A ummi cazin ah kal

A ummi cazin ah kal

Tuanbia 96: Jesuh Nih Mizaw A Damter Hna

Tuanbia 96: Jesuh Nih Mizaw A Damter Hna

Ram chung dih lak a tlawn pah in Jesuh nih mizaw kha a damter hna. Hi khuaruahharnak thawngpang cu khuate kip le khuapi kip ah khan a thang dih. Cucaah mi hna nih kebei mi hna le mitcaw mi hna le hnachet mi hna le mizaw dang tampi kha a sin ah an ratpi hna. Cun Jesuh nih an zapi tein a damter dih hna.

Johan nih Jesuh cu tipil a peknak in kum thum leng a si cang. Jesuh nih a lamkaltu hna kha Jerusalem ah ka kal lai i an ka thah lai i ni thum hnu ah ka tho ṭhan lai tiah a chimh hna. Cu caan karlak chung ahcun Jesuh nih mizaw cu a damter hna.

Jesuh nih a zawmi nu a damter lio

Nikhat cu Jesuh nih Sabbath ni ah mi kha a cawnpiak hna. Sabbath cu Judah mi hna caah dinh ni a si. Hi nan hmuh mi nu cu a zaw ngaingai cang. Kum 18 chung a keng a kul i ding tein a dir kho ti lo. Cucaah Jesuh nih a cung ah kut a chuan i cu cangka cun ding tein a hung dir kho. Amah cu damh a si cang!

Cu ruang ahcun biaknak lamhruaitu pawl cu an thin a hung. An lak i mi pakhat nih zapi sin ah khan: ‘Rian ṭuannak ding ah ni ruk pei a um ko cu; cu ni ruk chung ahcun tah nan rat i nan rak i damter. Sabbath ni ah hin cun ti hlah ngat u!’ tiah a hun ti hna.

Sihmanhsehlaw Jesuh nih: ‘Miṭhalo hna. Ahopaoh nih laa cu Sabbath ni ah nan thlah hna i ti dinh awk ah nan kalpi ko ṭung hna. Cucaah hi kum 18 chung a zaw cangmi rethei nu hi Sabbath ni ah damter awk a si ve hnga lo maw?’ tiah a leh hna. Jesuh a bia lehnak nih khi miṭhalo hna cu an ning a zahter ngaingai hna.

Khi hnu ah Jesuh le a lamkaltu pawl cu Jerusalem lei ah an kal. Jeriko khua an lonh kate ah khin mitcaw mi pahnih nih Jesuh a ra lio ti kha an theih ve. Cucaah annih nih: ‘Jesuh, kan bawm tuah!’ tiah an au.

Jesuh nih mitcaw mi hna cu a auh hna i: ‘Zeidah kan tuahpiak seh ti nan ka duh?’ tiah a hal hna. Annih nih: ‘Bawipa, kan mit hung kan auter law kan duh,’ tiah an ti. Jesuh nih an mit cu a tongh hna i hmakhatte ah khua an hmu kho! Zeicahdah Jesuh nih hi khuaruahhar thil vialte cu a tuah hna nan hngal maw? Zeicah kan ti ahcun mi kha a dawt hna i, amah kha ka zum hna seh ti a duh caah a si. Cun Siangpahrang in a uk tik ahcun vawlei cung mi ahohmanh an zaw ṭhan ti lai lo.

Matthai 15:30, 31; Luka 13:10-17; Matthai 20:29-34.



Biahalnak hna

  • Jesuh nih ram chung dih lak a tlawn pah in zeidah a tuah?
  • Jesuh tipil a in nak in kum thum a rauh hnuah a zultu pawl kha zeidah a chimh hna?
  • Hmanthlak chung i mi hna hi ahote dah an si i Jesuh nih minu caah zeidah a tuah?
  • Biaknak lamhruaitu pawl an bia alnak Jesuh lehmi nih annih kha zeicah an ning a zahter hna?
  • Jesuh le a lamkaltu pawl Jeriko khua pawng an um lioah mitcaw pahnih hna kha Jesuh nih zeidah a tuahpiak hna?
  • Zeicah Jesuh nih khuaruahhar thil kha a tuah?

Biahalnak dang hna

  • Matthai 15:30, 31 rel.

    Jesuh thawngin Jehovah i zei khuaruahhar ṭhawnnak hna dah a lang i, mah nih Jehovah i bia aa kammi vawlei thar kongah zeitindah a kan hngalhthiamter awk a si? (Salm 37:29; Isa. 33:24)

  • Luka 13:10-17 rel.

    Jesuh nih Sabbath ni ah i phundang ngai in a tuahmi khuaruahhar thil cheukhat nih kum thongkhat a uknak ah minung nih an hmuh hngami damnak kha zeitindah a langhter? (Luka 13:10-13; Salm 46:9; Matt. 12:8; Kol. 2:16, 17; Biat. 21:1-4)

  • Matthai 20:29-34 rel.

    Mah Baibal bia nih Jesuh cu a rian a tam nain minung hna bawmh awkah i manh lo tiangin a um bal lo ti kha zeitindah a langhter i mah in khan zeidah kan i cawn khawh? (Deut. 15:7; Jeim 2:15, 16; 1 Johan 3:17)