A ummi cazin ah kal

A ummi cazin ah kal

Tuanbia 77: An Kunpiak Duh Lo

Tuanbia 77: An Kunpiak Duh Lo

Hi tlangval pathum kong nan theih mi kha nan hngal ti maw? A si, annih cu an ca ah a ṭha lo mi ei a rak duh lo mi Daniel a hawile pathum an si. Babilon mi hna nih annih cu Shadrak, Meshak le Abednego tiah an auh hna. Sihmanhsehlaw atu cu zoh hna hmanh u. Zeicahdah midang vialte bang in hi milem nganpi cu an kunpiak duh ve lo? Zoh tuah u sih.

Nawlbia pahra tiah an ti mi amah Jehovah theng nih a ṭial mi nawl bia kha nan hngal ti maw? Cu hna lak i pakhatnak cu: ‘Keimah hlei in pathian dang zeihmanh nan bia lai lo,’ ti a si. Cu nawlbia zulh cu a fawimi thil a si lo nain hika i tlangval hna nihcun an rak zulh.

Babilon siangpahrang Nebukhadnezzar nih upa tampi kha hi a sermi milem upatnak pek awk ah a kawh hna. ‘Nannih nih muko thawng le tingtang thawng le thonglawi thawng le darkhing thawng le tummi phunkip thawng le hla sak thawng kha nan theih tik ah nan bok lai i hi sui milem cu nan biak lai. A bok i a bia lomi paoh cu a alh hluahmah mi mei phu chung ah paih nan si lai,’ tiah siahgpahrang nih nawl a rak chuah.

Shadrak, Meshak le Abednego cu an kun lo ti kha Nebukhadnezzar cu a theih tik ah a thin a rak hung ngaingai. Amah hmaika ah ratpi hna u, tiah a ti hna. Kunpiak awk ah voikhat caan a pek ṭhan hna. Sihmanhsehlaw tlangval hna nih Jehovah cu an i bochan. ‘Kan biakmi kan Pathian nih a kan khamh khawh ko. Sihmanhsehlaw a kan khamh lo hmanh ah, na sui milem cu kan kunpiak kho lo,’ tiah Nebukhadnezzar kha an chimh.

Shadrak, Meshak le Abednego

Hi bia a theih tik ah Nebukhadnezzar cu a thin a hung chinchin. A alh hluahmah mi meiphu cu an pawngte ah a um ko. Cun amah nih: ‘Meiphu cu hmasa nak in let sarih in linhter deuh u!’ tiah nawl a pek hna. Cu hnu ah a ralkap chung i a ṭhawng bikbik ti mi hna nih Shadrak, Meshak le Abednego cu an ṭem hna i meiphu chung ahcun an paih hna. Meiphu cu a linh tuk caah anmah a paihtu hna mi ṭhawng pawl hmanh cu meizik nih a thah dih hna. Sihmanhsehlaw a chung i an paihmi tlangval pathum cu zeitindah an um?

Siangpahrang cu meiphu chung ah a hun zoh tik ah a khuaruah a har ngaingai. ‘Meiphu chung i kan ṭem i kan paih mi hna kha pathum an si lo maw?’ tiah a hal hna.

‘A si ko, Bawipa,’ tiah a sal hna nih an leh.

‘Sihmanhsehlaw mei chung ah mi pali aa chok lengmang mi ka hmuh ṭung hna. Annih cu hri zong in ṭem an si lo i, mei zong nih a kang fawn hna lo. Cun a palinak cu pathian a lo fawn,’ a ti. Siangpahrang cu meiphu kaa cu a hei naih deuh i: ‘Shadrak! Meshak! Abednego! Hung chuak tuah u, nannih Cungnung Bik Pathian sal hna!’ tiah a auh hna.

An hung chuah tik ahcun, annih cu mei nih a pelte hmanh a kangh hna lo kha mi vialte nih an hmuh hna. Cu hnu ah siangpahrang nih: ‘Shadrak, Meshak le Abednego Pathian cu thangṭhat si ko seh! An Pathian hlei ah zeibantuk pathian hmanh an kunpiak lo i an biak lo caah an Pathian nih a vancungmi a run thlah i, annih cu a khamh cang hna,’ tiah a ti.

Hi cu Jehovah sin ah zumhfek tein um awk ah kanmah caah zohchunh awk ṭha a si lo mei?

Exodus 20:3; Daniel 3:1-30.



Biahalnak hna

  • Babilon siangpahrang Nebukhadnezzar nih mi hna kha zei nawl dah a pek hna?
  • Zeiruangah Daniel hawile pathum cu sui milem hmai ah an kun duh lo?
  • Nebukhadnezzar nih Hebru tlangval pathum kha kun awkah voikhat caan a pek ṭhan hna tikah Jehovah an i bochannak kha zeitindah an langhter?
  • Nebukhadnezzar nih a mi hna kha Shadrak, Meshak le Abednego cungah zeidah a tuahter hna?
  • Nebukhadnezzar nih meiphu nganpi kha a zoh tikah zeidah a hmuh?
  • Zeicah siangpahrang nih Shadrak, Meshak le Abednego hna an Pathian kha a thangṭhat i annih nih zei zohchunhawk dah kan caah an chiah?

Biahalnak dang hna

  • Daniel 3:1-30 rel.

    Kan zumhfehnak hneksak a si tikah Pathian salle dihlak nih Hebru tlangval pathum hna an langhter mi zei lungput kha dah kan i zohchunh awk a si? (Dan. 3:17, 18; Matt. 10:28; Rom 14:7, 8)

    Jehovah Pathian nih Nebukhadnezzar kha zei a biapi mi chimhhrinhnak dah a pek? (Dan. 3:28, 29; 4:34, 35)