A ummi cazin ah kal

A ummi cazin ah kal

Tuanbia 98: Oliv Tlang Cung Ah

Tuanbia 98: Oliv Tlang Cung Ah

Hi cu Oliv tlang cung ah Jesuh a rak phanh lio a si. Amah sin i mi pali hna cu a lamkaltu an si. Annih cu unau a simi Andru le Piter, cun unau a si vemi hna Jeim le Johan an si. Hlapi in cunglei i nan hmuhmi cu Jerusalem khua chung i Pathian biakinn a si.

La fate cit in Jerusalem khua chung ah Jesuh a luhnak in ni hnih a si cang. Cacawn nihnih ni a si. Khi ni tuan deuh ah khan Jesuh cu biakinn chung ah a rak um. Cuka ahcun tlangbawi pawl nih Jesuh cu thah awk ah kan tlaih lai tiah an rak i zuam. Sihmanhsehlaw mi hna nih Jesuh cu an duh caah an rak tlai ngam ṭhan lo.

Jesuh le a lamkaltu pawl

Khi biaknak lamhruaitu hna kha Jesuh nih: ‘Nannih rul ṭhalo hna le rul hrin hna!’ a ti hna. Cun an tuahmi thil ṭhalo vialte ruang ah Pathian nih dan an tat te hna lai tiah zong a rak chim. Cu hnu ah Jesuh cu Oliv tlang cung ah cun a rak kai i, cuka ahcun hi lamkaltu pali nih amah kha bia a phunphun an hal. Zeidah an hal ti nan hngal maw?

Lamkaltu hna nihcun hmailei thil kong an hal. Vawlei cung i ṭhatlonak vialte kha Jesuh nih a donghter te lai ti kha an hngalh. Sihmanhsehlaw cucu zeitik ahdah a si lai ti kha hngalh an duh. Siangpahrang in uk awk ah Jesuh cu zeitikahdah a rat ṭhan te hnga?

Jesuh nih vawlei cung i amah zultu hna nihcun a rat ṭhan tik ahcun an hmu kho ti lai lo ti kha a hngalh. Zeicah kan ti ahcun amah cu vancung ah a um lai i, cuka ahcun amah cu an hung hmu kho lai lo. Cucaah Jesuh nih vancung i Singpahrang in a uk tik ah vawlei cung ah a tlung te laimi thil cheukhat hna kha a lamkaltu pawl cu a chimh hna. Khi thil cheukhat hna cu zeidah an si?

Jesuh nih ral ngan pipi a um te lai, minung tampi cu an zaw lai i, rawlṭam in an um lai, sualnak cu a karh ngaingai lai i, lihninhnak ngan pipi zong a um lai tiah a ti. Cun Pathian pennak thawngṭha zong vawlei cung hmun kip ah chim dih a si lai a ti ve. Kanmah chan chung ah hi thil hna a tlun cu kan hmuh cang maw? A si! Cucaah Jesuh cu atu ah vancung ah a uk lio lengmang cang ti kan hngalh khawh. A rauh hlan ah vawlei cung i ṭhatlonak vialte zong a donghter dih ve cang lai.

Matthai 21:46; 23:1-39; 24:1-14; Marka 13:3-10.



Biahalnak hna

  • Hmanthlak chungah aho khi dah Jesuh a si i a sinah a ummi hi ahote dah an si?
  • Biakinn chungah Jesuh kha tlangbawi pawl nih zeidah tuah an i zuam i annih kha zeidah a chimh hna?
  • Lamkaltu pawl nih Jesuh kha zeidah an hal?
  • Jesuh nih van ah Siangpahrang in a uk tikah vawlei ah a tlung dingmi thil cheukhat kha a zultu pawl kha zeicah a chimh hna?
  • Jesuh nih vawlei cung i ṭhatlonak vialte a dih hlan ah zeidah a cang lai tiah a chim?

Biahalnak dang hna

  • Matthai 23:1-39 rel.

    Baibal nih vawlei lei upatnak min hman khawh a si tiah a langhter nain, Khrihfabu chungah upatnak min hmannak kong he aa tlai in Matthai 23:8-11 i Jesuh bia nih zeidah a langhter? (Lam. 26:25; Rom 13:7; 1 Pit. 2:13, 14)

    Farasi mi pawl nih mi hna kha Khrihfa an can nakhnga lo zei hmangin dah kham an i zuam i tuchan biaknak lamhruaitu pawl nih cu bantuk lam kha zeitindah an hman ve? (Matt. 23:13; Luka 11:52; Johan 9:22; 12:42; 1 Thes. 2:16)

  • Matthai 24:1-14 rel.

    Matthai 24:13 nih a fekmi si a biapitnak kha zeitindah fak khun in a langhter?

    Matthai 24:13 i “dongh” timi sullam nih zeidah a langhter? (Matt. 16:27; Rom 14:10-12; 2 Kor. 5:10)

  • Marka 13:3-10 rel.

    Mark 13:10 i zei bia nih dah thawngṭha chim a biapitnak kha a langhter i Jesuh bia nih zeitindah a kan hnorsuan awk a si? (Rom 13:11, 12; 1 Kor. 7:29-31; 2 Tim. 4:2)