A ummi cazin ah kal

A ummi cazin ah kal

Tuanbia 52: Gideon Le A Mi 300 Kong

Tuanbia 52: Gideon Le A Mi 300 Kong

Kahin zeidah a cang lengmang nan hmu maw? Hi mi hna cu Israel ralkap lawngte an si. A kun mi hna cu ti an dinmi a si. Biaceihtu Gideon cu an pawngte i a dirmi pa hi a si. Zeitindah ti cu an din ti kha a zoh hna.

Mi hna ti an din ning aa dang ciomi hi zoh hmanh u. Micheu cu an hmai kha ti he hmuahchih in an kun i an din. Sihmanhsehlaw pakhat pa cu a pawngkam ah zeidah a cang ti kha a hmuh khawh nak hnga a kut in a lak i ti kha a din. Hi cu a biapi ngaimi a si, zeicahtiah Jehovah nih Gideon cu ti an din lio ah khua a zoh pahmi lawng na thim hnalai tiah a chimh. Adang vialte cu inn ah kir dih hna seh tiah Pathian nih a ti. Zeicah ti zoh hmanh u sih.

Israel mi hna cu harnak phunkip an tong ṭhan. A kong cu Jehovah bia an rak ngaih lo caah a si. Midian mi hna nih an tei hna i an hrem hna. Cucaah Israel mi hna cu Jehovah sin ah an au i bawmhnak an hal. Jehovah nih an aunak cu a theihpiak hna.

Jehovah nih ralkap pum hna tiah a ti caah Gideon nih ralkap 32,000 a pumh hna. Sihmanhsehlaw Israel mi a rak dotu ralkap cu 135,000 an si. Asinain Jehovah nih Gideon cu: ‘Mi tam tuk na ngei,’ a ti rih. Zeicahdah Jehovah nih mah ti cun a ti?

Zeicah kan ti ahcun, Israel mi nih ral kha an tei ahcun, kanmah nih kan tei tiah an ruah sual lai. Ral tei awk ah Jehovah bawmhnak kan herh theng lo tiah an ruah sual lai. Cucaah Jehovah nih Gideon sih ah: ‘A ṭihmi vialte inn ah kir dih u tiah chim hna,’ tiah a ti. Cu bang in Gideon nih a tuah tik ah, ralkap 22,000 cu inn ah an kir. Cutik ahcun ralkap 135,000 doh awk ah ralkap 10,000 lawng an tang cang.

Gideon nih a mi a hneksak hna lio

Sihmanhsehlaw, ngai hmanh u! Jehovah nih: ‘ Mi tam tuk na ngei rih ko,’ a ti. Cucaah mi hna kha hi tiva ah hin ti dinter hna law ti din awk i ti he a hmai hmuahchih lak in a kunmi vialte cu inn ah kirter dih hna tiah Gideon cu a chimh. ‘Ti an din lio i khua a zohpah mi 300 he lawng teinak cu kan pek lai,’ tiah Jehovah nih bia a kam.

Ral tuknak caan cu a hung phan. Gideon nih a mi 300 hna cu phu thum ah a chiah hna. A mi pakhat cio kha saki pakhat le a chung ah meifar a um mi um pakhat cio kha a pek hna. Zanṭim a si laite ah an ral riahhmun cu an kulh. Cun voikhat te ah an zapi in an saki cu an tum i an um cu an khuai dih hna i: ‘Jehovah le Gideon vainam!’ tiah an au. An ral ralkap pawl cu an hun i hlauh tik ah, an i tuai i an ṭih tuk. An zam dih i Israel mi hna nih ral dohnak cu an tei.

Biaceihtu a ngan 6 in 8.



Biahalnak hna

  • Israel mi hna nih zeitin le zeiruangah harnak tampi an ton?
  • Jehovah nih Gideon kha na ralkap ah mi an tamtuk tiah zeicah a ti?
  • Gideon nih a ṭihmi vialte inn ah kir u tiah a ti hna hnuah mi pa zeizat dah an tang?
  • Jehovah nih Gideon le a ralkap 300 lawng zeitindah a tanter hna kha hmanthlak zoh in fianter?
  • Gideon nih a mi 300 kha zeitindah a hruai hna i Israel mi nih ral an dohmi kha zeitindah an tei?

Biahalnak dang hna

  • Biaceihtu 6:36-40 rel.

    Gideon nih Jehovah duhnak kha fiang tein hngalh awkah zeitindah a rak tuah?

    Nihin ah Jehovah duhnak zeidah a si ti hngalh awkah zeitindah kan tuah? (Ptb. 2:3-6; Matt. 7:7-11; 2 Tim. 3:16, 17)

  • Biaceihtu 7:1-25 rel.

    Ralrinnak a ngei lomi hna he i dang in hliphlau tein an um caah a taangmi 300 sinin zeidah kan i cawn khawh? (Biac. 7:3, 6; Rom 13:11, 12; Efe. 5:15-17)

    Gideon kha zoh in a tuahsernak aa cawnmi mi 300 bantukin a ngan deuhmi Gideon Khrih Jesuh kha zoh in a tuahsernak zeitindah kan i cawn ve? (Biac. 7:17; Matt. 11:29, 30; 28:19, 20; 1 Pit. 2:21)

    Jehovah a bupi chungah zei hmun poah ah siseh rian pekmi kha lungtling tein ṭuan awkah Biaceihtu 7:21 nih zeitindah a kan bawmh? (1 Kor. 4:2; 12:14-18; Jeim 4:10)

  • Biaceihtu 8:1-3 rel.

    Unaupa unaunu pakhatkhat he kan ruahnak aa lawh lo tikah Efriam mi hna he bia an i alnak Gideon nih a tonghtham ning in zeidah kan i cawn khawh? (Ptb. 15:1; Matt. 5:23, 24; Luka 9:48)