A ummi cazin ah kal

A ummi cazin ah kal

Tuanbia 94: Ngakchia Kha A Dawt Hna

Tuanbia 94: Ngakchia Kha A Dawt Hna

Jesuh nih ngakchiapate a pommi hi zoh tuah u. Ngakchia kha Jesuh nih a dawt taktak hna ti nan chim khawh lai. A zohtu hna cu a lamkaltu an si. Jesuh nih an sin ah zei bia dah a chim? A lehnak kawl tuah u sih.

Jesuh le a lamkaltu pawl cu khuallam hlapi an tlawnnak in an tlun kate a si. An ratpah in lam ah lamkaltu pawl cu bia an rak i al pah. Cu caah an khual tlawnnak lam a dih tik ah Jesuh nih: ‘Lam ah khan zeidah nan rak i al pah?’ tiah a hal hna. Angaite ti ahcun an rak i almi kong cu Jesuh nih a hngalh ko. Sihmanhsehlaw lamkaltu pawl nih an chim hnga maw ti hngalh awk ah a halmi hna a si.

Jesuh le ngakchiapate

Lamkaltu pawl nihcun anmah lak ah ahodah a ngan bik hnga ti an rak i al caah an let ngam lo. Lamkaltu cheukhat cu midang nak in a ngan deuhmi si kha an duh. A ngan bikmi si duh cu a hmaan lo ti kha Jesuh nih zeitindah a chimh hna lai?

Ngakchiapate pakhat kha a auh i, an zapi hmai ah a dirter. Cun amah zultu hna sin ah: ‘Hihi a hmaan tein hngal u ti kan duh hna. Nannih cu nan i thlen i ngakchia bantuk ah nan i can lo ahcun, Pathian pennak chung ah nanlut kho bal lai lo. Pennak chung i a ngan bikmi cu hi ngakchia bantuk ah aa cangmi cu a si lai,’ tiah a ti hna. Zeicahdah Jesuh nih hi bia cu a chim hnga nan hngal maw?

Zeicah kan ti ahcun ngakchia cu midang nak in mingan deuh le biapi deuh si duhnak kha an ruat bal lo. Cucaah lamkaltu pawl cu hi bantuk lam in ngakchia bantuk si an cawn awk a si i, mingan le biapi sinak kong ah an i sik le an i al len awk a si lo.

Caan dang zong ah Jesuh nih ngakchia a dawtnak hna cu a rak langhter tawn. Khi hnu thla tlawmpal ahcun mi cheukhat nih an fale kha Jesuh sin ah an ratpi hna. Lamkaltu pawl nih ngakchia kha ratpi lo awk ah an kham hna. Sihmanhsehlaw Jesuh nih a lamkaltu pawl cu: ‘Ngakchia cu ka sin ah ratpi ko hna seh law thlauh hna hlah u, zeicahtiah Pathian pennak cu hi bantuk mi hna ta pei a si cu,’ a ti hna. Cun Jesuh nih ngakchia cu a kut in a lak hna i thluachuah a pek hna. Jesuh nih ngakchia a dawt hna ti hngalh cu lunglawmh awk ngai a si lo mei?

Matthai 18:1-4; 19:13-15; Marka 9:33-37; 10:13-16.



Biahalnak hna

  • Lamkaltu pawl nih khual lam hlapi in an tlunnak lam ah zeidah an i al?
  • Zeicah Jesuh nih ngakchiapate kha a auh i a zultu hna lakah a dirter?
  • Zeitilam indah lamkaltu pawl nih ngakchia bantuk si kha an cawn awk a si?
  • Thla tlawmpal a rauh hnuah, Jesuh nih ngakchia pawl a dawtnak hna kha zeitindah a langhter?

Biahalnak dang hna

  • Matthai 18:1-4 rel.

    Zeicah tahchunhnak hmang in Jesuh nih mi a cawnpiak? (Matt. 13:34, 36; Mar. 4:33, 34)

  • Matthai 19:13-15 rel.

    Pennak thluachuahnak i hrawm kan duh a si ahcun ngakchia hna i zei ziaza dah kan i cawn lai? (Salm 25:9; 138:6; 1 Kor. 14:20)

  • Marka 9:33-37 rel.

    Jesuh nih a zultu pawl kha a sangmi dirhmun hmuh an duhmi kongah zeidah a cawnpiak hna? (Mar. 9:35; Matt. 20:25, 26; Gal. 6:3; Fil. 2:5-8)

  • Marka 10:13-16 rel.

    Jesuh cu zeitindah naih a fawimi a si i Khrihfa upa hna nih amah zohchunh awk in zeidah an cawn khawh? (Mar. 6:30-34; Fil. 2:1-4; 1 Tim. 4:12)