A ummi cazin ah kal

A ummi cazin ah kal

Tuanbia 70: Jonah le Ngapi Kong

Tuanbia 70: Jonah le Ngapi Kong

Ti chung i mipa hi zoh hmanh u. Harnak nganpi chung ah a phan ko lo mei? Khi nga nih khin a hun dolh cang lai! Hi mipa cu ahodah a si nan hngal maw? Amah min cu Jonah a si. Zeitindah cutluk harnak nganpi chung ah cun a phanh kan zoh tuah lai.

Jonah cu Jehovah a profet pakhat a si. Profet Elisha a thih hnu tlawm pal ah Jehovah nih Jonah cu: ‘Nineveh khuapi ah cun va kal tuah. Khika i mi hna an ṭhatlonak cu a ngan tuk hringhran i, hi kong hi chim seh ti kan duh,’ a ti.

Jonah le ngapi

Sihmanhsehlaw Jonah cu kal a duh lo. Cucaah Nineveh he aa ralchanmi lam lei ah a kalmi lawng kha aa cit. Cutin a zam caah Jehovah cu Jonah cung ah aa lawm lo. Cucaah thlichia fakpi a hranter. Thlichia a fah tuk caah lawng cu ti chung ah a pil hnik. Lawng cawngtu pawl cu an thin a phang tuk i, an pathian hna sin ah bawmhnak an hal cio.

A donghnak ah Jonah nih: ‘Keimah cu van le vawlei a sertu Pathian Jehovah a biami ka si. Cun Jehovah nih a ka fialmi rian kha tuah lo in ka zam tak,’ tiah a chimh hna. Cucaah lawng cawngtu hna nih: ‘Thlichia a daih nak hnga zeitindah kan in tuah lai?’ tiah an hal.

‘Ti chung ah ka hlonh u law rili cu a dai ṭhan ko lai,’ tiah Jonah nih a ti hna. Lawng cawngtu hna nih hlonh cu an duh lo, sihmanhsehlaw thlichia cu a zual chin caah a donghnak ah Jonah cu an hlonh taktak. Cu cangka in thlichia cu a dai i, rili cu dai tein a um ṭhan.

Jonah cu ti chung i a vung pil tik ah, ngapi pakhat nih amah cu a dolh. Sihmanhsehlaw a thi lo. Ni thum le zan thum chung ngapi paw chung ahcun a um. Jehovah a nawl ngaih in Nineveh khua i a kal lo kha Jonah cu aa ngaichih ngaingai. Cucaah amah nih zeidah a tuah nan hngal maw?

Amah kha bawmh awk ah Jehovah sin ah thla a cam. Cu hnu ah Jehovah nih ngapi cu Jonah kha leiro cung ah a luakter ṭhan. Cu hnu ah Jonah cu Nineveh khua ahcun a kal. Jehovah a kan fialmi paoh cu tuah awk ah zeitluk biapi dah a si ti fimnak a kan cawnpiak lo maw?

Jonah Baibal cauk.



Biahalnak hna

  • Jonah cu ahodah a si i Jehovah nih zeidah tuah a fial?
  • Jehovah fialnak hmun ah kal a duh lo caah Jonah nih zeidah a tuah?
  • Thlichia a daih nakhnga Jonah nih lawng cawngtu pawl kha zeidah a chimh hna?
  • Hmanthlak chungah na hmuh bantukin Jonah cu ti chungah a pil tikah zeidah a cang?
  • Jonah cu ngapi paw chungah zei can dah a um i cu ah cun zeidah a tuah?
  • Ngapi paw chungin a chuah hnu ah Jonah cu khuazei ah dah a kal i mah nih zeidah a kan cawnpiak?

Biahalnak dang hna

  • Jonah 1:1-17 rel.

    Jonah nih Nineveh khua mi hna sin i chim ding a simi a rian kha zeitindah a ruah ti cu a fian? (Jonah 1:2, 3; Ptb. 3:7; Pct. 8:12)

  • Jonah 2:1, 2, 10 rel.

    Jonah hmuhtonnak nih kan thlacamnak kha Jehovah nih a kan leh lai ti kha zeitindah a kan zumhter? (Salm 22:24; 34:6; 1 Johan 5:14)

  • Jonah 3:1-10 rel.

    Jonah nih hmasa ah a rian ṭuan awk a tlolh nain Jehovah nih a hman ṭhiam rihmi in zei thazang peknak dah kan hmuh? (Salm 103:14; 1 Pit. 5:10)

    Kan khuaram i a ummi hna kongah biakhiahnak tuah chungnak kong he aa tlai in Jonah le Nineveh khuami hna an hmuhtonnak nih zeidah a kan cawnpiak? (Jonah 3:6-9; Pct. 11:6; Lam. 13:48)