A ummi cazin ah kal

A ummi cazin ah kal

Tuanbia 114: Ṭhatlonak Vialte An Donghnak

Tuanbia 114: Ṭhatlonak Vialte An Donghnak

Kahin zeidah nan hmuh hna? A si, rang rang aa citmi ralkapbu an si. Sihmanhsehlaw an ratnak hi zoh hmanh u. Rangtum hna cu vancung in minmei cit in an ra! Vancung ahcun rang cu an um taktak maw?

Vancung ah Siangpahrang a ṭuanmi Jesuh

An um lo. Hi rang hna cu rang taktak an si lo. Zeitindah kan hngalh khawh ti ahcun minmei cung ah rang cu an tli kho lo, an tli kho maw? Sihmanhsehlaw Baibal nih vancung i rang hna kong a chim taktak. Zeicahdah a chim nan hngal maw?

Hlan lio ahcun rangtum hna cu ral tuknak ah an rak hman tawn hna caah a si. Cucaah vawlei cung i minung hna he doh awk ral pakhat Pathian nih a ngei ti hmuhsak awk ah Baibal nih vancung in rang aa citmi minung an rung ṭum tiah a chim. Cu raldohnak hmun cu zei an ti dah nan hngal maw? Armageddon. Cu ral cu vawlei cung ṭhatlonak vialte hrawh awk caah a si.

Hi Armageddon i ral dohnak ah lam hruaitu ding cu Jesuh a si. Jesuh cu Jehovah nih amah cozah chung ah siangpahrang luchin aa chinhmi cu a si. Cun vainam aa put mi nihcun Pathian ral vialte a hrawh dih lai nak hna kha a langhter. Pathian nih mi ṭhalo vialte a hrawh dih hna ticu kan khuaruah a har awk a si maw?

Tuanbia 10 kha zoh ṭhan hmanh u. Cuka ahcun zeidah nan hmuh? A si, Buanchukcho nih mi ṭhalo a hrawh mi hna kan hmuh. Ahonihdah Buanchukcho cu a tlunter? Jehovah Pathian. Cun Tuanbia 15 kha zoh rih hmanh u. Cuka ahcun zeidah a tlung? Sodom le Gomorrah cu Jehovah nih a rak thlakmi mei nih a hrawh lio hna a si.

Cun Tuanbia 33 kha kau hmanh u. Izipt mi hna raldohnak rangleng le rang hna cu zeitindah an um? Ahonihdah ti cu an cung ah khuh dih ding in a rak tuah? Jehovah. A mi hna khamh awk ah mah cu a rak tuah. Tuanbia 76 kha zoh rih hmanh u. Hika ahcun Jehovah nih amah miphun, Israel mi hna hmanh kha an ṭhatlonak ruang ah a rak rawhter mi hna nan hmuh lai.

Cucaah vawlei cung i ṭhatlonak vialte donghter dih awk ah Jehovah nih a vancung ralkap a run thlah hna lai mi cu kan khuaruah a har awk a si lo. Sihmanhsehlaw mah cu zei sullam dah a si lai ruat hmanh! Nan ca kha kau u law zoh tuah u sih.

Biathlam 16:16; 19:11-16.



Biahalnak hna

  • Baibal nih vancung i rangtum hna kong kha zeicah a chim?
  • Vawlei cung i misual pawl dohnak Pathian i raldohnak min cu zeidah a si i mah raldohnak timhnak cu zeidah a si?
  • Hmanthlak chung ningin raldohnak a hruaitu ding cu ahodah a si, zeicah siangpahrang luchin aa chinh i aa putmi vainam sullam cu zeidah a si?
  • Tuanbia 1015 le 33 kha zoh ṭhan tikah Pathian nih misual pawl a hrawh hna lai ticu zeicah khuaruahhar awk a si lo?
  • Tuanbia 36 le 76 nih Pathian kan bia an ti hmanh ah a sualmi pawl cu Pathian nih a hrawh hna lai ti kha zeitindah a kan hmuhsak?

Biahalnak dang hna

  • Biathlam 19:11-16 rel.

    Baibal nih rang rang aa citmi cu Jesuh a si ti kha zeitindah a fianter? (Biat. 1:5; 3:14; 19:11; Isa. 11:4)

    Jesuh aa aih mi puanthi aa neh mi nih tlingtein teinak a hmuh ti kha zeitindah a fehter? (Biat. 14:18-20; 19:13; Isa. 63:1-6)

    Rang rang aa citmi Jesuh hnu a zulmi ralkap hna lakah ahodah aa tel kho ve? (Biat. 12:7; 19:14; Matt. 25:31, 32)