlarau ti lawng si loin nunnak ṭhawnnak tiah leh a si. Tahchunhnak ah Noah chan Buanchukcho he aa tlaiin Pathian nih hitin a ti: “[“Nunnak ṭhawnnak [ru′ach] ruangah,” NW] a nungmi thil vialte hrawhnak ding caah vawlei cungah buanchukcho ka tlunter lai. Vawlei cung i a ummi thil vialte an thi dih lai.” (Genesis 6:17; 7:15, 22) Cucaah ru′ach le pneu′ma nih thil nung vialte a cawlcanghter khomi mit in hmuh khawh lomi ṭhawnnak (a nuntermi ṭhawnnak) kha a sawh.

Radio pakhat ngaih awkah elektrik dah a herh bantukin pum cawlcanghnak caah nunnak ṭhawnnak [ru′ach asiloah pneu′ma] a herh. Tam deuh in fianternak caah radio a hmemi pakhat khi ruat hmanh. Radio chungah datkhe kan sanh ahcun datkhe chungah a ummi dah thawngin radio cu a aw a hung chuak (a hung nung). Asinain datkhe a um lo ahcun radio cu a aw a chuak ti lo (a thi). Cu bantuk cun, thlarau [ru′ach asiloah pneu′ma] cu pum a nuntermi ṭhawnnak a si. Elektrik dah bantukin thlarau [ru′ach asiloah pneu′ma] nih intuarnak le khuaruah khawhnak a ngei lo. Mah cu pum a ngei lomi ṭhawnnak men a si. Sihmanhsehlaw thlarau asilole nunnak ṭhawnnak a um lo ahcun salm caṭialtu nih a chim bantukin kan pum cu ‘a thi i kan chuahkehnak vawlei ah khan a kir ṭhan.’

Radio

Phungchimtu 12:7 nih mithi kong kha hitin a chim: “Kan pum cu vawlei leidip ah a kir ṭhan lai i kan thaw [ru′ach asiloah pneu′ma] cu a kan petu Pathian sinah a kir ṭhan lai.” Thaw asiloah nunnak ṭhawnnak cu pum chungin a chuah tikah kan pum cu a thi i a chuahnak vawlei ah a kir ṭhan. Cu bantuk cun nunnak ṭhawnnak cu a ratnak Pathian sinah a kir ṭhan. (Job 34:14, 15; Salm 36:9) Nunnak ṭhawnnak kha van ah a kai ṭhan tiah a chim duhmi a si lo. Mi pakhat a thih tikah a hmailei nunnak ruahchannak cu Jehovah Pathian cung lawngah a um tinak a si. A nunnak cu Pathian kut ah a um. Pathian ṭhawnnak thawng lawngin mi pakhat nunter khawh awkah nunnak ṭhawnnak pek ṭhan khawh a si.

Pathian nih “thlan chung i a ummi mithi vialte” a nunter ṭhan hna lai ti theih cu lung hna a va ngam dah! (Johan 5:28, 29) Jehovah nih thawhṭhannak caan ah thihnak ah aa hngilhmi pakhat kha pum thar a serpiak lai i nunnak ṭhawnnak a peknak thawngin a nunter ṭhan lai. Lunglawmhnak in a khatmi caan a si lai!

Baibal ah hmanmi ne′phesh le psy‧khe′, cun ru′ach le pneu′ma timi biafang hna kong kha hngalh chap na duh ahcun Jehovah Hngaltu hna chuahmi Kan Thih Tikah Zei ah dah Kan Can? timi cauk [mirang holh] le I Ruahnak timi cauk [kawl holh] cahmai 87-91, 312-16 ah man a ngeimi a konglam hna kha kawl khawh a si.

← A sawhmi ṭhen kha zoh