A ummi cazin ah kal

A ummi cazin ah kal

Tuanbia 73: Israel Ram Hmanung Bik Siangpahrang Ṭha

Tuanbia 73: Israel Ram Hmanung Bik Siangpahrang Ṭha

Josiah cu thlanglei Israel phun hnih hna pennak i siangpahrang a kai lio ah kum riat lawng a si rih. Siangpahrang si awk ahcun a no tuk rih. Cucaah a hramthok ahcun upa cheu khat nih amah cu an ram uknak ah khan an rak bawmh.

Josiah cu siangpahrang a sinak in kum sarih a phanh tik ah, Jehovah kawl hram aa thok ve. David, Jehoshaphat le Hezekiah bantuk siangpahrang ṭha hna kha aa zohchun hna. Cucaah tlangval note a rak si rih ko lio ah Josiah nih ralṭhatnak rian pakhat kha a rak ṭuan.

Siangpahrang Josiah le a mi nih siasal an hrawh lio

Caan saupi chung cu Israel mi hna cu an rak ṭha ti lo. A hmaan lo mi pathian kha an biak hna. Siasal hmai ah an kun. Cucaah Josiah cu a mi hna he an chuak i, a hmaan lo mi biaknak vialte kha an ram chung in thenh hram an thok. A hmaan lo mi pathian a bia mi tampi an si caah hi rian cu a ca ah a fawite mi rian a si lo. Josiah le a mi hna cu siasal an hrawh lio kha hi hmanthlak chung ah hin nan hmuh khawh hna.

Cu hnu ah, Josiah nih Jehovah biakinn remh ṭhan awk ah mi pathum kha rian a pek hna. Mi hna sin in tangka kha an khawmh i, ṭuan hnga ding mi rian ṭuan man i phalh awk ah tangka cu hi mi pathum cu an pek hna. Biakinn chung i rian an ṭuan lio ah khan, tlangbawi ngan Hilkiah nih a biapi ngai mi thil pakhat cuka ahcun a hmuh. Cucu hnulei caan saupi lio i Jehovah nih Moses a rak ṭialtermi nawlbia cauk kha a si. Cu cauk cu kum tampi chung a rak tlau cang.

Cauk cu Josiah sin ah an rak put i, ka relpiak tuah u tiah a fial hna. Ṭha tein a ngaih tik ah, Josiah nihcun mi hna cu Jehovah a nawl bia kha an zul ti lo ti a hngalh. Hi kong ah a ngaih a chia ngaingai i, cucaah a angki kha hi hmanthlak i nan hmuh bantuk hin a rak thleh dih. Cun: ‘Kan pupa hna nih hi cauk chung i aa ṭial mi nawlbia kha an zulh lo caah Jehovah cu kan cung ah a thin a hung cang,’ tiah a ti.

Safan le Siangpahrang Josiah

Cucaah Josiah nih tlangbawi ngan Hilkiah kha Jehovah nih zeitindah a tuah hna lai ti hngalh awk ah nawl a pek. Hilkiah nih profetnu Huldah sin ah a va kal i a hal. Huldan nihcun Jehovah sin in a rami hi bia cu Josiah sin ah va chimh awk ah Hilkiah cu a chimh: ‘Mi hna nih a hmaan lo mi pathian kha an biak hna i ram cu ṭhatlonak in an khahter caah mi hna le Jerusalem khua kha dan ka tat hrimhirm hna lai. Sihmanhsehlaw nangmah Josiah cu ṭhatnak kha na tuah cang caah hi dantatnak cu na thih hlan ah a tlung lai lo.’

2 Chanrelnak 34:1-28.



Biahalnak hna

  • Josiah siangpahrang a rak si lio ah kum zeizat dah a si i, siangpahrang a sinak in kum sarih a si ah zeidah tuah a thawk?
  • Hmanthlak pakhatnak ah Josiah nih zei a tuahmi dah na hmuh?
  • Mi hna nih biakinn an remh ṭhan lioah tlangbawi ngan nih zeidah a hmuh?
  • Zeicah Josiah nih a angki a thleh?
  • Jehovah sinin zei bia dah profetnu Huldah nih Josiah kha a chimh?

Biahalnak dang hna

  • 2 Chanrelnak 34:1-28 rel.

    A harmi ngakchiat lio sining a ngeimi hna caah Josiah nih zei zohchunhawk dah a chiah? (2 Chan. 33:21-25; 34:1, 2; Salm 27:10)

    Josiah nih a uknak kum 8 nak, 12 nak le 18 nak chungah a hmaanmi biaknak ṭhanchonak caah zei a biapimi dah a rak tuah? (2 Chan. 34:3, 8)

    Siangpahrang Josiah le tlangbawi ngan Hilkiah nih kan biaknak hmun hna zohkhenhnak he aa tlai in an langhtermi zohchunhawk in zeidah kan i cawn khawh? (2 Chan. 34:9-13; Ptb. 11:14; 1 Kor. 10:31)