A ummi cazin ah kal

A ummi cazin ah kal

Tuanbia 64: Solomon Nih Biakinn A Sak

Tuanbia 64: Solomon Nih Biakinn A Sak

David a thih hlan ah, Jehovah a biakinn saknak ding ca i Pathian suai ciami ruam-am vialte kha Solomon cu a pek. A uknak in kum linak ah Solomon nih biakinn sak hram cu a thok i, kum sarih le a cheu chung an sak. biakinn saknak ahcun minung thong tampi nih rian an ṭuan i, tangka tampi a rak dih. Zeicahtiah sui le ngun tampi an rak hman.

Biakinn ahcun puan biakinn i bantuk khan, a khaan nganpi pahnih a um. Puan biakinn i a khaan hna let hnih lengmang in an ngan deuh. Solomon nih biakamnak kuang kha biakinn a chungchin khaan chung ah a chiahter hna i, puan biakinn chung i an chiah tawnmi thil dang vialte cu a khaan pakhat ah an chiah ve hna.

Biakinn sak an lim tik ah, puai nganpi an rak tuah. Biakinn hmai ahcun Solmon cu a khuk a bil i hmanthlak chung i nan hmuh bang hin thla a cam. ‘Nangmah cu van vialte hmanh nih khin an in tlum lai lo, Cucaah zeitindah hi biakinn nih hin cun an tlum hnga. Sihmanhsehlaw, Maw ka Pathian, zangfahnak in na mi hna nih hi hmun lei hoih in thla an cam tik ah ngaihpiak hram ko sawh hna,’ tiah thla cu a cam.

Siangpahrang Solomon thla a cam lio

Solomon nih thla cu a cam dih cangka, van in mei a rung tla. Thawinak caah an chiah mi sa hna cu a kangh hna. Cun Jehovah sin in a rami ceunak in biakinn cu a khat dih. Mah nihcun Jehovah nih a ngaihpiak i, biakinn le Solomon thlacamnak cung ah lung a tling ti a langhter. Puan biakinn si ti lo in, biakinnpi cu mi hna nih biak awk ah an chuahnak hmun ah atu cu a cang cang.

Caan saupi chung Solomon nih fimnak in a uk hna i, mi hna cu an lung aa lawm ngaingai. Sihmanhsehlaw Solomon nih Jehovah a bia lo mi ramdang mi nu tampi a ṭhit hna. Cu hna lak i pakhatnu siasal a biak lengmang lio hi nan hmu maw? A donghnak ah a nupile nih Solomon cu pathian dang an biakter ve. Solomon nih cubantuk in a rak tuah tik ah zeidah a cang ti nan hngal maw? Mi hna cung ah zangfahnak a ngei ti lo. A puarhrang cang i mi hna cu an i lawm kho ti lo.

Siangpahrang Solomon nih siasal a biak lio

Mah nihcun Jehovah cu Solomon cung ah a thin a hunter i, hitin a ti: ‘Nangmah sin in pennak cu ka lak lai i midang pakhat kha ka pek lai. Sihmanhsehlaw cucu nangmah chan chung ah ka tuah lai lo, na fapa chan chung ah ka tuah lai. Asinain na fapa sin zong in mi hna pennak a dihlak cun ka la lai lo.’ Zeitindah mah cu a rak tlin zoh hmanh u sih.

1 Chanrelnak 28:9-21; 29:1-9; 1 Siangpahrang 5:1-18; 2 Chanrelnak 6:12-42; 7:1-5; 1 Siangpahrang 11:9-13.



Biahalnak hna

  • Solomon nih Jehovah biakinn sak liim dingah kum zeizat dah a rauh i zeicah tangka tampi a dih?
  • Biakinn chungah khaan nganpipi pa zeizat dah a um i, inn a chungchin khaan ah zeidah an chiah?
  • Biakinn an liim tikah Solomon nih a thlacamnak ah zeidah a chim?
  • Jehovah nih Solomon thlacamnak a lungtlinnak kha zeitindah a langhter?
  • Solomon cu a nupile nih zeidah an tuahter i, Solomon cu zeidah a can?
  • Zeiruangah Solomon cungah Jehovah a thin a hun i, zei bia dah Jehovah nih a sinah a chim?

Biahalnak dang hna

  • 1 Chanrelnak 28:9, 10 rel.

    1 Chanrelnak 28:9, 10 ah ṭialmi David bia kha ruat in nifa kan nunnak ah zei tuah awkah dah fakpi kan i zuam awk a si? (Salm 19:14; Fil. 4:8, 9)

  • 2 Chanrelnak 6:12-21, 32-42 rel.

    Minung nih sakmi inn ah Cungnung Bik Pathian aa tlum kho lo ti kha Solomon nih zeitindah a langhter? (2 Chan. 6:18; Lam. 17:24, 25)

    2 Chanrelnak 6:32, 33 chungah kan hmuhmi Solomon bia nih Jehovah kong zeidah a langhter? (Lam. 10:34, 35; Gal. 2:6)

  • 2 Chanrelnak 7:1-5 rel.

    Israel mi nih a sunparnak an hmuh tikah Jehovah thangṭhat awk a forh hna bantukin Jehovah nih nihin a mi hna cungah thluachuah a pek mi hna kha ṭha tein kan ruah tikah zeitindah a kan nunter awk a si? (2 Chan. 7:3; Salm 22:22; 34:1; 96:2)

  • 1 Siangpahrang11:9-13 rel

    Solomon a nuncan nih a dongh tiangin zumhfehnak ngeih peng a biapitnak kha zeitindah a langhter? (1 Si. 11:4, 9; Matt. 10:22; Biat. 2:10)