A ummi cazin ah kal

A ummi cazin ah kal

Tuanbia 62: David Inn Chungah Harnak A Tlunnak Kong

Tuanbia 62: David Inn Chungah Harnak A Tlunnak Kong

Jerusalem khua ah David nih uknak a thok hnu in, an ral hna cung ah teinak tampi kha Jehovah nih a ralkap hna cu a pek hna. Jehovah nih Israel mi hna kha Kanaan ram pek awk ah bia a kam cang. Cucaah atu cu Jehovah bawmhnak thawng in, an sin i biakam mi ram vialte cu a donghnak ah anmah ram ah a cang dih.

David cu siangpahrang ṭha a si. Jehovah kha a dawt. Cucaah Jerusalem khua a lak hnu in a tuah hmasa bik mi cu, Jehovah biakamnak kuang kha Jerusalem khua ah a ratpi. Cu hnu ah biakamnak kuang chiahnak caah biakinn pakhat sak awk zong duhnak a rak ngei.

David cu a kum a hung upat deuh tik ah, palhnak ṭhalo ngai pakhat a tuah. David nih midang ta a simi thil zeimaw lakcu a hmaan lo ti a hngalh ko. Sihmanhsehlaw nikhat cu zanlei sang ah, a siangpahrang inn cung i aa chawh lio ah, tanglei a vun zoh i aa dawh ngaimi minu pakhat kha a hmuh. Amah min cu Bethsheba a si i, a vapa cu David a ralkap pakhat Uriah an timi a si.

David nih Bathsheba cu a duh tuk i amah kha siangpahrang inn lei ah ratpi u tiah a auhter hna. A vapa cu ral tuknak ah lam hlapi ah a um. Cun David nih a ihpi i a hnu ah Bethsheba cu fa ka pawi ti kha aa hngalh. David cu a thin a phang ngaingai i, a ralkap haotu Joab sin ah bia a cah i Uriah kha an thah nak hnga ral hratnak bik hmun hmaisuang bik ah na chiah lai tiah a ti. Uriah a thih tik ah, David nih Bethsheba cu a ṭhit.

Jehovah cu David cung ah a thin a hung ngaingai. Cucaah a salpa Nathan kha a sualnak chimh awk ah a sin ah a thlah. Hmaanthlak ah hin Nathan nih David a chimhhrin lio cu nan hmuh ko lai. David cu a tuah cangmi sualnak ruang ah a ngaih a chia ngaingai, cucaah Jehovah nih amah cu a that lo. Sihmanhsehlaw Jehovah nih: ‘Hi thil ṭhalo hi na tuah cang caah, na inn chung ah harnak tampi na ngei lai,’ tiah a ti. David cu harnak tampi a rak hmuh taktak!

Nathan nih David a chimhhrin lio

Hmasa bik ah Bethsheba a fapate cu a thi. Cu hnu ah David a hrin hmasa bik mi a fapa Amnon nih a farnu Tamar kha amah pakhat lawngte in a auh i a sualpi. David a fapa Absalom cu hi ruang ah a thin a hung tuk hringhran i Amnon kha a thah. A hnu ah Absalom kha mi tampi nih an hun duh i, amah le amah kha siangpahrang ah aa canter. A donghnak ah David nih Absalom he an i dohnak cu a tei ṭhan i Absalom cu thah a si. A si, David cu harnak tampi a rak ngei.

Hi vialte karlak ah hin, Bethsheba cu fapa pakhat a hrin ṭhan i, a min ah Solomon tiah an sak. David cu a tar i a zawt tik ah, a fapa Adonijah nih siangpahrang can awk ah aa rak i zuam ṭhan. Cu lio ah cun Solomon cu siangpahrang a ṭuan ding mi a si ti hmuhsaknak ah a tlangbawi Zadok kha David nih Solomon cu chiti a toihter. Cu hnu thawmpal ah David cu a kum 70 a si ah a thi. Kum 40 chung a rak uk, asinain atu cu Solomon kha siangpahrang a si cang.

2 Samuel 11:1-27; 12:1-18; 1 Siangpahrang 1:1-48.



Biahalnak hna

  • Jehovah bawmhnak thawngin a donghnak ah Kanaan ram cu zei ahdah a can?
  • Zanlei sang nikhat ah siangpahrang inn cung i David aa chawh lio ah zeidah a cang?
  • Zeiruangah David cungah Jehovah a thin a hun ngaingai?
  • Hmanthlak chung i David a sualnak kong va chimh awkah Jehovah nih a thlah mipa hi ahodah a si i, mah mipa nih David cungah zeidah a tlung lai tiah a chim?
  • David cu zei harnak dah a rak ton?
  • David hnu ah ahodah Israel siangpahrang a hung si?

Biahalnak dang hna

  • 2 Samuel 11:1-27 rel.

    Jehovah rian ah i manh loin kan ummi hi zeitindah kan caah huhphenhnak a si?

    David cu sualnak chungah zeitindah a tlak i mah nih nihin Jehovah a salle caah zei ralrinnak dah a pek? (2 Sam. 11:2; Matt. 5:27-29; 1 Kor. 10:12; Jeim 1:14, 15)

  • 2 Samuel 12:1-18 rel.

    Nathan nih David cawnpiak awk a fuhpanh ningcang in Khrihfa upa pawl le nu le pa hna nih zei cawn awk dah an i lak khawh? (2 Sam. 12:1-4; Ptb. 12:18; Matt. 13:34)

    Zeicah Jehovah nih David cungah zaangfahnak a langhter? (2 Sam. 12:13; Salm 32:5; 2 Kor. 7:9, 10)