A ummi cazin ah kal

A ummi cazin ah kal

Tuanbia 106: Thong Chung In An Luat

Tuanbia 106: Thong Chung In An Luat

Aa hung komi thong innka aa tlaihmi vancungmi hi zoh tuah u. A thlahmi hna cu Jesuh lamkaltu pawl an si. Zeinihdah thong chung lei ahcun a hruai hna ti zoh tuah u sih.

Vancungmi nih lamkaltu a luatter hna

Jesuh zultu hna cung i thiangthlarau thlet a sinak in caan tawite lawng a si rih. Cun hihi a rak cangmi cu a si: Nikhat cu zanlei sang ah Piter le Johan kha Jerusalem biakinn chung ah an lut. Cuka ahcun, innka pawng ah a chuahka in a ke a bei mipa pakhat a rak um. Biakinn chung i a lutmi hna sin in tangka a hal khawh hna nak hnga mi nih amah cu nifate cuka ahcun an chiah tawn. Piter le Johan kha a hmuh tik hna ah, zeilo pek awk ah a hal hna. Lamkaltu hna cu zeidah an tuah lai?

An dir i cu sifakpa cu an zoh. Cun Piter nih: ‘Tangka zeihmanh ka ngei lo, sihmanhsehlaw ka ngeihmi kha kan pek lai. Jesuh min in tho law kal tuah!’ a ti. Cun Piter nih a orhlei kut in a vun thawh i, mipa cu duak tiah a tho i a kal kho colh. Cucu mi hna nih an hmuh tik ah, an khuaruah a har i hi khuaruahharnak thil ruang ah an lung aa lawm ngai.

‘Jesuh kha thihnak in a thawhter mi Pathian ṭhawnnak thawng in hi khuaruahharnak cu kan tuah mi a si,’ tiah Piter nih a ti. Piter le Johan bia an chim lengmang lio ah biaknak lamhruaitu cheukhat an ra. Piter le Johan nih Jesuh a thawhṭhannak kong mi hna kha an chim hna caah, an thin a hung. Cucaah annih kha an tlaih hna i thong an thlak hna.

A thaizing ah biaknak lamhruaitu hna cu pumhnak nganpi an ngei. Piter le Johan le an damter mipa kha an i pumhnak chung ah an rak luhpi hna. Biaknak lamhuraitu hna nih: ‘Zei ṭhawnnak thawng in dah hi khuaruahharnak thil cu nan tuah?’ tiah an hal hna.

Piter nih thihnak in Jesuh a thawhter ṭhanmi Pathian ṭhawnnak thawng in kan tuah tiah a chimh hna. Tlangbawi hna cu hi khuaruahharnak thil a tlungmi kha an al khawh lo caah zei tuahnak an hngal ti lo. Cucaah lamkaltu hna kha Jesuh kong cu chim ti hrimhrim hlah u tiah nawl an pek hna i an thlah hna.

Ni a liam lengmang bang in lamkaltu pawl nih Jesuh kong cu an chim chin lengmang i mizaw kha an damter hna. Hi khuaruahharnak kong cu a thang chin ve. Cucaah Jerusalem pawng khuapi hna i mibu hna hmanh nih an mizaw pawl kha lamkaltu hna sin ah an ratpi hna i damter awk ah an fial hna. Cu nihcun biaknak lamhruaitu hna an nah a chuahter i, cucaah lamkaltu pawl kha an tlaih ṭhan hna i thong ah an thlak hna. Sihmanhsehlaw cuka ahcun saupi an um lo.

Zan ah Pathian vancungmi pakhat nih hika i nan hmuh bang hin thong innka cu a hun. Vancungmi nihcun: ‘Kal u law biakinn chung ah khan va dir tuah u, cun mi hna kha va chim rih hna u,’ a ti hna. A thaizing ah biaknak lamhruaitu hna nih lamkaltu pawl kha auh awk ah thong inn lei mi an thlah tik hna ah, annih cu an um ti lo. A hnu ah biakinn chung i mi an cawnpiak hna kha an hmuh hna i, Sanhedrin khaan ah an hruai hna.

Biaknak lamhruaitu hna nih: ‘Jesuh kong mi cawnpiak ti hrimhrim lo awk ah nawl kan in pek ko hna nain, atu ah nan cawnpiaknak in Jerusalem cu nan khahter cang,’ tiah an ti hna. Cutikah lamkaltu pawl nih: ‘Minung nak in Pathian nawl kan ngaih deuh ko lai,’ tiah an leh hna. Cucaah “thawngṭha bia” cu an cawnpiak chin ko hna. Cucu kanmah caah zohchunh awk ṭha ngai a si lo maw?

Lamkaltu a ngan 3 in 5.



Biahalnak hna

  • Nikhat zanlei sang ah Piter le Johan biakinn chung an luh lio ah zeidah a cang?
  • Piter nih a ke a bei mipa kha zeidah a chimh i tangka nakin a man a sung deuh mi zeitindah Piter nih a pek?
  • Zeicah biaknak lamhruaitu pawl cu an thin a hun i Piter le Johan kha zeitindah an tuah hna?
  • Piter nih biaknak lamhruaitu pawl kha zeidah a chimh hna, lamkaltu pawl cu zeitindah ralrin pek an si?
  • Zeiruangah biaknak lamhruaitu pawl cu an nah a chuah, sihmanhsehlaw thong a voihnihnak an thlak ṭhan hna tikah zeidah a cang?
  • Sanhedrin ah an kalpi hna tikah lamkaltu pawl nih zeitindah bia an leh hna?

Biahalnak dang hna

  • Lamkaltu 3:1-10 rel.

    Nihin ah khuaruahhar tuah khawhnak nawl pek kan si ti lo nain Lamkaltu 3:6 ah ṭialmi Piter bia nih Pennak thawngṭha kan sunsak khawh nakhnga zeitindah a kan bawmh? (Johan 17:3; 2 Kor. 5:18-20; Fil. 3:8)

  • Lamkaltu 4:1-31 rel.

    Ralchanhnak kan ton tikah kum zabu pakhatnak i Khrihfa unau hna kha zeitindah an nawl kan i cawn awk a si? (Lam. 4:29, 31; Efe. 6:18-20; 1 Thes. 2:2)

  • Lamkaltu 5:17-42 rel.

    Thawngṭha chimnak rian he aa tlai in a luan cia le a tu caan ah Hngaltu a si lomi cheukhat nih zeitindah ruahthiamnak an langhter? (Lam. 5:34-39)