A ummi cazin ah kal

A ummi cazin ah kal

Tuanbia 84: Vancungmi Pakhat Mari A Rak Leng

Tuanbia 84: Vancungmi Pakhat Mari A Rak Leng

Hi aa dawh ngaimi nu cu Mari a si. Amah cu Nazaret khua mi Israel mi a si. Mi ṭha ngai a si kha Pathian nih a hngalh. Cucaah a vancungmi Gabriel kha a sin i bia chim awk ah a run thlah. Gabriel cu zei chimh awk ah Mari sin ah a ra ti nan hngal maw? Zoh hmanh u sih.

‘Nacung ah diahnak um ko seh, nang cu mithmai ṭha a hmumi nu, na sin ah Jehovah cu a um,’ tiah Gabriel nih amah cu a ti. Mari nih hi mipa cu a hlan ah a rak hmu bal lo. A sullam zeidah a si ti a hngalh lo ca ah a thin a phang. Sihmanhsehlaw Gabriel nih a ṭihnak cun hnangamnak a vun pek colh.

Mari

‘Mari na thin phang hlah. Jehovah cu na cung ah a lung a tling cang. Cucaah khuaruahhar awk tlak thil pakhat an tuahpiak lai. A rauh hlan ah fa pakhat na hrin lai. Cun Jesuh tiah a min na sak lai,’ a ti.

Hi ngakchia cu mi lianngan a si lai i, amah cu Cungnung Bik Pathian Fapa tiah ti a si lai. Jehovah nih amah kha David bantuk in singpahrang ah a ser lai. Sihmanhsehlaw Jesuh cu zungzal in siangpahrang a si lai, a pennak cu zeitik hmanh ah a dong lai lo!’ tiah Gabriel nihcun a vun fianter rih.

Mari nih: ‘Zeitindah hi cu a si khawh lai? Va hmanh ka ngeih rih ṭung lo. Pa aho he hmanh zong ka um ṭi bal rih lo, cucaah zeitindah fa cu ka hrin khawh lai?’ tiah a hal.

Gabriel nih: ‘Pathian ṭhawnnak kha na cung ah aa fuu lai. Cucaah ngakchiate cu Pathian Fapa tiah ti a si lai,’ tiah a leh. Cu hnu ah Mari kha: ‘Na rualchan Elizabeth kha zoh hmanh. Mi nihcun fa hrin awk ah a tar tuk cang an ti. Sihmanhsehlaw a rauh hlan ah fapa pakhat a hrin cang lai. Cucaah Pathian nih a tuah khawh lo mi thil zeihmanh a um lo ti cu na hngalh,’ tiah a chimh rih.

Cutikah Mari nih: ‘Keimah cu Jehovah a salnu ka si! Na chim bang cun ka cung ah si ko seh,’ tiah a ti. Cu hnu ah vancungmi cu a kal.

Cucangka in Mari cu Elizabeth sin ah khulrang in a vung kal. Elizabeth nih Mari a aw a theih tik ah, Elizabeth paw chung i fate cu lawmhnak in aa hlok. Elizabeth cu Pathian thlarau he a khat i, Mari sin ah: ‘Nangmah cu nu vialte lak ah thluachuak bik mi nu na si,’ tiah a ti. Mari cu Elizabeth he thla thum hrawng a um i, cu hnu ah Nazaret khua ah a kir ṭhan.

Mari cu Josef an ti mi pa he an i ṭhitnak caan a nai cang. Asinain Josef nih Mari cu fa a hrin dengmang cang ti kha a theih tik ah, ka ṭhi ṭhan lai lo tiah a lung chung in a ruah. Cutikah Pathian vancungmi nih amah cu: ‘Mari hi na nupi ca i lak awk ah ṭih hlah. Zeicahtiah amah fapa a petu cu Pathian a si,’ tiah a chimh. Cucaah Mari le Josef cu an rak i um i, Jesuh chuahnak ding kha an hngak.

Luka 1:26-56; Matthai 1:18-25.



Biahalnak hna

  • Hmanthlak chung i minu hi ahodah a si?
  • Gabriel nih Mari kha zeidah a chimh?
  • Mari cu pa he an umṭi bal lo nain fa a ngeih lainak kha Gabriel nih zeitindah a chimh?
  • Mari nih a rualchan Elizabeth a tlawn tikah zeidah a cang?
  • Mari fa a ngei cang lai ti kha Josef nih a theih tikah zeidah a ruah, sihmanhsehlaw a ruahnak kha zeicah a thlen ṭhan?

Biahalnak dang hna

  • Luka 1:26-56 rel.

    Pathian Fapa cu thlarau pum khan Mari nau inn chungah ṭhial a si tikah Adam i tlinlonak kong he aa tlai in Luka 1:35 nih zeidah a langhter? (Hag. 2:11-13; Johan 6:69; Heb. 7:26; 10:5)

    Jesuh cu a chuah hlan hmanhah zeitindah upatnak a rak hmuh? (Luka 1:41-43)

    Nihin a hleikhunmi ṭuanvo rian a hmumi Khrihfa hna caah Mari nih zei a ṭhami zohchunh awk dah a chiah? (Luka 1:38, 46-49; 17:10; Ptb. 11:2)

  • Matthai 1:18-25 rel.

    Jesuh cu Emmanuel timi min in auh a si lo nain zeitindah minung pakhat a sinak ah mah min sullam kha a tlinter? (Matt. 1:22, 23; Johan 14:8-10; Heb. 1:1-3)