A ummi cazin ah kal

A ummi cazin ah kal

Tuanbia 80: Pathian Miphun Nih Babilon An Chuahtak

Tuanbia 80: Pathian Miphun Nih Babilon An Chuahtak

Media le Persia miphun hna nih Babilon an laknak in kum hnih dengmang a si cang. Atu cu zeidah a tlung cang zoh hmanh u! A si, Israel mi hna cu Babilon in an chuak cang. Zeitindah an luat ning a si? Aho nih dah a kalter hna?

Persia siangpahrang Sairas nih a kalter hna. Sairas a chuah hlan kum tampi lio ah, Jehovah nih a profet Isaiah kha hitin a ṭialter cang: ‘Nangmah nih tuah seh ti ka duh mi kha na tuah lai.’ Hika i a chim bantuktein Babilon khua laknak ah Sairas nihcun a rak hruai hna. Media le Persia mi hna cu aa hung komi kutka in zan ah khualipi chung ah an lut.

Sihmanhsehlaw Jehovah a profet Isaiah nihcun Sairas nih Jerusalem le a biakinn sak ṭhan awk ah nawl a pek te hna lai tiah zong a chim ve. Sairas nih nawl cu a rak pe taktak hna maw? A si, a pek hna. Sairas nih Israel mi hna cu hitin a ti hna: ‘Atu cu Jerusalem ah va kal u law, nan Pathian Jehovah a biakinn kha va sa u.’ Cucaah Israel mi hna cu a chim bang in tuah awk ah an kal lio a si.

Israel mi Babilon in an chuah lio

Sihmanhsehlaw Babilon i a um mi Israel vialte cu a hlat tukmi Jerusalem lei ah an kal kho dih lo. A hlat tukmi khuallam a si ko. Meng 500 (kilometer 800) hrawng a si i, a tampi cu cutluk hlami khuallam kal awk ah an tar tuk cang i, a zaw tukmi zong an um ve. Cun mi cheukhat an kal lonak sullam dang zong a um ve. Sihmanhsehlaw Sairas nih a kal lomi hna cu: ‘Jerusalem le a biakinn sak ṭhan awk i a kalmi hna kha sui le ngun le a dang laksawng zong pe hna u,’ tiah a ti hna.

Cucaah Jerusalem i a kir hnga mi Israel mihna sin ahcun laksawng tampi an rak pek hna. Culeng ah, Jerusalem a rak hrawh lio i Jehovah a biakinn chung in Nebukhadnezzar nih a rak lak mi hrai le kheng vialte zong kha Sairas nihcun a pek ṭhan dih hna. Cucaah a kal mi hna cu phorh pah awk thil tampi an rak ngei.

Thlali hrawng an kal hnu ah Israel mi hna cu Jerusalem khua kha an phan ṭhan. Cucu khualipi a rawhnak in le mi pakhat hmanh an um lo nak in kum 70 hnu bak ah a si. Sihmanhsehlaw Israel mi hna cu anmah ram ah an phan ṭhan cang nain, hmailei kan cawn te lai bang in caan har cheukhat an rak ngei ṭhiamṭhiam.

Isaiah 44:28; 45:1-4; Ezra 1:1-11.



Biahalnak hna

  • Hmanthlak chungah a langh bantukin Israel mi hna nih zeidah an tuah?
  • Isaiah nih a chimmi Jehovah chimchung bia kha Sairas nih zeitindah a tlinter?
  • Jerusalem lei a kir ṭhan kho lomi Israel mi hna kha Sairas nih zeidah a chimh hna?
  • Jerusalem lei a kir mi hna kha Sairas nih zeidah a pek hna?
  • Jerusalem lei a kir ṭhanmi Israel mi hna cu zei can dah an rauh?
  • Ram ah mi pakhat hmanh an um lonak kum zeizat tiang dah a si?

Biahalnak dang hna

  • Isaiah 44:28 le 45:1-4 rel.

    Sairas kong i chimchung bia a tling hrimhrim lai ti kha Jehovah nih a hlei in zeitindah a langhter? (Isa. 55:10, 11; Rom 4:17)

    Sairas kong Isaiah chimchungmi bia nih Jehovah nih hmailei kong a chimchung khawhnak kong zeidah a langhter? (Isa. 42:9; 45:21; 46:10, 11; 2 Pit. 1:20)

  • Ezra 1:1-11 rel.

    Jerusalem lei a kir kho lomi hna i zohchunhawk kha zul in nihin caan tling rianṭuannak ah aa tel khomi hna kha zeitindah kan “bawmh” khawh hna? (Ezra 1:4, 6; Rom 12:13; Kol. 4:12)