A ummi cazin ah kal

A ummi cazin ah kal

Tuanbia 69: Ngakchianute nih A Ṭhawng Mipa A Bawmh

Tuanbia 69: Ngakchianute nih A Ṭhawng Mipa A Bawmh

Hi ngakchianute cu zei bia dah a chim lengmang nan hngal maw? Hika i a bawinu sin ah hin Jehovah a profet Elisha le, Jehovah nih a tuah ter khawh mi khauaruahhar thil hna kong a chimh lengmang lio a si. A bawinu cu Israel mi a si ve lo caah Jehovah a kong kha a hngal lo. A si ahcun zeitindah ngakchianute cu hi a bawinu inn ah hin a um zoh hmanh u sih.

A bawinu cu Siria minu a si. A vapa cu Siria ralkap haotu Naaman a si. Siria mi hna nih hi ngakchianute cu an tlaih i, a sinum caah Naaman a nupi sin ah an rak pek.

Naaman nupi le a sinum ngakchianute

Naaman cu zawtnak ṭhalo thinghmui zawtnak an timi a ngei. Hi zawtnak nihcun mi pakhat kha a titsa a ei a ei i a hnu ah a ṭilhter dih khawh. Cucaah ngakchianute nihcun Naaman a nupi cu hitin a chimh: ‘Ka bawipa cu Israel ram i a ummi Jehovah a profet sin ah kal kho seh law ka hei duh dah. A thinghmui zawtnak hi a hei damh ko hnga.’ A hnu ah khi minu nih mah kong cu a vapa kha a chimh.

Naaman cu dam a duh tuk caah Israel ram ah ka kal lai tiah aa tim. Khika a phak tik ah, Elisha a inn ah a va kal. Elisha nihcun a sal pakhat kha a thlah i Naaman cu Jordan tiva ah voi sarih in vaa kholh seh tiah a va chimhter. Cu bia a theih tik ah Naaman cu a thin a hung ngaingai i, ‘Kanmah ram i tiva hna cu Israel ram chung i zeibantuk tiva nak hmanh in an ṭha deuh!’ tiah a ti. Hi bia a chim hnu ah Naaman cu a chuak ṭhan.

Sihmanhsehlaw a sal pakhat nih: ‘Bawipa, Elisha nih hin a harmi thil zeimaw tuah in fial seh law na tuah ko ṭung lai. A chim bang in zeicah atu ah naa kholh khawh lai lo?’ a ti. Naaman nih a salpa bia cu a ngaih i a va kal i Jordan tiva chung ah voi sarih a pumpuluk in a vung i hnim. Cutin a tuah tik ah, a titsa cu a ṭhawng i a hung dam ko!’

Naaman cu a lung aa lawm tuk. Elisha sin ah a kir ṭhan i: ‘Atu cu Israel ram chung i Pathian lawng hi vawlei dihlak ah a hmaanmi Pathian a si ti ka hngalh cang. Cucaah zangfahnak in hi laksawng hi i lak ko hna,’ tiah a va ti. Sihmanhsehlaw Elisha nih: ‘A si lo, kaa lak lai lo,’ tiah a leh. Naaman nih a pekmi laksawng kha i lak awk ah a ṭha lai lo ti a hngalh. Zeicah kan ti ahcun Naaman a damtertu cu amah si lo in Jehovah a si. Sihmanhsehlaw Elisha a salpa Gehazi nih laksawng cu amah caah a duh.

Cucaah Gehazi nihcun hitin a tuah. Naaman a kal hnu khan, Gehazi nih a hnulei in khulrang in a va dawi i, ‘Elisha nih na laksawng a cheukhat kha atu naite i a hung phanmi a hawikom caah a duh ti kha chimh awk ah Elisha nih na sin ah a hun ka thlah,’ tiah Naaman cu a chimh. Angaite cu hi cu lih a si. Sihmanhsehlaw Naaman nihcun lih a si kha a hngal lo. Cucaah Gehazi kha laksawng cheukhat cu a pek.

Gehazi inn lei a kir ṭhan tik ah, Elisha nih zeidah a tuah cang ti kha a hngalh. Cucaah a sin ah: ‘Hi thil ṭhalo hi na tuah cang caah, Naaman a thinghmui zawtnak cu nangmah cung ah a phan lai,’ a ti. A chim khawh cangka a chim bang cun a si taktak ko!

Hi hna thawng hin zeidah kan hngalh khawh? Hmasa bik ah, kannih cu ngakchianute bang hin si awk kan zuam ve lai i Jehovah a kong kha kan chim ve lengmang lai. Mah nihcun ṭhatnak tampi a chuahter khawh. A pahnihnak ah, a hmasa i Naaman a tuah bang khan kan ruam kai awk a si lo. Pathian sal hna an nawl kha kan ngaih hna lai. Cun a pathumnak ah, Gehazi bang in lihbia kan chim lai lo. Baibal relnak thawng in fimnak tampi kan hmu kho ko lo mei?

2 Siangpahrang 5:1-27.



Biahalnak hna

  • Hmanthlak chungah ngakchianute nih minu pakhat kha zeidah a chimh?
  • Hmanthlak chung i minu cu ahodah a si i ngakchianute cu mah minu inn ah zeidah a tuah?
  • Elisha nih a sal a thlah i Naaman kha zeidah a chimhter, zeicah Naaman cu a thin a hun?
  • Naaman nih a salle bia a ngaih tikah zeidah a cang?
  • Zeicah Elisha nih Naaman laksawng kha lak a duh lo, sihmanhsehlaw Gehazi nih zeidah a tuah?
  • Gehazi cu zeidah a can i mah in khan zeidah kan i cawn khawh?

Biahalnak dang hna

  • 2 Siangpahrang 5:1-27 rel.

    Israel ngakchianute i zohchunhawk a nunning cu nihin mino hna caah zeitindah thazang peknak a si khawh? (2 Si. 5:3; Salm 8:2; 148:12, 13)

    Baibal cawnpiaknak kan hmuh tikah Naaman i zohchunhawk kha kan lung chungah chiah cu zeicah a ṭhat? (2 Si. 5:15; Heb. 12:5, 6; Jeim 4:6)

    Elisha le Gehazi i zohchunhawk an nunning kan tahchunhnak thawngin zei cawn awk dah kan i lak khawh? (2 Si. 5:9, 10, 14-16, 20; Matt. 10:8; Lam. 5:1-5; 2 Kor. 2:17)