A ummi cazin ah kal

A ummi cazin ah kal

Tuanbia 91: Jesuh Nih Tlang Cung Ah A Cawnpiak Hna

Tuanbia 91: Jesuh Nih Tlang Cung Ah A Cawnpiak Hna

Hika i Jesuh a ṭhut ko hi zoh tuah u. Kalili i tlang pakhat cung ah hi mi vialte hi a cawnpiak hna. Amah pawngte i a ṭhumi hna cu a zultu pawl an si. Anmah lak in minung 12 kha a lamkaltu caah a thim hna. Lamkaktu pawl cu a bik in Jesuh a zultu an si. An min nan hngal hna maw?

Jesuh nih a cawnpiak hna lio

Annih cu Simon Piter le a nau Andru. Cun unau a si vemi hna Jeim le Johan. Lamkaltu dang pakhat cu Judas an ti hna. Pakhat cu Judas Iskariot a si i, a dang Judas cu Tadias timi min in an auh. Cun Filip le Nathanael (Barthelomeo ti zong in an auh ve), cun Matthai le Thomas an si.

Samaria peng in an hung kir hnu ah, Jesuh nih: ‘Vancung pennak cu a nai cang,’ tiah chim hram a thok. Khi pennak cu zei a si ti nan hngal maw? Hi cu a um taktakmi Pathian cozah pakhat a si. Jesuh cu cu pennak i siangpahrang cu a si. Vancung in a uk lai i, vawlei cung ah daihnak a chuahter lai. Vawlei pumpuluk cu aa dawh ngaimi paradis ah Pathian pennak nih a canter lai.

Kahin Jesuh nih mi hna kha pennak kong cu a cawnpiak hna. ‘Nannih nih hi bantuk in thla nan cam lai.’ Vancung khua i a um kan Pa, na min cu upat si ko seh. Na pennak cu rung tlung ko seh. Na duhnak cu vancung ah an tuah bang in vawlei cung ah tuah si ve ko seh,’ tiah mi kha a cawnpiak hna. Mi tampi nih hi cu ‘Bawipa Thlacamnak’ an ti. Midang nih ‘Kan Pa’ tiah an ti ve. Hi thlacamnak cu a dih lak in nan chim kho maw?

Pakhat le pakhat zeitindah i pehtlaih awk a si ti zong Jesuh nih a cawnpiak hna. ‘Na caah tuah hna seh ti na duhmi kha midang caah va tuah ve,’ a ti. Midang nih velngeihnak he nan sin ah pehtlaihnak an ngeihmi cu nan duh lo mei? Cucaah, Jesuh nih midang cung ah vel nan ngei lai tiah a ti. Mikip cubantuk in paradis vawlei ah an tuah tik ahcun a nuam ngai lai lo maw?

Matthai a ngan 5 in 7; 10:1-4.



Biahalnak hna

  • Hmanthlak chungah Jesuh nih khoika ah dah a cawnpiak hna i amah pawngah a ṭhumi cu ahote dah an si?
  • Lamkaltu 12 hna an min hodah an si?
  • Jesuh nih a chimmi Pennak cu zeidah a si?
  • Jesuh nih mi hna kha zei ca i thlacam awkah dah a chimh hna?
  • Mi hna kha pakhat le pakhat zeitindah nan i pehtlaih awk a si ti in dah a chimh hna?

Biahalnak dang hna

  • Matthai 5:1-12 rel.

    Kan thlarau lei chambaunak a hngalmi kan sinak kha zeitindah kan langhter khawh? (Matt. 5:3; Rom 10:13-15; 1 Tim. 4:13, 15, 16)

  • Matthai 5:21-26 rel.

    Matthai 5:23, 24 nih kan unau he kan i pehtlaihnak nih Jehovah he kan i pehtlaihnak a hnorsuan ti kha zeitindah fak khun in a langhter? (Matt. 6:14, 15; Salm 133:1; Kol. 3:13; 1 Johan 4:20)

  • Matthai 6:1-8 rel.

    Zei bantuk phun mah le mah miding ah i ruahnak dah Khrihfa hna nih kan hrial lai? (Luka 18:11, 12; 1 Kor. 4:6, 7; 2 Kor. 9:7)

  • Matthai 6:25-34 rel.

    Jesuh nih pumsa lei kong ah Jehovah i bochan a herhnak kong he a tlai in zeidah a kan cawnpiak? (Ex. 16:4; Salm 37:25; Fil. 4:6)

  • Matthai 7:1-11 rel

    Matthai 7:5 i a fiang ngaimi tahchunhnak nih zeidah a kan cawnpiak? (Ptb. 26:12; Rom 2:1; 14:10; Jeim 4:11, 12)