A ummi cazin ah kal

A ummi cazin ah kal

Tuanbia 112: Tikulh Pakhat Ah Lawng A Rawk

Tuanbia 112: Tikulh Pakhat Ah Lawng A Rawk

Zoh hmanh u! Lawngpi cu a rawk cang! Ti chung i a zuangmi hna minung hi nan hmu hna maw? A cheu cu tikam an phan cang. Khika i khi Paul cu a si maw? A cung ah zeidah a tlung ti zoh tuah u sih.

Lawng rawhnak in a luatmi pawl

Sisaria khua thonginn chung ah Paul cu kum hnih chung thong a tla ti kha nan hngal ti maw? Cucaah amah le a dang thongtla pawl kha tilawng cung ah an kaiter hna i Rom khua lei ah an kal. Khrit tikulh pawng an phak tik ah thlichia fakpi a hrang. Thli cu fak tuk in a hran caah mi hna nih lawng cu an mawng kho ti lo. Cun chun ah nika an hmu kho ti lo i zan ah arfi zong an hmu kho ti lo. A donghnak ah, ni tampi hnu ah, lawng chung i mi vialte cu luatnak ding ruahchannak an ngei ti lo.

Cutikah Paul cu a dir i: ‘Pakhat hmanh nan nunnak nan sung lai lo; lawng bel hi a rawk lai. Zeicahtiah zahan ah ka sin ah Pathian vancungmi pakhat a ra i, “Paul, ṭih hlah! Rom siangpahrang Sizar hmai ahcun na dir ṭhiamṭhiam ko lai. Cun nangmah he khual a tlawngmi vialte cu Pathian nih a khamh ko hna lai,” a ka ti,’ tiah a ti hna.

Tilet a thawhnak in ni 14nak zanṭim ah, lawngcong pawl nih ti cu a puan deuh cang ti kha an hngalh! Khuamui chung ah lawng cu lung ah aa su sual lai ti an phan caah, an thircang-ai kha ti chung ah an thlak. A thaizing ahcun ti fonghlei pakhat kha an hmuh. Lawng cu ti fonghlei lei ahcun kalter awk ah an i tim.

Tikam lei an hun naih deuh tik ah, lawng cu thetse tlang ah aa su. Cun tilet nih lawng cu a den cuahmah ko i, lawng cu a kuai dih. Cun an haotu bik ralbawipa nih khan: ‘Ti leuh a thiammi paoh rili chung ah zuang u law tikam lei ah i leu dih u. Mi dang vialte zong an hnulei in lawng chung thingpheng zeilo ṭukṭak le lawng kuaimi pelpawi kha i tlaih cio u law zuang ve u,’ a ti hna. Cun a chim bantuk cun an tuah. Cuticun vancungmi nih bia a kam bang in lawng chung ummi minung 276 cu an zapi in him tein tikam ah an chuak dih.

Cu tikulh cu Malta an ti. Cuka mi hna cu an ṭha ngai i, lawng chung in a chuakmi vialte kha an zohkhenh hna. Nikhua a ṭhat deuh in Paul cu lawng dang ah an chuan i Rom ah an kalpi.

Lamkaltu 27:1-44; 28:1-14.



Biahalnak hna

  • Paul aa citmi lawng cu Grik tikulh pawng a phak tikah zeidah a cang?
  • Paul nih lawng cung i a ummi hna kha zeidah a chimh hna?
  • Zeitindah lawng cu a pelpawi tete in a kuai dih?
  • An haotu ralbawipa nih zei tuah awk dah lamhruainak a pek hna i minung pa zeizat dah tikam ah an luat?
  • An phanhnak cu zei tikulh dah a si i nikhua a ṭhat deuh tikah Paul nih zeidah a ton?

Biahalnak dang hna

  • Lamkaltu 27:1-44 rel.

    Rom lei ah ti cungin Paul a khual tlawnnak kong kan relmi nih Baibal bia a hmaannak kha zeitindah a kan zumhter deuh? (Lam. 27:16-19, 27-32; Luka 1:3; 2 Tim. 3:16, 17)

  • Lamkaltu 28:1-14 rel.

    Khrihfa a si lomi Malta ah a um mi hna cu lamkaltu Paul le lawng rawkmi chung i a hawile cungah ‘an ṭhat ngaingai’ ahcun Khrihfa hna nih zei langhter duhnak dah kan ngeih lai i zeiti lam indah a hlei in kan langhter lai? (Lam. 28:1, 2; Heb. 13:1, 2; 1 Pit. 4:9)