A ummi cazin ah kal

A ummi cazin ah kal

Tuanbia 105: Jerusalem in An Hngah

Tuanbia 105: Jerusalem in An Hngah

Hika i mi hna cu Jesuh zultu pawl an si. A bia kha an ngaih i Jerusalem ah an um ko. An dihlak in an hngah ṭi lio ah an umnak inn chung cu aw thawng thangpi in a khat. Thlichia hran thawng bantuk a si. Cun meizik he aa lomi lei kha a zultu pakhat cio lu cung ah a lang. Pakhat cio an lu cung i mei cu nan hmu maw? Zei sullam dah a si?

Kumzabu pakhatnak zultu hna cungah thiang thlarau a tlung

Hi cu khuaruahhar a si ko. Jesuh cu a Pa sin ah vancung ah a kir ṭhan cang i, amah zultu hna cung ah Pathian thiangthlarau kha a run thlet. Hi thlarau nih zeidah a tuahter khawh hna nan hngal maw? An zapi in holh phun dangdang in bia an chim cio.

Jerusalem khua chung i mi tampi nih thlitu fakpi hrang bantuk thawng cu an theih cio i zeidah a cang ti zoh awk ah an ra. Mi cheukhat cu Israel mi hna an Pentekos puai caah a rami miphun dang an si. Hi khual hna cu an khuaruah a har ngaingai! Pathian nih a tuahmi khuaruahharnak thil hna kong kha zultu hna nih anmahle holh cio in an chim kha an theih hna.

‘Hi mi hna cu an zapi in Kalili mi lawngte an si ko ṭung. Zeitindah kanmahle kan ratnak ram holh cio in holh phun dangdang in bia an chim khawh kun hnga?’ tiah khual pawl nihcun an ti.

Cutik ah Piter cu a tho i annih kha a chimh hna. A aw kha a chuah i, mi hna kha Jesuh thah a sinak kong le Jehovah nih a thawhterṭhannak kha a chimh hna. ‘Atu cu Jesuh cu vancung ah a Pa orhlei kam ah a ṭhu cang. Cun biakammi thiangthlarau kha a run thlet. Cucaah hi khuaruahhar thil hna hi nan hmuh le nan theihmi a si,’ tiah Piter nih a ti hna.

Piter nih hi bantuk in a chim tik ah, mi tampi cu Jesuh cung i an tuahmi thil vialte ruang ah an ngaih a chia. Cutikah: ‘Zeidah kan tuah lai?’ tiah an hal. Piter nih: ‘Nan nunning kha i thleng u law tipil ing u,’ tiah a ti hna. Cucaah khi ni ah minung 3,000 tipil an ing i, Jesuh zultu ah an cang.

Lamkaltu 2:1-47.



Biahalnak hna

  • Hmanthlak chungah kan hmuh bantukin Jerusalem in a hngakmi Jesuh zultu pawl nih zeidah an ton?
  • Jerusalem a rak tlawngmi hna nih zei khuaruahhar thil dah an hmuh?
  • Piter nih mi hna sinah zei kong dah a fianter?
  • Piter a chimmi kha an ngaih dih hnuah mi cu zeitindah an thinlung a um i annih kha zei tuah awk dah Piter nih a chimh hna?
  • C.E. 33, Pentekos ni ah tipil a ingmi pa zeizat dah an si?

Biahalnak dang hna

  • Lamkaltu 2:1-47 rel.

    Lamkaltu 2:23, 36 i Piter a chimmi bia nih Jesuh a thihnak ah Judah miphun nih a ningpi in ṭuanvo an ngei ti kha zeitindah a rak langhter? (1 Thes. 2:14, 15)

    Baibal hmang in i ruahṭinak ah Piter nih a ṭhami zohchunhawk zeitindah a chiah? (Lam. 2:16, 17, 29, 31, 36, 39; Kol. 4:6)

    Jesuh nih kan pek lai tiah bia a kamhmi “vancung pennak tawh” a pakhatnak kha Piter nih zeitindah a hman? (Lam. 2:14, 22-24, 37, 38; Matt. 16:19)