A ummi cazin ah kal

A ummi cazin ah kal

Tuanbia 71: Pathian Nih Paradis Pek Awk Bia A Kam

Tuanbia 71: Pathian Nih Paradis Pek Awk Bia A Kam

Hi cu profet Isaiah kha Pathian nih a rak hmuhsak mi paradis hmanthlak a si. Isaiah cu Jonah hnu tlawmpal ah a rak nung mi pakhat a si.

Paradis ah a ummi minung

Paradis cu “dum” a si lo ah “pangpar dum” tinak a si. Hi cauk chung i kan hmuh cang mi hmanthlak pakhat kha an hngalhter ṭhan hna maw? Adam le Evi caah Jehovah a rak tuahpiak mi hna aa dawh ngai mi dum he aa lo lo maw? Sihmanhsehlaw vawlei dihlak cu paradis a si ṭhan kho te hnga maw?

Jehovah nih profet Isaiah kha Pathian mi hna caah a ra lai mi paradis thar kong kha a rak ṭialter. ‘Cenghngia le tuu kha daite in an tlong ṭi lai. Cawfa le chindeih no kha rawl an ei ṭi lai i, ngakchiatete nih khan an zohkhenh hna lai. Sivai ngei mi rul pawng ah ngakchia nih lente an i celh hmanh ah harnak zeihmanh an tong lai lo,’ tiah a ti.

‘Cucu zeitikhmanh ah a si kho bal lai lo. Vawlei cung ah harnak cu zungzal in a rak um ko i, a um zungzal ko lai,’ tiah mi tampi nihcun an ti ko lai. Sihmanhsehlaw hi kong hi ruat hmanh: Adam le Evi an umnak ca ah Pathian nih zeibantuk hmun dah a rak tuahpiak hna?

Pathian nih Adam le Evi cu paradis pakhat chung ah a rak chiah hna. Pathian nawl an ngaih lo ruang ah aa dawh ngai mi an inn an sungh i, an tar le an thih cu a si ko. Pathian nih amah a daw mi hna cu khi Adam le Evi nih an rak sungh mi hna cu ka pek hna lai tiah bia a kam.

A ra lai ding mi paradis thar ahcun harnak peknak le hrawhnak zeihmanh a um ti lai lo. A tling mi daihnak a um lai. A hramthok lio i Pathian nih si seh ti a duh ning tein a si lai. Sihmanhsehlaw zeitindah Pathian nih mah cu a chuahter lai ti cu kan cawng te lai.

Isaiah 11:6-9; Biathlam 21:3, 4.



Biahalnak hna

  • Isaiah cu ahodah a si, zei caan lio ah dah a nun i Jehovah nih zeidah a rak hmuhsak?
  • “Paradis” timi bia a sullam cu zeidah a si i mah nih zeidah an hngalhter?
  • Jehovah nih Isaiah kha Paradis thar kong zeidah a ṭialter?
  • Zeicah Adam le Evi nih aa dawh ngaimi an inn kha an sungh?
  • Jehovah nih amah a dawmi hna kha zeidah a kamh hna?

Biahalnak dang hna

  • Isaiah 11:6-9 rel.

    Vawlei thar ah minung le saram karlak ah daihnak a um lainak kong kha Pathian Bia nih zeitindah a cuanter? (Salm 148:10, 13; Isa. 65:25; Ezek. 34:25)

    Isaiah bia hna cu nihin Jehovah a mi hna lakah thlarau lei in zeitindah a tlin? (Rom 12:2; Efe. 4:23, 24)

    Atu le vawlei thar ah minung sining aa thlennak kongah ahodah upatnak hmuh awk aa tlak? (Isa. 48:17, 18; Gal. 5:22, 23; Fil. 4:7)

  • Biathlam 21:3, 4 rel.

    Vawlei cung minung hna sinah Pathian a um lai, mah cucu pum in a si lo langhternak in a si lai ti kha Baibal nih zeitindah a langhter? (Lev. 26:11, 12; 2 Chan. 6:18; Isa. 66:1; Biat. 21:2, 3, 22-24)

    Zei bantuk phun mitthli le fahnak dah a um ti lai lo? (Luka 8:49-52; Rom 8:21, 22; Biat. 21:4)