A ummi cazin ah kal

A ummi cazin ah kal

Tuanbia 103: Hrenh Mi Khaan Chung Ah

Tuanbia 103: Hrenh Mi Khaan Chung Ah

Jesuh ruak an vuinak thlan in Piter le Johan an kal hnu ah, Mari cu amah lawng in cuka ahcun a um i a ṭap. Cu hnu ah a kun i thlan chung lei kha, hmasa hmanthlak i kan hmuh bang khan a bih. Cun vancungmi pahnih kha a hmuh hna! Annih nih: ‘Zeicahdah na ṭah?’ tiah an hal.

Mari nih: ‘Ka Bawipa kha an lak cang i khoikadah an chiah ka hngal lo,’ tiah a leh hna. Cun Mari cu aa mer i mipa pakhat a hmuh. Amah nihcun: ‘Ahodah na kawlmi cu a si?’ tiah a hal.

Mari nih cu mipa cu dum cawngtu a si i, Jesuh ruak cu amah nihcun a lak rua tiah a ruah. Cucaah: ‘Na lak a si ahcun na chiahnak kha ka chim tuah,’ tiah a ti. Sihmanhsehlaw a min in a hun auh tik ah, Mari nih Jesuh a si kha a hngalh. A tli i zultu hna kha: ‘Bawipa cu ka hmuh cang!’ a va ti hna.

Cu ni tlai deuh hnu ah, zultu pahnih Emmaus khua lei an kal lio ah khan, mipa pakhat nih a zulh ve hna. Jesuh thah a si cang caah zultu hna cu an ngaih a chia ngaingai. Sihmanhsehlaw an kal pah in mipa nihcun an hna a ngamter deuhmi Baibal chung i thil tampi kong kha a chimh hna. A donghnak ah rawl ei awk i an i dinh tik ah zultu hna nihcun Jesuh a si kha an hngalh. Cun Jesuh cu a lo ṭhan i, zultu pahnih hna cu lamkaltu hna kha amah kong va chimh awk ah Jerusalem lei khulrang in an kir ṭhan.

Mah lio ahcun Jesuh cu Piter sin zong ah a lang ve. Midang nih mah cu an theih tik ah an lau ngaingai. Cun cu zultu pahnih cu Jerusalem lei ah an kal i lamkaltu pawl kha an ton hna. Lampi ah Jesuh an sin i a langh ve nak kong kha an chimh hna. Cu kong an chim lengmang lio ahcun, khuaruahhar awk thil a tlungmi cu nan hngal maw?

Hmanthlak hi zoh hmanh u. Innka cu aa hrenh ko nain an umnak khaan chung ah Jesuh cu a rung lang. Zultu pawl cu an lung aa lawm tuk hringhran! Cucu lunglawmhnak ni a si lo mei? Cu tiang i a zultu hna sih ah Jesuh a langhnak cu voi zeizat a si cang ti nan rel kho maw? Voi nga a si lo mei?

Jesuh a zultu pawl sin a langh lio

Jesuh a langh lio ah lamkaltu Thomas cu an sin ah a um ve lo. Cucaah zultu pawl nih: ‘Bawipa cu kan hmuh cang!’ tiah an chimh. Sihmanhsehlaw Thomas nihcun keimah hrimhrim nih Jesuh cu ka hmuh lawng ah ka zumh lai a ti. Khi hnu ni riat ah zultu pawl cu hrenh mi a khaan pakhat chung ah an um ṭhan i, cu lio ahcun Thomas zong an sin ah a um ve cang. Chikkhatte ah a khaan chung ahcun Jesuh cu a rung lang. Atu cu Thomas nih a zumh ve cang.

Johan 20:11-29. Luka 24:13-43.



Biahalnak hna

  • Mari nih dum cawngtu ah a ruah mipa kha zeidah a chimh, sihmanhsehlaw mah pa cu Jesuh a si ti kha zeitindah a hngalh?
  • Lamkaltu pahnih Emmaus khua lei an kal lio ah zeidah a cang?
  • Lamkaltu pahnih nih Jesuh an hmuhnak kong kha lamkaltu dang pawl an chimh hna lio ah zei khuaruahhar thil dah a cang?
  • Jesuh nih a zultu hna sinah voi zeizat dah aa langhter?
  • Lamkaltu pawl nih Bawipa an hmuh ti kha Thomas nih a theih tikah zeidah a chim, sihmanhsehlaw mah hnu niriat ah zeidah a cang?

Biahalnak dang hna

  • Johan 20:11-29 rel.

    Johan 20:23 ah minung nih sual ngaihthiamnak nawl an ngei ti kha Jesuh nih a chim duhmi a si maw? Fianter. (Salm 49:2, 7; Isa. 55:7; 1 Tim. 2:5, 6; 1 Johan 2:1, 2)

  • Luka 24:13-43 rel.

    Baibal biatak kha lungtho tein kan cohlan khawh nakhnga kan lungthin kha zeitindah kan sersiam khawh? (Luke 24:32, 33; Ezra 7:10, NW: Ezra nih…a lungthin kha a sersiam; Matt. 5:3; Lam. 16:14; Heb. 5:11-14)