A ummi cazin ah kal

A ummi cazin ah kal

Tuanbia 46: Nika A Dirnak Kong

Tuanbia 46: Nika A Dirnak Kong

Joshua hi zoh hmanh u. ‘Nika, dir ko!’ a ti. Cun nika cu a dir taktak ko. Nikhat chung van laifang ah tlak ti lo in a dir ko. Jehovah nih mah ti cun a tuahmi a si! Sihmanhsehlaw zeicadah Joshua nih nika cu tlaang ko seh ti a duh ti zoh tuah hmanh u sih.

Nika

Kanaan ram i siangpahrang ṭhalo panga nih Gibeon khua mi doh an rak i thok tikah, Gibeon khua mi hna nih mi pakhat kha an thlah i bawmh nak an va halter. ‘Khulrang in kan sin ah ra tuah! Kan khamh ko. Tlang ram i a um mi siangpahrang vialte nih na sal hna doh awk ah an hung chuak cang,’ tiah a ti.

Cucangka in Joshua le a ralkap vialte cu an rak kal. Zankhuadei an kal. Gibeon an phak tik ah, siangpahrang panga pawl an ralkap cu an ṭih tuk i an rak zam dih. Cun Jehovah nih van in rial nganpipi a tlakter i, Joshua a ralkap nih an thah mi hna nak in rial nih a tlak hna ruang ah a thimi ralkap cu an tam deuh.

Joshua

Joshua nih a rauh hlan ah ni a tla cang lai ti a hngalh. Khua a mui lai i siangpahrang panga hna an ralkap tampi cu an luat ko lai. Cucaah Joshua nih Jehovah sin ah thla a cam i hitin a chim: ‘Nika dir peng ko!’ a ti. Cucaah ni cu a tlaang ko i, Israel mi hna nih ral cu an tei dih khawh hna.

Pathian miphun a hua mi a ṭha lo mi siangpahrang dang tampi Kanaan ram ah an um. Joshua le a ralkap hna nih cu ram i siangpahrang 31 cu kum ruk chung ah an rak tei dih hna. Cu dih hnu ah, ram a ngei rih lo mi phun hna kha Kanaan ram cu Joshua nih a cheuh hna.

Kum tampi a dih hnu ah Joshua cu amah kum 110 a si ah a rak thi. Amah le a hawile pawl an nun chung cu mi hna nih Jehovah nawl cu an rak ngaih. Sihmanhsehlaw hi mi ṭhami hna an thih dih tik ahcun, mi hna nih ṭhatlonak tuah hram an thok i harnak chung ah an phan. Cubantuk caan lio ahcun Pathian bawmhnak an herh tawnmi cu a si.

Joshua 10:6-15; 12:7-24; 14:1-5; Biaceihtu 2:8-13.



Biahalnak hna

  • Hmanthlak chungah Joshua nih zeidah a chim, zeicah?
  • Joshua le a ralkap hna kha Jehovah nih zeitindah a bawmh hna?
  • Joshua nih an ral siangpahrang pa zeizat dah a tei hna i, cuti tuah awkah kum zeizat dah a rauh?
  • Zeicah Joshua nih Kanaan ram cu a cheuh hna?
  • Joshua a thih ah kum zeizat dah a si i, mah hnuah mi hna cu zeidah an can?

Biahalnak dang hna

  • Joshua 10:6-15 rel.

    Jehovah nih Israel mi hna caah nika le thlapa dir dingin a tuahmi kan hngalhnak nih nihin ah zei zumhfehnak dah a kan ngeihter? (Josh. 10:8, 10, 12, 13; Salm 18:3; Ptb. 18:10)

  • Joshua 12:7-24 rel.

    Kanaan siangpahrang 31 kha doh awkah ahodah rian a ngei i, zeiruangah mah cucu nihin kanmah caah a biapit? (Josh. 12:7; 24:11-13; Deut. 31:8; Luka 21:9, 25-28)

  • Joshua 14:1-5 rel.

    Israel miphun hna kha zeitindah ram kha cheuh an si i, mahnih khan Paradis i co hngami kong he aa tlai in zeidah a kan hmuhsak? (Josh. 14:2; Isa. 65:21; Ezek. 47:21-23; 1 Kor. 14:33)

  • Biaceihtu 2:8-13 rel.

    Israel chan i Joshua bantukin, nihin ah ahote dah zumh pialmi a dohtu an si? (Biac. 2:8, 10, 11; Matt. 24:45-47; 2 Thes. 2:3-6; Titas 1:7-9; Biat. 1:1; 2:1, 2)