A ummi cazin ah kal

A ummi cazin ah kal

Tuanbia 63: A Fimmi Siangpahrang Solomon

Tuanbia 63: A Fimmi Siangpahrang Solomon

Solomon cu siangphrang a kai lio ah kum hra leng lawng a si rih. Amah cu Jehovah kha a dawt i, a pa David nih a pekmi nawlbia ṭha vialte kha a zulh dih hna. Jehovah cu Solomon cung ah a lung a tling ngaingai i, cucaah zankhat cu a mang ah hitin a ti: ‘Solomon, zeidah kan pek lai, ka hal tuah.’

Khi tik ah Solomon nih: ‘Jehovah ka Pathian, kei cu ka ngakchia tuk rih i zeitindah ka uk lai ti kha ka hngal lo. Cucaah na miphun kha a hmaan tein ka uk khawh hna nak hnga fimnak ka pe tuah,’ tiah a leh.

Jehovah cu Solomon nih a halmi cung ah a lung a tling ngaingai. Cucaah: ‘Nun saunak le rumnak tu si lo in fimnak na ka hal caah, vawlei cung minung vialte nak in fimnak tam deuh kan pek. Sihmanhsehlaw na ka hal lomi rumnak le nun saunak zong kan pek ve lai,’ tiah a ti.

Khi hnu caan tlawmpal ahcun nu pahnih an bia har ngai pakhat he Solomon sin ah an hung phan. Pakhatnu nih: ‘Hi minu le keimah cu inn pakhat chung ah kan um. Fapa pakhat ka hrin i, ni hnih hnu ah amah zong fapa pakhat a hrin ve. Cun zankhat cu a fapate cu a thi. Sihmanhsehlaw kaa hngilh kar ah, a thimi a fate cu ka pawng ah a hun ihter i, ka fapate cu aa lak. Ka hun i hlauh tik ah a thimi fate cu ka pawng ah ka hmuh. Ka fa a si lo ti kha ka hngalh,’ tiah a ti.

Khi tik ah adang minu pakhat nihcun: ‘A si lo! A nungmi fate cu keimah fa hrimhrim a si ko i, a thimi cu amah fate a si ko! a ti ve. A hmasa minu nih: ‘A si lo! A thimi hi nangmah fa a si ko i, a nungmi hi keimah fa a si hrimhrim ko!’ tiah a leh ve. Cu bang in nu hna cu an i al len ko. Solomon cu zeidah a tuah lai?

Vainam pakhat in a lakter hna i, an rak put tik ah, hitin a ti: ‘A nungmi ngakchiate kha pahnih ah cheu u law, a cheu veve in nu hna kha pe hna u.’

‘A si lo! A nungmi ngakchiate cu zangfahnak in that sawh hlah u. Amah zong kha pe deuh ko u!’ tiah a nungmi ngakchiapate a nu taktak nihcun a hun ti. Sihmanhsehlaw a dang nu pakhat nihcun: ‘Aho hmanh kan pe hlah u; cheuhnih tu ahcun cheu lawlaw ko u,’ a hun ti.

Siangpahrang Solomon nih a harmi thil a tawnghtham

A donghnak ah Solomon nih: ‘Ngakchiate cu that hlah u! Hmasa minu kha pe u. Amah kha a nu taktak a si,’ a hun ti hna. A nu taktak nih cun a fate kha a dawt caah a thih lai kha a siang lo i, cucaah adang minu zong kha a thih nak in cun a nung in pek a sian deuh, ti kha Solomon nih a hngalh. Solomon nih zeitindah bia a chah ti kha mi hna nih an theih tik ah, cutluk a fimmi siangpahrang an ngeih cu an lung aa lawm ngaingai.

Solomon a uk lio caan ah hin, Pathian nih mi hna cu thluachuah a pek hna i, an ram chung ah changvut, barli, mitsur, theipi le adang rawl hna cu tampi in an vui tawn. Mi hna cu thilpuan ṭhaṭha an i hruk i, inn ṭhaṭha chung ah an um cio. Mikip caah a ṭhami thil vialte cu anmah ca i a za hngami nak tam deuh in a rak um dih.

1 Siangpahrang 3:3-28; 4:29-34.



Biahalnak hna

  • Jehovah nih Solomon kha zeidah a hal i, zeitindah a leh?
  • Solomon halmi nih a lung a ton caah Jehovah nih zei kan pek lai tiin dah bia a kamh?
  • Nu pahnih hna nih zei a har ngaimi bia dah Solomon sinah an chuahpi?
  • Hmanthlak chungah na hmuh bantukin Solomon nih zeitindah bia a chah?
  • Solomon uknak cu zei he dah aa lawh, zeicah a si?

Biahalnak dang hna

  • 1 Siangpahrang 3:3-28 rel.

    Nihin Pathian bupi chung i rian pek a simi pakhat nih 1 Siangpahrang 3:7 ah Solomon nih lungthin tak tein a chimmi bia in zeidah a cawn khawh? (Salm 119:105; Ptb. 3:5, 6)

    Aa tlakmi thlacamnak he aa tlaiin Solomon a thlacamnak cu zeitindah a ṭha ngaimi zohchunhawk a si? (1 Si. 3:9, 11; Ptb. 30:8, 9; 1 Johan 5:14)

    Solomon nih nu pahnih karlak i bia alnak a tonghtham ning nih hmailei a ngan deuh mi Solomon, Jesuh uknak kongah zeidah a kan zumhter? (1 Si. 3:28; Isa. 9:6, 7; 11:2-4)

  • 1 Siangpahrang 4:29-34 rel.

    Nawlngaimi lungthin ngeih awkah Solomon nih a halnak kha Jehovah nih zeitindah a leh? (1 Si. 4:29)

    Solomon a fimnak theih ruah ah mi hna an i zuamnak kha zoh in Pathian bia kan hlathlai tikah zei lungput dah kan ngeih awk a si? (1 Si. 4:29, 34; Johan 17:3; 2 Tim. 3:16)