A ummi cazin ah kal

A ummi cazin ah kal

Tuanbia 93: Jesuh Nih Mi Tampi Rawl A Dangh Hna

Tuanbia 93: Jesuh Nih Mi Tampi Rawl A Dangh Hna

Tuksapur thil pakhat a rak tlung. Tipil petu Johan an rak thah ka a si. Siangpahrang nupi Herodias nih amah cu a rak duh lo. Cucaah Johan lu kha siangpahrang cu a rak tanter khawh.

Mah kong cu a theih tik ah Jesuh cu a ngaih a chia ngaingai. Hmunking pakhat ah amah lawng a kal. Sihmanhsehlaw mi hna nih an zulh. Jesuh nih mi bupi kha a hmuh tik hna ah a zangfah ngai hna. Cucaah Pathian pennak kong kha a chimh hna i an mizaw hna kha a damter hna.

Cu ni zanlei ah a zultu hna cu a sin ah an ra i: ‘Atu cu khua a tlai cang i hika cu hmunking zong a si fawn. A pawngkam khua hna ah rawl an i cawk khawh nak hnga mihna cu kalter cang hna,’ tiah an ti.

Jesuh nih mibu rawl a dangh hna lio

‘An kal a herh lai lo. Ei awk kha nanmah nih pe hna u,’ tiah Jesuh nih a leh. Cuhnu ah Filip lei kha aa mer i: ‘Mi vialte kha aa za in dangh awk ah khuazei in dah rawl kan cawk khawh hnga? tiah a hal.

‘Tlawmte cio ei ding cawknak hmanh ah tangka tampi a dih lai,’ tiah Filip nih a leh. Andru nih: ‘Hi kan rawl phortu ngakchiapa nih hin changreu tlang nga le nga pahnih a ngeih. Sihmanhsehlaw hi vialte minung caah hin cun a za naisai lai lo,’ tiah a hun ti.

‘Mi hna kha ram cung ah ṭhutter hna u,’ tiah Jesuh nih a ti hna. Cuhnu ah rawl caah Pathian vel kha a lawmh i, changreu le nga kha a cheu dih hna. Cun zultu hna nih changreu le nga cu mi vialte kha an pek hna. Cuka ahcun pa lawngte 5,000 an si i nu le ngakchia thong tampi an um rih. An zapi tein khim tein an ei dih. Cun a zultu hna nih a tangmi kha an char i, sei hleihnih an char.

Cuhnu ah Jesuh nih a zultu hna kha lawng cung ah kai u a ti hna i, Kalili Rili ral khattelei ah a kalter hna. Zan ah thlichia fakpi a hrang i, tilet nih lawng cu khatlei khatlei a thui caah a zultu pawl cu an thin a phang ngaingai. Cun zanṭim hrawng ah khin ti cung ah a ke in an sin lei ah a ra lengmangmi mi pakhat an hei hmuh. An hmuhmi kha zei a si ti an hngalh lo caah an ṭih tuk i an ai dih.

‘Ṭih hlah u, keimah ka si,’ tiah Jesuh nih a ti hna. An zum kho rih lo. Cucaah Piter nih: ‘Bawipa, nangmah taktak na si ahcun ti cung in nangmah sin rat awk ah a nawl ka pe tuah,’ a ti. Jesuh nih: ‘Ra ko!’ tiah a ti. Piter cu a chuak i ti cung ah a ke in a kal ve! Cun a thin a hung phang i ti chung ahcun a pil hnik, sihmanhselaw Jesuh nih amah cu a khamh.

Khi hnu voikhat lio ah Jesuh nih mi thong tampi a dangh ṭhan hna. Cu tan ahcun changreu tlang sarih le nga tlawmpal in a dangh hna. Mi vialte nih khim tein an ei ṭhan. Jesuh nih mi a zohkhenh ning hna cu khuaruahhar awk tlak a si lo mei? Pathian thimmi siangpahrang in amah nih a uk tik ahcun zei kong hmanh ah kan thin a phang ti lai lo!

Matthai 14:1-32; 15:29-38; Johan 6:1-21.



Biahalnak hna

  • Zei tuksapur thil dah tipilpetu Johan cungah a rak tlung i mah nih khan Jesuh kha zeitindah a umter?
  • Zeitindah Jesuh nih a hnu a zulmi mibu kha rawl a dangh hna i a hleimi zeizat dah a si?
  • Zeicah zan ah lamkaltu hna nih an ṭih ngai i Piter nih zeidah a ton?
  • Jesuh nih mi thong tampi kha zeitindah a voihnihnak rawl a dangh ṭhan hna?
  • Jesuh nih Pathian Siangpahrang in vawlei a uk tikah zeicah a ṭhat tuk hringhran lai?

Biahalnak dang hna

  • Matthai 14:1-32 rel.

    Matthai 14:23-32 i ṭialmi bia nih Piter a umtu zia kongah zeidah a kan theihter?

    Piter cu patling a hung si i khulrang in thil tuah a hmanmi a zia a tei khawhnak kong kha Baibal tuanbia nih zeitindah a langhter? (Matt. 14:27-30; Johan 18:10; 21:7; Lam. 2:14, 37-40; 1 Pit. 5:6, 10)

  • Matthai 15:29-38 rel.

    Jesuh nih a Pa sinin hmuhmi ti le rawl a upatnak kha zeitindah a langhter? (Matt. 15:37; Johan 6:12; Kol. 3:15)

  • Johan 6:1-21 rel.

    Nihin Khrihfa hna nih uktu cozah upatnak ah Jesuh i a nunning kha zeitindah kan i cawn khawh? (Johan 6:15; Matt. 22:21; Rom 12:2; 13:1-4)