A ummi cazin ah kal

A ummi cazin ah kal

Tuanbia 92: Jesuh Nih Mithi A Thawhter Hna

Tuanbia 92: Jesuh Nih Mithi A Thawhter Hna

Hika i nan hmuhmi ngakchianu cu kum 12 a si. Jesuh nih a kut in a tlaih i, a nu le a pa cu a pawng ah an dir ko. Zeicah annih cu aa lawm ngaimi an lawh? zoh tuah u sih.

Jesuh nih Jairu fanu a thawhter lio

Ngakchianute a pa cu Jairu an timi upa pakhat a si. Ni khat cu a fanute cu a zaw i, ihkhun cung ah an ihter. Sihmanhsehlaw tlawmpal hmanh a dam deuh hrim lo. A zawtnak cu a zual chin lengmang. Ngakchianute cu a thih hnik cang caah Jairu le a nupi cu an thin a phang ngaingai. Amah cu an fanu ngeihchunte a si. Cucaah Jairu cu Jesuh kawh awk ah a kal. Jesuh nih khuaruahhar thil tampi a tuahmi hna kong kha a theih caah a si.

Jairu nih Jesuh cu a hmuh tik ah, amah cu mibu nganpi nih an rak kulh ko. Sihmanhsehlaw Jairu nih mibu lak ahcun aa tenh i Jesuh ke hram ah a bawk. ‘Ka fanu cu a zaw i a zual ko. Zangfahnak in ra law ra damter ko tuah,’ tiah Jesuh kha a nawl. Jesuh nih ka ra ko lai tiah a ti.

An kal lio ah khan, mibupi nihcun an hun naih deuh ve. Chikkhatte ah Jesuh cu a dir i: ‘Ahodah a ka tong?’ tiah a hal hna. A chung in ṭhawnnak a chuah kha a hngalh caah pakhat khat nih an ka tongh ko ti kha a hngalh. Aho dah a si? Kum 12 chung a rak zaw cangmi nu pakhat a si. Amah cu a ra i, Jesuh thil kha a tongh i a dam colh ko!

Jairu nih mah cu a hmuh caah Jesuh caah mi pakhat damter cu zeitluk fawimi thil dah a si ti kha a hngalh i a hna a ngam ngai. Sihmanhsehlaw mah liote ahcun zualko pakhat a ra i, ‘Jesuh kha hna hnawh len ti hlah. Na fanu cu a thi cang,’ tiah Jairu kha a hun chimh. Cu bia cu Jesuh nih a theih i: ‘Na thin phang hlah, a dam te ko lai,’ tiah Jairu kha a ti.

A donghnak ah Jairu a inn a phanh tik ah, mi hna cu ngaihchiatnak he an rak ṭap len ko. Sihmanhsehlaw Jesuh nih: ‘Ṭap hlah u. Ngakchianu cu a thi lo. Aa hngilh pei a si ko cu,’ a ti hna. Sihmanhsehlaw a thi ko ti kha an hngalh caah an ni i, Jesuh kha an nihsawh.

Cutikah Jesuh nih ngakchianu a pa le a nu le a lamkaltu pathum hna cu ngakchianu ihnak khaan chung ah a luhpi hna. A kut in a vun tliah i: ‘Tho tuah!’ a ti. Cun hika i nan hmuh bang hin ngakchianu cu a nung ṭhan. Cun a tho i a kal! Cu ruang ah a pa le a nu cu an i lawmh ngaingaimi a si.

Amah cu Jesuh nih thihnak in a thawhter hmasa bikmi a si lo. A hmasa bikmi Baibal nih a chimmi cu Nain khua i nuhmeinu fapa a si. A hnu ah Mari le Martha an ṭapa Lazaruh zong kha Jesuh nih a thawhter ṭhan ve. Pathian thimmi siangpahrang in Jesuh nih a uk tik ahcun mithi tampi kha a nunter ṭhan te hna lai. Cucu kan i lawmh awk a si hnga lo maw?

Luka 8:40-56; 7:11-17; Johan 11:17-44.



Biahalnak hna

  • Hmanthlak chung i ngakchianu a pa cu ahodah a si i, amah le a nupi cu zeicah an thin a phan ngaingai?
  • Jairu nih Jesuh a hmuh tikah zeidah a tuah?
  • Jairu inn lei Jesuh a kal lio ah zeidah a cang i lam ah zei thawng dah Jairu nih a theih?
  • Zeicah Jairu inn ah a ummi hna nih Jesuh kha an nihsawh?
  • Lamkaltu pathum le ngakchianu a nu le a pa he ngakchianu a ihnak khaan an luh hnu ah Jesuh nih zeidah a tuah?
  • Jesuh nih ahote dah thihnak in a thawhter rih hna i, mahnih khan zeidah a langhter?

Biahalnak dang hna

  • Luka 8:40-56 rel.

    Jesuh nih thichuah zawtnak a ngeimi nu kha zaangfahnak le ruahthiamnak a ngeihnak zeitindah a langhter i, nihin Khrihfa upa hna nih mah in khan zeidah an i cawn khawh? (Luka 8:43, 44, 47, 48; Lev. 15:25-27; Matt. 9:12, 13; Kol. 3:12-14)

  • Luka 7:11-17 rel.

    Jesuh nih Nain khua nuhmeinu a lehrulhnak in dawtmi hna i thih takmi hna nih hnangamnak nganpi zeitindah an hmuh khawh? (Luka 7:13; 2 Kor. 1:3, 4; Heb. 4:15)

  • Johan 11:17-44 rel.

    Kan dawtmi pakhat a thih tikah ngaihchiat cu a phung a si ti kha Jesuh nih zeitindah a langhter? (Johan 11:33-36, 38; 2 Sam. 18:33; 19:1-4)